اضطراب

Eat, Pray, Love

وبعد اللي قولتهولك ، كل حاجة كانت طبيعي ، أقصد مش طبيعي اوي..

مش فاهمة ازاي الامور مشيت على ما يرام نُص نُص، ازاي الفترة ديه كلها عدت -مش مجرد يومين او اسبوعين او حتى شهرين- وكان كل اللي بعمله إني في بداية  اليوم بقول لنفسي.. خطوة ورا التانية اليوم هيعدي ..ايام كتير اوي عدت ومحدش عرف الحقيقة غير اتنين ..البوح مش بيريح ، ساعات بيخوف جداً ، لما بعت رسالة اعتراف سريعة وحكيت لميرو اتأكدت من ده ..

عندي اضطراب في الهرمونات محسسني ان لو نملة قرصتني ممكن اعيط ، زي ما عيطت ادام البنات ، الموضوع كان embarrassing اوي بس مش هنجيب سيرته تاني.. مكنتيش هتعرفي تعملي حاجة يا ميرا يا حبيبتي ، الموضوع خرج عن سيطرتي الخاصة ، متقسيش على نفسك..

تعرف.. بفكر جدياً اسمع كلام مدحت وبس.. لما قلتله مش عاوزة اشتغل ، ده مش مخليني مبسوطة ، الكمفروت زوون الوحيدة بتاعتي في الشُغل هي لما بتيجي سيرة الكافيهات والمكتبات ، أي شغل تاني حاسة إنه تقيل على قلبي ،مدحت قال لي اعملي اللي بيخليكي مبسوطة ومتفكريش في  أي تبعات ، أنا اهو بكتب يا مدحت وهعمل مشروع حلو اوي-الحاجة الوحيدة اللي ماشية حلو الحمد لله- ، ده هيخليني مبسوطة ، هيخليني حاسة اني عايشة..

مريم كمان هتحسسني إني عايشة.. محكتلكش عن مريم ، البنت اللي بشرحلها فيزيا وبنقعد نلعب بالآفوميتر والمقاومات والبريد بورد كل مرة ، البنت اللي بتضحك وعندها ثقة غريبة بربنا ، البنت الوحيدة اللي بخاف أخذلها او أقول أدامها كلمة من غير قصد لتتأثر بيها وتنفذها وأشيل ذنبها..عرفتها من كام شهر قابلتها كذا مرة ف النادي ورغينا بالساعات في التليفون ، آخر مرة جاتلي البيت قبل ما اكتشف من حد تاني بالصدفة إن عندها سرطان ، مريم ممكن تموت وهي مليانة حياة.. مريم عمرها ما قالت لي على الحقيقة، وفهمتني من التيرم اللي فات إن أكبر مشاكلها في الكون إنها عاوزة تفهم الماث والفيزيكس، اكيد خافت من أي رد فعل غريب ييجي من ناحيتي، مريم خبت عليا زي ما انا خبيت على الناس كلها..

أنا فاهماها وعارفة احساسها، أصل زي ما انت عارف لو قلت الحقيقة هتكسب ايه ؟ متخيل تعاطف الناس معاك، صحابك وهما بيتعاملوا معاك برقة خايفين عليك لتتكسر، أهلك، زمايلك، كل اللي تعرفهم، نظراتهم الحذرة اللي مستنياك تنهار أو تنفجر في وشهم، انت قنبلة حزن موقوتة بالنسبالهم، محدش هيفهم يا ميم، محدش هيفهمها ولا يفهمني، وببساطة مينفعش حد يضحك على وجعك..

مريم.. انا شايفة اني استحق اكون سعيدة.. مريم انا خايفة اوي وحاسة باليأس جايز أكتر منك.. امتحان الوجود مش في مستوى الطالب المتوسط ، أنتِ شاطرة ، أشطر مني بكتير..وأنا مش عارفة أعمل لك حاجة زيادة.. أقولك سر، كتير اوي بحس اني نفسي اخد الوجع بدل اللي بحبهم، بدالك دلوقتي وبدل ميم لما كان عيان ، ياريتني قادرة أعمل اي حاجة أكتر من اللي بعملها..

اختبارات الوجود دايماً صعبة عشان كده أنا محتاجة أقرا أكتر لـ ديكارت..

وادعي لمريم واقعد ساكتة..كدهوت