2.6.11

كل الطرق تؤدي إلى..رضوى


أقولك سر..أنا لما بخاف
بفضل أبص على كف إيدي وأقعد أعد الخطوط اللي فيها..
لما بعمل كده بفتكر الست العرافة اللي لما مسكت كفي..قالتلي:
-انتِ هتموتي صغيرة..

وأنتَ ضحكت ساعتها عليها وكمان عليا وقلتلي أنا عرافك للحظة ديه ومسكت كفي ودققت فيه بنظرتك المتأملة وقلتلي بكل جدية:..
-قدامك يا شابة طريقين طريق مسدود وألف طريق مفتوح..
وجميع الطرق بتؤدي إلى رضوى..هتاخديها مشي يا بنت الحلال أو بتوك توك..
المهم إنك هتوصلي لنفسك في الآخر طول ما أنتِ بعيدة عن الطريق المقفول..


.....

كل ما بفتكر البنت اللي كانت في المترو قد إيه كانت رقيقة وجميلة وقد إيه لما بصيتلها عرفت أقرا الحزن الرمادي جوا عنيها
كانت مجروحة أوي..فهمتها عشان ساعات ببقى مجروحة زيها
أنتَ عارف مش لازم حد بعينه يجرحك عشان تحس كده..

بس ساعات الدنيا بتعملها معاك وتديلك قلم مفاجيء من حاجات كتير مخدتش بالك منها..
لحظتها الشوكولاته اللي دايما معايا ف الشنطة كان ليها مفعول سحري..
وأنا واثقة إن الدفا بتاعها إتنقلها أول ما فتحتها وداقت أول قطمة..

..

أنا مش مجنونة..مش للدرجة يعني !!
فيها إيه لما أصحيك الساعة 4 الفجر عشان أسألك على بطلة الفيلم بتاع السهرة كان اسمها إيه عشان بنسى الأسامي بسرعة؟

أو أكلمك في عز ما أنت مشغول عشان أطلب منك تعملي سي دي عليه أغاني نيللي القديمة بتاعت الأطفال..؟

مش فاهمة أنا إيه الجنان إني آخدك ونمشي 7 محطات مترو على رجلينا لحد ما نروح ورجلي تتكسر من الكعب اللي لابساه..؟

ولا لما أقولك أنا نفسي أطير طيارة فوق البرج..ولما مسكنا ورق المذاكرة وعملناه مراكب ورميناه في النيل وفضلنا نمشي جمبه على الشط..ونشوف مين مركبته هتغرق قبل التاني ..

تصدق ممكن شوية أكون مجنونة..نصيبك كده

..

أقولك سر تاني..نفسي محسش بالحاجات جامد أوي كده..ساعتها هبطل مبالغة وهبطل أقلق بزيادة
وبالتالي مش هقلقك معايا..مبحبش اقلقك على فكرة ..


..................
على الهامش: الصورة لسوزان عليوان
والعنوان بتصرف لديوانها " كل الطرق تؤدي إلى صلاح سالم"


هناك 27 تعليقًا:

Heidenröslein يقول...

طب أقولك انا على سر :)

أنا بعمل زيك كتير .. وبتجنن ساعات برده كتير .. وبرده نفسي محسش كل حاجة أوي عشان مقلقش كدة ومقلقش اللي حواليا معايا :D

مش ده السر على فكرة .. السر إني كنت قاعدة بذاكر ومحتاسة ..قولت أدخل أقرا رضوى دايما بتطلع اللي جوايا :D

أحمد عيسي يقول...

رغم حلاوتها...مؤلمة قوي...الكلام لما يتحس قوي ويتكتب بيوصل باحساسه كامل للي بيقراه...التشبيه اللي في بالي اني حسيت بشرخ نفسي قوي لما قريتها

مؤلمة لحد الامتاع...

خواطري مع الحياة يقول...

ربنا يوفقك ياروحي

على فكرة ده مش جنانا
ده جمال وطفوله

تقبلي مروري ^_^

mena يقول...

جنانك جميل وطفولى جدا

ياريت كل الجنان كده

رضوى القمر ربنا معاكى

ويوفقك اشتقتلك موت

يارب تكونى بخير طمنينى

عليكى ومتنسنيش كده ياقمر

جايدا العزيزي يقول...

اولا وحشانى ياقلبى

ثانيا بحسك قريبه منى

وكلنا احيانا مثلك

دمت بخير

تحياتى

Ahmed Adel El-Feky يقول...

حلوه اوى يا رضوى :)

طالبة مقهورة ..درجة أولى يقول...

ضحى..

:)
على فكرة انتي اللي بتطلعي اللي جوايا فعلا مش هزار عشان كده بحب عندك اوي

طالبة مقهورة ..درجة أولى يقول...

أحمد عيسى

حاولت اخليها أقل ايلاماً بس واضح انه لا مفر:)

ميرسي لحضرتك جدا

خواطري مع الحياة يقول...

