كأمنية أخيرة لليوم

الصورة للعزيز شرمب .. أسقع يوم في الشتا اللي فات

اقتداءاً بـ شرمب وشوشو ممكن أعمل نفسي قُطة اسمها

" شاليمو" وارُوح اتمحك ف رجلين الزباين ف الكافيه واللي يُبدي تعاطُفه أنُط على رجليه واتكعبر فاصعب على مخاليق ربنا ويفضلوا يطبطبوا عليا حتى مطلع الفجر..

#آه يا وجعي ياني يامَّه.

#القُطط في نعيم. 

من الجدير بالذِكر

عارف لمّا واحدة زيي.. تبقى مقتنعة بكل الفيزياء الكونية..بكل قوانين الطاقة بقاءها وفناءها وتحوُلها، مقتنعة ومعندهاش مشاكل أبداً مع نظريات اينشتين وبلانك وماكسويل..بتقرا لنيتشه وفي نفس الوقت لمصطفى محمود بدون أي أزمات..

بس عندها مشكلة عملاقة مع تقبُل فكرة "الفقد" بشتى أشكاله اللي اسوأها الموت..مشكلة بتقوم عليها بسبب حلم وحش..أو افتقاد ناس كتير مرة واحدة..أو المرض..أو الصحيان نص الليل والدنيا هدوء تام عشان سامعة صوت البحر بره متجاهلة حقيقة إنها عايشة في وسط القاهرة.. 

يارب.. أنا مش عاوزة حاجة من الدنيا غير حد مش بيمشي.. وأوعدك إني هبقى كويسة معاه.. وهسأل على سو ومروة وعمرو ولولو وجيجي، وهروق الأوضة كل يوم قبل ما انزل الكلية، وهكلم مريم من غير ما أخاف لاحسن تبقى آخر مرة أكلمها.. يارب اوعدك اني مش هتعصب كتير وهاخد الدوا وهبطل مهدئات قبل النوم ومش هقول كلام وحش عن الناس الوحشين مهما كانوا وحشين في النوتبوك ..ويمكن.. يمكن في يوم أعرف أتقبل القدر والحاجات اللي بتحصل واحنا مش مخططين لها .. يارب حد واحد بس مبيمشيش وأنا مش هصحى مخضوضة وخايفة كده..أكيد يعني أنت عارفني وعارف إن ده كلام رجالة =)

.......................

"هى ..كانت أحلى ما ف النهاردة .. كانت عاملة زى الشمس بعد المطر ..كانت فارس احلامى زى ماقالت على نفسها , بتبقى زى الورد وهى مبسوطة .. بحسها أختى وبنتي" 

عزيزتي ميرا/(بغض النظر عن إني دايماً أمورة..وفارس أحلامك بلا منازع..:P )

أنا بحبك اوي، آه والله، لو تعرفي عدد الناس اللي ببقى عاوزة أقول لهم كده ومش بقول لهم، هتقولي عليا عبيطة، وده بيفكرني إننا عايشين ف مجتمع مريض مش بيسمح للغرباء يحضنوا بعض، ولا بيسمح للبنت انها تقول لولد إنها بتحبه أو إنها بتفتقده حتى لو كان العلاقة بينهم لا تتعدى الصداقة !! انا نَفسي بخاف أتفهم غلط، مجتمع بيقمعنا حتى من التعبير عن الحب.. بينما ممكن تقولي إنك بتكرهي أي حد بصوت عالي وتبقي كده شخص نورمال..!!

عارفة..أنا واقعة في حب البنات الواقعين في الحُب..عينيهم وهي منورة وابتسامتهم المكسوفة لما بيفتكروا الحد اللي واقعين في حُبه.. بيبانوا اوي من وسط الزحمة، هالة النور اللي حواليهم بتفضحهم..النهارده لما واحدة جت شدتني من إيدي عشان تحكيلي عن اللي قال لها "بحبك" وهي بتسمعها لأول مرة -بغض النظر عن رد فعلها- انا فرحت اوي حسيت بالحياة حرفياً -الحيــاة- ناس زينا مش بتفكر بالرتم ده في العادي.. يمكن اللي زينا بيفكروا في فرسان الأحلام وبيصدوا أي حد يقرب..أو بيهربوا -زيي- فمش بتمر بيهم اللقطات ديه من بره وهما بيتفرجوا زي النهارده..

