الحياة كما لو كانت نزهة ويك إيند

من أين نبدأ ونحن يملأنا كل هذا الرغي !..واحدة واحدة وكأننا بنتعلم الاسبيلينج من أول وجديد..

Dear Mr..

cher monsieur..

عزيزي الأوستاذ / أوستاذي العزيز !

اوف! *كلمة أبيحة بالانجليزي*
وبالعربي ملعون أبو الفورماليتي ملعون أبوها يا بِنجي ..بتحط مسافات والكتابة بتشيلها في الآخر!

تخيل كده..

في محطة مصر.. الساعة 7 الصبح.. قررت أقعد وأكتب دلوقتي ما أنت عارف الإلهام لما يزن على دماغك يا تخضع له يا هيعذب أهلك طول السكة ويخاصمك أسبوع ع الأقل.. رُحت الرصيف بتاعي وقاعدة حاليا بالتي شيرت البينك والبنطلون الجينز والطرحة البيضا ساندة ضهري على ما يشبه العمود وجمبي تُرمُس النسكافيه، برفعه من وقت للتاني أشرب شوية واقفله عشان يفضل سُخُن (مع التركيز على ضم الخاء)، وأرميه كشيء جمبي غير مهتمة بوجوده غير في اللحظة اللي بشرب فيها، مربعة رجليا الطويلة نسبياً وحاطة اللاب عليها وبكتب ..

وأنا نازلة من البيت حسيت بلسعة البرد بتاعت الصبحية .. بتاعت الاشتياق .. بتاعت وحشتني بحُب! في الحالة ديه كل اللي تقدر تعمله

إنك تاخد نفس وتقول يارب اكفييني شر الوحدة وتتكلفت جوا نفسك وتبتسم ابتسامة مترددة..

خايفة أول واحد يعدي ياخد باله مني ويسأل نفسه أويفكر يحشر مناخير في حجم أر بي جيه في شئوني الخاصة ويتساءل ايه اللي ممكن بنت تكون سايبة الدنيا كلها وبتكتبه على رصيف قطر ولمين يا ترى!..وممكن يكمل باقي تساءولاته عن البنت الملطشة اللي مش بتعرف تتخانق ويسأل هتسافر ازاي لوحدها..هنا هصب جام غضبي عليك -بحُب برضو- واسألك ازاي تسيبني أسافر لوحدي؟! معدش حد بيحميني من الأشباح من ضل الناس اللي ماشية الصبحية تجري على شغلها..

الحياة ساعات بتبقى بخيلة علينا حتى بالدفا.. حتى باللي بنحبهم.. طب تخيل لو كنت هنا كنا هنعمل ايه؟ ! أكيد مكنتش هفرط ف لحظة الإلهام عشانك طبعاً.. كنت هقعدك جمبي ونتخانق ع النسكافيه وأوصف هنا شكلك عامل إزاي.. أنت كمان قاعد مربع جمبي بتاخد التُرمُس من إيدي وبتقولي "مش كفايا مكدراني ع الصبح كمان مستخسرة فيا النسكافيه".. أنا هضحك هنا ضحكتي البلهاء وهكمل الخيال الخصب بالتفكير إنك لابس التي شيرت الازرق اللي بحبه والجينز والكوتشي ..وبتبص لي بصة الفخر عشان بعمل حاجة كان نفسي فيها اوي وعينيا منورة..فكرني ساعتها أقولك إن الرصيف الضيق مبيمشيش عليه اتنين جمب بعض والرصيف هنا براح علينا وكفيل إنه يستحملنا كام سنة ضوئية لو موراكش حاجة يعني .. القطر مش هيطير!

عمرك فكرت يا بنجي في الوقت.. الوقت اللي بيقتل كل حاجة.. اللحظات اللي بتوقف فيها ساعتك الووتر ريزيست عشان توقفها، بس للأسف محناش عايشين في فيلم كليك والأرض مش هتبطل تدور لاجل خاطر عيوننا..
القطر هيطير يا بنجي لو استنينا هنا ع الرصيف لازم نتحرك متغاضيين تماماً عن إحساس البيانيست اللي بيعزف في ناحية والاوركسترا ماشية ف حتة تانية خالص! ..فكل اللي الناس سامعينك بتعزفه هو نشاذ .. بس أنت عارف إنك بتعزف كويس من وجهة نظرك.. أنت عارف، صح؟

............

الوقتُ أضيق من أن نُقحِمَه داخل هذه الحياة التعيسة

الوقت لا يتَّسع لسوانا؛ وإن كان يعني شيئاً

فالقلبُ أيضاً لا يتَّسع لسواك.*

.............

النهارده ندمت عشان في يوم فكرت بالليل إني "مش عاوزة أصحى يارب متخلينيش أصحى يارب بكرة ".. ولما صحيت قلت لنفسي بزهق "يوووووه! يوم تاني" عشان يا بن لو مكنتش صحيت يومها الصبح، ولو مكنتش صحيت النهارده الصبح مكنتش هحس بكده.. كمان عاوزة ابلغك حاجة مهمة، أنا مش يوتوبيان.. أنا بحبك يا بِنجي وليذهب السفهاء إلى الجحيم..

مع علمي إن الحب مبقاش هو الحُب، بقى ساندوتش تيك اواي بيتاكل مرة لحظة جوع وبينتهي محدش يقدر يوعد ولا يقول هو عاوز ايه بالظبط عشان يفضل.. وأنا بالمثل معدتش البنت اللي بتحاول تعمل نفسها كبيرة فتنط في جزمة مامتها اللي بكعب، وتحط روج أحمر فشخ، وتفُك الضفاير وتلبس فستان فوق الرُكبة، معدتش البنت اللي بتتعلم تضم رجليها وهي قاعدة وضهرها مفرود وراسها مرفوعة مبتتحركش فوق أو تحت .. البنت اللي بتحاول بتتكلم زي الكبار وتتنهد زي فنانات الإغراء وتبتسم من تحت لتحت لما ابن الجيران يهمس لها من سابع بلكونة إنه بيحبها .. كبرت يا بِن كبرت والحب فاض بيا ولو ده كله بتأثير طيف ..طيف يا بِن انا فاهمة كويس إنك مش هنا هنا..But tonight, I'm gonna love you like there's no tomorrow

أنت من أعماق أعماقي الطيف الوحيد اللي بيخليني أسعد من جوايا اوي حالياً.. وديه حاجة ملهاش أي سبعين لازمة بس تعتبر قانون كوني من قوانين الطاقة واستمرارية الحياة على وجه البسيطة.

........................................

عارف عمرك ما هتعرف تجيب منين تفاصيل فرحة اكتشاف الاختراع اللي اسمه ايس كريم مقلي، او الـ 1st date ،او اكتشاف مزيكا حلوة ، أو لحظات انتظار تطيير طيارة ورق مع رضوى ، او الحكي مع نرمين عن الكآبة ومستنقع الواقع ،او قراية حاجة شبهك اوي.. عارف..أنا بقدس التفاصيل ديه حتى لو مبوثقهاش ،عارف إنها بتتحول لضحكة على استحياء لكناس الصبح بدري أو بياع في المترو بعد كده؟

............................

ده مش بوست طويل.. أنا عارفة إنك بتحبني أرغي في أي بطيخ بس النوم كافر حقيقي وميرا استهلكت أفكاري النهارده..تصبح على رودي (ومنّتنساش تتَّك ع الواو.. )

............................

العنوان والــ * لنور البواردي 

 Chris Young and his song Tomorrow