ياروحي ياعمري مافي داعي تحلفي ولا تعتذري
كل واحد وظروفة
بعدين انا ماعتاب حد
الي تحبهم بنخلق لهم اعذار
صح ولا انا غلطانه

ها وصلتي لرشا
قالتلك ايه؟؟؟؟؟؟؟
اعطتك شوكولاته ولا لا
لو مااعطتك قولي لي
وانا اروح اقول لمامتها
ههههههه

ياروحي انت

مافي اسف ولا اعتذار مابين الاصحاب
صح ولا انا غلطانه

ربنا يوفقك ياروحي ويسعدك
امين يارب.

طالبة مقهورة ..درجة أولى يقول...

خواطري

طب انا هعلق ع الكومينتين في كومينت :)

انتي عسولة اوي والله ..

ووصلت لرشا وخلاص حفظت اسم البلوج ومش هنساه ابدا ابدا

انا بحب اوي الناس اللي بتلتمس الاعذار لبعضها انتي نادرة جدا..وبجد وحقيقي متشكرة عشان انت...رشا

طالبة مقهورة ..درجة أولى يقول...

منة

انا مش ناسياكي والله بس غصب عني الامتحانات كمان اسبوع كده وبستعد فمكنتش بقدر اتابع

ميرسي اوي على زوقك
بحبك في الله

sara adel draz يقول...

رضوى انتى اصلا مجنونة بالفطرة
ويمكن ده احد الاسباب الرئيسية اللى بتجمعنا
همه دايما العباقرة كده
بيتهموهم بالجنون ..^_^
بوست جميل اوى
وكل الطرق تؤدى الى رضوه..عععععع

طالبة مقهورة ..درجة أولى يقول...

جايدا

ميرسي يا قمراية وانتي كمان

الحمد لله ان البوست عجبك :)

طالبة مقهورة ..درجة أولى يقول...

احمد عادل فكري

ميرسي يافندم لحضرتك :)

طالبة مقهورة ..درجة أولى يقول...

سارة سارة سارة سارة :)))))))

ههههههههههه
هتصل بيكي النهارده لما اشحن بقى :)

الي اللقاء

شمس النهار يقول...

ساعات الجنان بينفع برضوا

:))

اخبار المذاكرة ايه

:)))
اهو ده سؤال جنوني

الحسينى يقول...

مش لازم حد بعينه يجرحنا عشان نحس بالحزن ممكن فعلاً الدنيا هى اللى تكون مزعلانا.
باحب سلاسة الحكاية عندك ومقصر فى المتابعة بس لما باجى عندك باقعد اقلب فى المدونة :)
تحباتى.

حَـبآيـۃْ.بـטּـدۉڷ يقول...

رَضرَضْ .. تَدوينه فـ الصَّميمْ بجدْ ..:):)

الجُزئِيَّه بتاعت الشُوكولاتهْ .. تُحفهْ ..
عَجبتنِي جداً ..:)

دعاء العطار يقول...

عارفه فيه أغنيه لمصطفى قمر كنت بحبها أوى وكنت بحس دايماً انها على

فكرتنى بجنونك بتقول :

" اللى بحبه عليه حركات ... كمان باين عليه بحالات ... فى عز النوم يصحينى يفكرنى بمره زمان زعل منى ... وأصالح فيه وأحايل فيه ومهما يعمل بموت أنا فيه "

بصى اللى مايستحملكيش فى كل حالاتك بجنونك وقلقك الزايد وغضبك ونكدك

يبقى مابيحبكيش

(: (:

Asmaa Amer يقول...

حلوة اوى اوى
وكلامك فكرنى بنفسى , لما اتضايق باكل شيكولاته
بصراحة دى اول مرة ادخل مدونتك بس ان شاء الله مش هتكون الاخيرة

طالبة مقهورة ..درجة أولى يقول...

شمس النهار..

ومش اي سؤال :)
الحمد لله هقوم اهو اكمل مذاكرة

طالبة مقهورة ..درجة أولى يقول...

الحسيني

ولا يهمك كفايا انك بتسع\ني كل ما تقول ان البوست حلو

ميرسي ع الاطراء ومنور دايما

طالبة مقهورة ..درجة أولى يقول...

الحسيني

ولا يهمك كفايا انك بتسع\ني كل ما تقول ان البوست حلو

ميرسي ع الاطراء ومنور دايما

طالبة مقهورة ..درجة أولى يقول...

بنادولة

ميرسي يا سارورااا
كويس انها عجبتك :)

طالبة مقهورة ..درجة أولى يقول...

دعاء العطار

ايوه يا دودو اللي ميستحملكيش ف اسوأ حالاتك يبقى ميستاهلكيش في احسن حالاتك..

:)

مسمعتش الاغنية ديه قبل كده لما نقعد سوا ابقي سمعيهالي

طالبة مقهورة ..درجة أولى يقول...

Asmaa Amer

ميرسي على زوقك وطبعا نورتيني وهتنوريني كل ما تيجي البلوج بتاعك

Rosa يقول...

روعه بجد
ماشاء الله عليكى :)