عارفة إن البنات دول على أد ما هما أقويا اوي -زي ما ماما دايماً بتقول لي- على أد ما هما غلابة اوي..آه والله.. وده يخلي ليا الحق ألعن أي ولد بيتسبب في إن بنت تزعل أو تعيط زي بنات المترو الصبح..عارفة يا ميرا ، أنا مش مصدقة بالنظريات بتاعتك عن تناسخ الأرواح، ومش عاوزة أحب الحُب اللي هو هو ده..ومع ذلك بفرح اوي لما بلاقي اللي حواليا واقعين في الحُب..I'm extremist i know .

أنا مدينة ليكِ باعتذار عشان الناس اللي بتضايقك بسببي.. هاخد موقف من المتربصين متقلقيش.

وأخيراً عاوزة أقول لك أد ايه أنتِ جميلة يا رفيقتي، أحلمي أحلام حلوة =)

.............................

ومن الجدير بالذكر التدويني- بغض النظر عن نوبات الفزع- إن اليومين دول مُبهجين بزيادة وجامدين (تنين)..بداية بيوم عيد ميلاد مدحت وعفيفي .

من الأجدر بالذكر أيضاً..إن ميم جاب لي اتنين جيلي كولا ونفذ وعوده بأثر رجعي ومفهمش أنا ليه كنت مبسوطة اوي كده! أنا ممتنة.. شكراً يا ميم على كل حاجة..

ومن الجدير بالذكر أيضاً إن أحمد أخويا جاب لي Cinnamon rolls مخصوصين ليا لوحدي..وجيجي ورغرغ عملوا معايا شوبينج واحنا مش معانا فلوس ويتش واز ويرد حقاً :)

متهيألي كنت هكتب أكتر لو مش عارفة إن فيه ناس هتقرا الكلام ده.. متهيألي كنت هتكلم عن ناس مجبتش سيرتهم قبل كده وإني لأول مرة عن عمد بحاول أكسر التلج اللي ما بيني وبين أي حد..

متهيألي لازم افتكر أكلم ال 11 حد اللي عددهم طلع أكتر..واللي للأسف نمت قبل ما أكلمهم .

متهيألي لازم اقوم اصلي الفجر وانام عشان عندي بكرة محاضرات.

....................

على كل حال..أنا سعيدة الحمد لله.. وليذهب العالم للجحيم .

.

Serenity

حلمت امبارح بغزالة صغيرة ، ممكن نربيها مع الفيل والقرد والزرافة ، ميم مرة قال لي إنه سأل فعلياً على الزرافة وعرف إنها غالية جداً وعاوزة رعاية ، وبذكائي استنبطت انها هتحتاج سقف عالي وجزر كتير ، وبالنسبة للقرد فالموضوع بسيط يعني ، والفيل ، ممكن أجيب واحد إيجار لما اروح الهند ، اه انا هروح الهند في يوم ، وهروح نفس الأماكن اللي إليزابيث جيلبرت راحتها ، وأكتب كتاب أكتر عظمة منها كمان.. يدوبك على قدي :)

بقالي تقريبا كام أسبوع بدور ف الصور عندي عشان اشوف أحلى صورة ليا لوحدي ، أو اكتر صورة بحبها وبرتاح لي فيها ، ولقيتها أخيراً ، كنت بحتفل بأكتر حاجة بحبها ، كنت حاسة اني بنتمي هناك اوي ، كنت مبسوطة ، ونور صورتني وانا مش واخدة بالي ، نور غاوية تصوير ، ومتهيألي هعلمها في الاجازة ديه كل اللي اعرفه ونروح ووركشوبس سوا..نور محتجاني جمبها شوية كتير ..بالمناسبة يارب افتكر اجيبلها عيد ميلادها الجاي هامستر من معرض الزهور اللي مش عارفة بدأ ولا لسه ،

