-1-
قهوة بعد نص الليل لما مجاليش نوم بعد فيلم "The Vow"
معنديش الشجاعة الكافية اللي تخليني أقول إني مستوعبة أي حاجة تماماً أو نهائياً ..
كل اللي قادرة أتخيله إن بنت فرحها بعد 3 أيام بتكتشف إن عندها كانسر وتضرب بالمعلومة عرض الحائط عشان تفرح ..عشان تشوف صحابها متجمعين ف مكان واحد وبيضحكوا معاها .. عشان تقول لي "رضوى متنسيش تجيبي الكاميرا ، الفوتوجرافر على العريس ومش مطمناله، ولازم تلبسوا أنتم الأربعة كلكم نفس اللون ..راجعي معايا كده نسينا حد من البنات"..
بنت فرحها بعد بكرة ومندمجة في تجهيزات سعادتها المشروطة مدفوعة الأجر مقدماً .. وأنا غرقانة في مستنقع تعاسة محترم بدالها وبحاول مبالغش ،بس الحقيقة .. مش عارفة !
-2-
عندي مشكلة مع الحُب.. عندي مشكلة مع معرفة إحساسي بالظبط لما عقلي بيتجمد.. آه والله زمبقولك مش بعرف أبقى نفسي..
وفي اللحظة ديه متقنعنيش بمنطقيات خيالاتك العملاقة إن ده مسموش حُب..اُمال ده اسمه ايه يعني، المنطق بيقول ايه ، التاريخ بيقول ايه ، الروايات ، الأغاني ، الأفلام....
أقولك.. ارمي ده كله وبُص لي وأنا أقولك ده اسمه ايه بالظبط..
-3-
لما تلاقيها بتزعق بدون سبب
وبتترعش م الغضب
وبتخش ف ١٠٠ موضوع قديم بدون مناسبة
احضنها جامد
-العايدي-
-4-
بطلوا تسألوا الناس عن الرُكن الأسود اللي بيبهت على أرواحهم وعينيهم فتضلِّم فجأة.. اوعوا تسألوهم ايه اللي حصل عشان تروحوا برجليكوا هناك يعني مجازاً مترُشوش ملح ع الجرح اللي شايفينه بعنيكم متلمش.
-5-
عاوز تعرف ايه اللي حصل معايا ؟
أنا عجِزت مع إن كل اللي نفسي فيه من الكون والعالم الحقير ده إني أبقى سعيدة..
عَجِزت بس مش عاوزة أموت وخصوصاً لو في حادثة عربية..
عجِزت ونسيت الكلام والحواديت وملِّيت الناس كلهم لوهلة.. بقيت أكسِل أرُد ع الرسايل على الموبايل ومبتصلش بالمكالمات المنسية
وطول الوقت بسأل نفسي تفتكري إنك بمعرفتك لنفسك تقدري تقولي لأي بني آدم إنك هتفضل موجود أو إنك هتفضلي موجودة لحد الويك إيند الجاي حتى؟
أنتِ مش بتهتمي ، بتقولي هتكلم.. ومش بتتكلمي..
بتقولي هنحكي ونتقابل ومش بتقابلي..
هتعرف على ناس جُداد وتقومي هوب.. تدخلي القوقعة
don't ask me what happened, simply life happened !
-6-
تقدر تقول كده إني محتاجة أقعد مع نفسي شهر أجمع أشلاء مذابح صبرا وشاتيلا وأدفنهم ليرقدوا في سلام ونعيش كلنا في سعادة للأبد (مش سعادة ولا حاجة أنا بكدب ).
