فليذهبوا إلى جحيمهم الخاص

" 

أغلق الأنوار واستلقي علي ظهري ، أنظر للسقف

وأنا اقول يارب .. يارب خلي الناس اللي بحبهم لما اتوجع يعرفوا يطبطبوا عليا مايوجعونيش اكتر..

"

يخربيت الوجع يا هند والخذلان والاحباط اللي بيشدونا لتحت ، الناس اللي بيوحشونا ومش بنقدر نقولهم وحشتونا عشان هما مش عاوزينا بنفس الدرجة اللي احنا عاوزينهم بيها ، وكرامتنا بتمنعنا نطلب منهم ..ازاي ينفع تروحي تطلبي من حد إنك توحشيه زي ما بيوحشك؟ تفتكري كده هيجيلك منهم رد فعل ؟ ولّا هينوبك غير كسرِة النِفس كالعادة؟ 

ولّا تحبي أحكيلك عن التانيين اللي ممكن يخلونا مبسوطين بس مش فاهمين مع إننا سايبينلهم المفاتيح بتاعتنا والبيبان على البحري، وبنخاف نروح لهم بنفسنا عشان ميطلعوش زي الأولانيين.. 

يخربيت الأيام اللي بنصحى فيها مش قادرين نتحرك من السرير ، وبندور على سبب واحد نقوم عشانه ،ولو حتى حد يقولك صباح الخير ويحط ايده على شعرك بالراحة..

 بندور على مجرد سبب ومبنلاقيش ، بنصارع الحياة ونقوم ندور في الدولاب نقاوم الأسود فنلبس طرحة بينك وتي شيرت ابيض عشان طاقة الألوان تطبع على أرواحنا يمكن حاجة تتغير ، يمكن نحس أحسن..

يخربيت النوستالجيا والأفكار اللي بتظهر، توجعك، وترجع من تاني سايباك مش طايل سما ولا عارف تطلع فوق سطح الأرض..احنا مش واقعين يا هند، احنا تحت القاع بشوية بس بنكابر، بنكابر يمكن نصدق الكدبة..

وهنا بقى عقلنا بيتلخبط بين اللي حاسينه..اللي كل غرايزنا بتحاول تقوله لنا، وما بين عقلنا اللي مفروض يصدق إن كل حاجة كويسة عشان يستمر في الحياة المزرية ديه..عشان تصحي، وتقومي تدوري في نفس الدايرة ، تروحي الكلية ، تلاقي شروخ جديدة في الخزف بتاعك ، شروخ طالعة في الأصل من روحك..

القصة مش قصة اللي في إيدينا ، احنا راضيين الحمد لله ، القصة قصة عبث مبنتكلمش عنه ، حاجات مكتومة ومبتطلعش غير لما حد ينكشها ، محتاجين نسامح نفسنا أكتر ، محتاجين نحبها ، محتاجين نبص ونشوف ايه اللي بيسبب التعاسة ونرميه ، واللي بيسببوهالنا ونعدمهم من حياتنا.. الحياة حرب ، بس الحرب على كل الجبهات ، مُرهق.. مُرهق اوي يعني ، ولأننا معندناش خيارات غير الحرب فلازم نخترع السعادة بطريقة ما وسط ده كله.. 

........

مكتوب لا إرادياً رداً على بوست هندا