 وأعرض على ميرا إننا نعمل صوبة نزرع فيها توليب ونبيعه خصوصاً بعد ما عرفنا سعر الوردة الواحدة منهم (تفكير مادي حقير) ، أنا معرفتش ليه بالذات الوردة ديه مميزة كده! ، نفسي اشتغل في محل ورد اوي ، مش يبقى بتاعي بس اعتقد ده من أكتر الأماكن اللي بشوف فيها بهجة .

 هو انا لو عرضت على حد اشتغل في مكان ببلاش هيرضوا؟ عشان لو ينفع ، هروح اقول لميدو واشتغل معاه يوم في الكافيه ..

ابتسامة عريضة ثم...ميدو وشرمب وحشوني اوي..هو ليه انا كـ بنت مينفعش اروح اقول لولد انه وحشني ! اعتقد الناس هتفهم غلط ، بس انا الناس بتوحشني ، عادي يعني ، نرمين ضحكت وقالت لي انتِ جميلة في سيلانترو المرة قبل الأخيرة :)..اها انا جميلة يا نرمين ، وقوية ، ولازم اعرف طريق بيتك الجديد واجيبلك حاجة تفرحك ، رضوى جابت لي شوكولاته بالنعناع وايس كريم وانا نسيت اديها الكتب والحاجة التانية (احسن برضه) عشان اشوفها تاني قريب ونشرب قهوة سوا في صوفي غالبا ، القهوة ديه اختراع عبقري اه وربنا...

 

لسه بحب سورة مريم ، بقف كل مرة عند نفس الحتة واتخيل مريم في أكتر وقت كانت بتتألم فيه ولوحدها والناس كلهم شايفنها متستحقش الحياة ، وهي معندهاش غير ربنا ، وبتمنى لو كنت هناك أمسك ايديها وأقولها انتِ مش لوحدك ..

عندي 3 ابتسم واحدة لرضوى وواحدة لحد محتاجها اوي ، وواحدة ليا :)

هو ليه ميم ويحيي كانوا خايفيين اوي لما عرفوا ان نتيجتي طلعت..منظرنا كان نكتة ، احمد بيقول لي ان مش ده الموقع وبياخد اللاب مني ، ميم بيمليني الرقم السري ، وانا في مرحلة انكار تام لأني مش مستعدة نفسياً ، متأهبتش نفسياً لأن محدش قال لي عشان افكر في احتمالية حصول حاجة زي كده في يوم زي ده..حسيت إن مخاوفهم اتجمعت في لحظة ما قالوا ان النتيجة بتاعت اتصالات جت..

انا بحب الناس بتوع استب اوي ، وبدأت اتضايق لما بلاقي حد بيقلدنا او بيسرق افكارنا ..نفسي أحكي عنهم واحد واحد بس ده هيتطلب المزيد من البوستات ، كفاياني ذكر إن عندي اتنين اخوات منهم حرفياً ميم وميرا وده يستدعي اني اشكر عفيفي على انه عمل لهم accept في كوميتي الاتش ار من الاول ...انت .كويس يا عفيفي

صفاء قررت تحكيلي عن فلسطين ، صفاء من خان يونس ، جمب غزة ، هو انا عمري ما قلت في البلوج اني مش بحب فكرة التطبيع  بما اني مبناقش القضايا ديه صح؟ طيب مفيش حاجة اسمها تطبيع في قاموسي كراء ، و مقلتش ان جدتي (خالة بابا) عايشة في قطاع غزة بس منعرفش عنها حاجة هي وأولادها.. نفسي اسافر هناك وازورهم من باب التلكيك..

