ملحوظة: البوست ممنوع لذوي القلوب السعيدة..ومسموح للتعساء واللي مش هيتأثروا بالكلام فقط
ملحوظة 2: مش هتناقش في ولّا حرف عشان بكتب لنفسي..وشكراً :)
لو العياط ترف.. إذن النهارده انا الأكثر ترفاً في الكون..
مستنية أوقف أو أعمل pause عشان آخد نفسي أو الصداع يروح .. أو أعرف أنام بعد ما قمت مخضوضة 7 الصبح ومفيش فايدة.. كل اللي بعمله إني بختم أي حاجة بنوبة عياط هيستيرية.. أقرا أعيط ، اتفرج على فيلم أعيط ، أقف في المطبخ بعد ما تأكدت إن مفيش ريحة بصل والاقي إن حتى الرُز بيخليني أعيط، الموبايل سايلنت ومرمي في آخر الأوضة وكل ما ينور من بعيد وأشوفه صدفة أعيط..يلهوي ع البؤس يا جدعان أنا ازاي عايشة مع نفسي كده.. ده اسوأ من فترة ما قبل امتحان الفيزيا التيرم الأول لما بعت لنرمين استنجد بدكتور نفساني..(لأ مش أسوأ لسه..على الأقل مفكرتش في أساليب انتحار مبتوجعش).
الشتا وحشني ببشاعة وده سبب أدعى إني أكره كل ما يتعلق بالصيف النهارده..فـ أعلِّي التكييف ع الاخر وأضلم الأوضة شوية ،أرفع شعري بالفيونكة السعيدة بتاعتي وأنا عندي اقتناع تام إن مينفعش حد يلبس فيونكة بأي صورة من الصور ويبقى زعلان ! أقصد يعني ايه ف العالم يستحق عدم الاستمتاع بتلك اللحظة.. ومع ذلك قعدت في الركن نفسه بفتكر الحِلم بتاع الصبح وإني مضيعة حاجات كتير اوي معرفش فين في أرجاء الشقة ، وإنك مش هنا زي ما كنت موجود في الحلم.. وأكمل وصلة الشحتفة
أقرر أهرب من ده كله وأقعد أقرا eat pray love وهي بتحكي عن نفس الحالة اللي أنا فيها وتسأل نفسها ده ليه علاقة بجينات وراثية ، ولّا بكونها برج السرطان -زيي- ،ولّا الموضوع سايكولوجي بحت بسبب الحاج والحاجة صحاب البيت عشان مكنوش بيرضوا يأكلوني شيبسي في فترة من حياتي، جايز يكون هيرمونات مش مظبوطة وبتجنني حتى لو مش ده وقت جناني خالص بتحصل برضه صح؟ مابتحصلش؟مش مشكلة .. طيب ممكن يكون متعلق بدافع لا شعوري وضميري بيعاقبني على حاجة ارتكبتها في حياة أخرى سابقة مثلاً مثلاً !
وبعد سلسة احتمالات متعاقبة انتهى الأمر بعقلي بيوديني حتة تانية وبسأل نفسي.. ايه نوع البنت اللي عندها 20 سنة وعندها صحاب وأهل وناس بيحبوها وممكن يجيلها اكتئاب لدرجة تخليها مش قادرة تتحكم ف دموعها في يوم جمعة مبروك زي كده !..وفجأة كل كلمة من دول بقت سبب كبير في رُعبي، عقلي وبلا فخرعنده قدرة إبداعية في تخيل الأسوأ وكمان تصديقه.. لدرجة تخيلي إن ممكن يحصل تورنادو ياخد كل اللي بحبهم في لحظة واحدة والاقي العالم فضي من الناس دول أو اكتشفوا فجأة اني مستحقش وجودهم فمشيوا أو إني مطلعتش بنت طارق وسحر وإنهم فعلاً لاقوني على باب جامع زي ما أخويا بيقول لي!
بقدرة خارقة قررت أقوم أعمل أي حاجة، فطلعت مضرب التنس والمايوه من الرف المركون في الدولاب السخيف الملخبط بتاعي وبرضه بعيط.. افتكرت آخر ماتش لعبته في النادي في الفاينالز قبل تانية ثانوي بالظبط ، وافتكرت جيوفاني بنضارته الصغيرة شبه دمبلدور وشعره الناعم وبنطلونه البرمودا ومضربه ال NIKE. يوم ما كسبته الماتش ده زعق لي وقال لي كلام كتير من ضمنه "مسموش ماتش تنس اسمه مباراة تنس" ده بعد ما ترجمت كلامه الانجليزي العظيم جوا عقلي ..
افتكرت جيوفاني ومضحكتش على إنه طول عمره بيعاملني زي بنته مع إني أكبر منه بسنتين ما عدا المرة ديه كان غضبان اوي مني.. لو جيوفاني كان لسه موجود الأكيد إني كنت هقع في حُبه .. he was such a gentleman
نرجع لموضوعنا.. العياط رفاهية بتحتم على البني آدم الامتنان لربنا عشان شعري بقى كيرلي طبيعي بدون مكسبات صناعية لأني مسرحتوش ولا حطيت كريم ولا أصلاً بصيت في المراية..وفي خضم كل حاجة لازم أعترف إني بحاول طول اليوم أتغلب على كل الجوانيات والصعبانات اللي بتجبرني أقولك "وحشتني".. "اوي"..وأغمض عيني وأقول يارب صبرني وخرجني من الركن الضلمة ..ومتخلينيش أحلم أحلام حلوة اوي كده.. عشان ف الواقع كل حاجة العكس..في الواقع هو مش هنا واليو اس بي ماما ملقتهاش ورا الكُرسي ولا حاجة أنا اتأكدت لما صحيت من الموضوع ده بنفسي جايز لو لاقيتها الاقيك بالمرة..
ملحوظة 3 : الوقوف على رجل واحدة وأنت بتعيط وبتغني بيقويك بما يكفي عشان تتحرك وتقعد ع النت تكتب الهبل ده..هيحسسك باتزان وإن على الأقل فيه حاجة تقدر تتحكم فيها في نفسك رغم الشحتفة .