النهارده أنا معنديش حُفرة ، الحفرة اتقفلت من ساعة ما سمعت ندى امبارح ، النهارده أنا حاسة بالسلام الداخلي كما لم يحدث من مدة طويلة..

راء..أنتِ جامدة تنين #Motivation

Another year has gone by..

هكتب عشان النهارده آخر يوم في السنة ، عشان محتاجة أفتكر كل لحظة حلوة ، وعشان البوست اللي فات ينزل تحت فمحدش يقراه كتير وبالتالي ميفضلش آخر بوست ف المدونة كئيب...

هكتب عن مواقف حصلت في السنة دون الاستعانة بالنوت بوك حيث تفاصيل التفاصيل ، مش مهم تكون حصلت ليا ، مش مهم تكون حصلت أصلاً ، مش مهم أي حاجة....بس ده هيبقى أطول بوست في السنة دون مراعاة ترتيب زمني ، زي ما هفتكر زي ما هيتكتب وبدون تعديل.

............

TOBLERONE

 
أول مرة دعاء جابتهالي من دبي ، ولما رجعوا من سفرية اسكندرية وكانوا سابيبني لوحدي ، إدتهالي كهدية لمصالحتي ولو إني مكنتش متضايقة في الأساس ، مقدرتش أقول إني محبتهاش بس محستش إنها نوعي المفضل من الشوكولا...

تاني مرة وبعد المرة ديه بمدة قصيرة جداً ، جاتلي هدية وأنا قاعدة في كافيهي المفضل في وسط البلد ، واللي جابهالي قعد أكلها معايا ووافقت ، بغض النظر عن خرافاتي اللي بتقول إن مينفعش تاكل شوكولاته ادام حد لأن ده بيخليك تقع في حُبه بدون مبررات وبيأثر على مركز العاطفة عند الجنس الرقيق (اللي انا مش منهم)
من الواضح إن فكرة حد يجيبلك شوكولا ساعتها كانت أهم من النظريات اللي متجربة ع الفيران. انبسطت جداً واحتفظت بالطرف المثلث منها في مكان مش فاكراه .
من ساعتها وأنا متعرضتش للنوع ده لأني نادراً لما بقف في السوبر ماركت ، ولو وقفت مش هلاقيه غير في ماركت كبير ، فتعايشت لحد ما لاقيتها امبارح جبت 3 منها ليا انا وسو وجيجي..ولما كلتها لوحدي اكتشفت اني برضه مش بحبها وأنا لوحدي ، تخيل أنت سخرية القدر في عز الاكتئاب تكتشف إنك مش بتحب الشوكولا.

...........

أفتكرت جواب كان مفروض أوصله لواحدة صاحبتي موصلهاش لحد دلوقتي ، احتكرته عشان عجبني واحتفظت بيه ، (كم أنا شخص دنيء )، بس هي على كل حال مكنتش في الحالة اللي تؤهلها لقراية الجواب ده ،لما تجي لي هبقى
أوريهولها عشان الأمانة العلمية وأقولها إني سرقته ، الجواب كان فيه :

"زمان كان فيه راجل اسمه شكسبير ، كان بيقول الآتي: دُر إلى اليمين يأخذك دوار. ودُر إلى اليسار يمحو دواراً دوار" .
أول ما قريت الرسالة افتكرت الــ Eqilibrium في الاستاتيكا والـ structure وسألت بكل سذاجة يعني اللي هيلف يمين وبعدين شمال مش هيحس إنه دايخ على اساس ان المركبتين بيلاشوا بعض....!

بيتهيألي مش لازم أقول رد فعل اللي أدامي كان ايه في تلك اللحظة حفاظاً على بريستيجي :D

وآخر الرسالة كان بيقول " أنتِ قوية كفايا عشان تعدي الأزمة ،واحنا موجودين عشان المساعدة دايماً".

هو أنا عادي لو أخدت الكلام ده على نفسي برغم إني سارقة الجواب وإن مناسبته مختلفة وكل الحاجات ديه ، صح؟ هعتبر إنه عادي وهكمل البوست :)

............

-Can you be my home really?

-I already am...

-nfsk f aih?

-nfsy el sa3a to2af and it did already, nfsy nfdl m3a b3d ,nb2a mbsoteen forever ,w a7sesk eny el home bta3k lma t7tagi home..

والحاجات اللي زي ديه بتحسسك أد ايه أنتَ لقيط معنوياً  :)

............

حلم التمرد الأليكساوي :)

............

-طيب بصي أنا معنديش أخوات بنات ، ومعرفش مفروض ايه يتعمل أو أساعدك في ايه بالظبط ، ومش هسألك لوعاوزاني في أي حاجة لأن أنا في البيت اللي جمبك وزيي زي داليا ، أنا بس نفسي أعرف أنتِ حاسة بايه دلوقتي ،
بعد ما فضلتي تحبيه 5 سنين ، فجأة كده هيبقى ادام الدنيا كلها الراجل بتاعك !! أنا نفسي مش مستوعبة !!

-مكنتش أعرف إنك عارفة الموضوع من زمان كده
 أقولك أنا مش عارفة بالظبط هو احساس غريب اوي ! إني مش هستنى تاني خلاص..هنبطل نقول نبعد ونحاول نشوف حياتنا عشان نرضي أهلنا وبعدها نرجع تاني .

-فاهماكي كأن خلاص الحرب خلصت ، بس أنا مش فاهمة ليه موافقتيش ع الولد الأمريكاني وخلصتي ، أنتِ بتتدبسي تدبيسة محترمة واسأليني أنا..

-خلاص بقى اتدبست واللي حصل حصل ...

..................

سوري لكل واحد عملت فيه كده السنة ديه .. بجد كنت بروْح اضحك
واحس اني مشفقة عليكم اوي !  :D

وده اللي بيحصل When you mess with the wrong person

..........

*تعويذة طرد الاشباح*
النسكافيه في المج البُني ، فيروز ، تشيكن ماكدو ،وفي لحظات الغباء " يا ميدووووو" ، سكر مكعبات ، ومش هانعيط... :)

أجب عن الأسئلة التالية (هم 4 اسئلة فقط واجباري)...
والنتيجة في كل مرة إذن كل حاجة كويسة ، واللي مش كويس دلوقتي هيبقى كويس كمان شوية.

*شاركيني قهوة الصبح ولا تدفني نفسك في أشجانها..
بس ده نسكافيه عشان القهوة بتجيبلي هبوط ، لا مؤاخذة يا حاج نزار :D

.............

توابع قراءة قصيدة بلقيس

نون : هو لسه فى من نزار ده ولا خلصوا ؟

راء : تؤ الفصيلة ديه انقرضت مع الديناصورات يا نانس...ميكونش عندك فكرة

- مش يمكن يكون فيه لسه من الفصيلة دى ؟
- يابنتي صدقيني خدي مني الخلاصة...الفصيلة الجديدة كلها عندها Fatal Erorrs

-امممم طب نعمل ايه بقى بالفصيلة الموجودة دى ؟
-معنديش حلول، عندي افكار سادية تهدف للتخلص منهم جميعاً ،وبعدين نجيب قصايد لدرويش ونزار ونقعد نقراها على أرواحهم بعد ما تتم عملية الابادة..
- اتغيرتى يا رضوى وبقيتى عنيفة بس مادام الموضوع فيه قراءة قصائد نزار ودرويش أبقى معاكى طبعا.
- بس انتي بتيجي ف الجد وبتطيري زي ما نزار عمل ف القصيدة

- لأ الا الموضوع ده .. أنا دايسة معاكى فيه بس طب سيبى أخويا و أخوكى كمان وكفاية كده ،أصلهم متربيبن و كويسين يعنى.

-هههههههه يا حونين ، بقولك اخطاء مميتة يا نانسي ،يعني دكتور بينسى الفوطة والمقص جوا معدة المريض الغلبان اللي نايم ع الترابيزة ف ال OR ...كلهم عندهم عيب ف الكتالوج يا أمي..


...........

هاتبقي مهندسة اتصالات ناجحة اوي، صدقيني.
ولو فقدتي الأمل هتلاقيني جمبك عشان أشحنك بالأمل من جديد...

:)
:)
:)

............

وحلم كمان جديد..يوم واحد بس صد رد كده على طول :)

"عاوز آخدك معايا كل مشاويري "

"وأنا عاوزة أروح معاك كل مشاويرك.."
............

عزيزي (أقصد كلمة أخرى)/

لأن ما بيننا تخطى حدود الكلمات ، ولأنني لا أمتلك ما يكفي للتعبير ، وإن جاءت نهاية الكون اليوم أو الغد أو في اللحظة المقبلة فقد حصلت على ما أتمنى من السعادة بوجودك فقط..
أشكرك لإعارتي (نضارتك) حينما كنت ولازلت وستظل صديقي ، أشكرك على تواجدك ، وأشكرك على إيجادي في أحلك الأوقات وإنقاذي من الوقوع في دائرة الحزن..
ياعزيزي(تعلم ما أقصد)..كن دائماً الأروع والأعظم فهذا هو قدرك

بالافرنجي يعني عشان العربي بتاعك تعبان
Je crois en tois ... الافرنجي بتاعي أنا كمان تعبان كفايا كده

(اهداء على كتاب عندي محدش أخده :) )

................

بدون شك كانت بتعزفله Requiem for a dream 

المجد للكمنجات..والمزيكا العبقرية ..
والنظرات اللي بتخترقك وتدخل على قلبك عِدل..

............

خلينا نتكلم شوية عن كتابنا أبجدية ...اللي بجد فخورة إني كنت من ضمن كتابه ، واللي معرفش ازاي مفتخرتش بيه كفايا ، يمكن عشان تدوينتي سيس شوية :)
بس لازلت فخورة وبفتخر كل ما بقرأ اهداءات الناس ليا فيه :)

(العزيزة رضوى /
ابداع عفوي بداية صفحة جديدة في حياتك وحياتنا ،
وإذا حسن البدء ، حسن الختام
"كوني كما تبقين " لأنك تستحقين الأفضل...
داليا رحاب )

(رضوى...بونبونتي ، بنت قلبي
والبسكوتة اللي بتخليني متفائلة لما البيبان بتتسد...
يارب تلاقي بيت أحلامك
باسنت خطاب )

(فرصة سعيدة يا رضوى وعلى فكرة الصغيرة اللي بتكون على اسم الاكبر منها..
يعني انتِ اللي اسمك على اسمي.
استمري ...التدوينة على صغرها محسوسة ، ربنا يوفقك وتعرفي أنتِ عاوزة ايه بدري
رضوى الشامي )

(إلى خليفتي في الهندسة وما إلى ذلك ...
love you sis
جهاد نجيب )


(أتمنى أن نراك قريباً في فلسطين
ونعزمك على طبق مقلوبة غزاوي
بنكهة الحرية في بلادنا
عُلا )

...............

السنة ديه مسكت عضو علاقات عامة خارجية في STP ، وأتقبلت في أول انترفيو في حياتي ،شوفت عالم جديد مكنتش أعرف إنه موجود ، والدنيا طلعت واسع ، أوسع بكتير من خرم الأبرة اللي كنت شايفاها منه ،أتكلمت مع VIPs كتير مكنتش متخيلة إنهم بجد ، قعدت وسط شباب STP وهما سايبين بيتهم قبل العيد بيوم عشان يخلصوا الشغل اللي وراهم وفطرنا سوا يوم عرفات يوميها مكنش نفسي أروَّح أصلاً ، رُحت ال CIC لوحدي (ومتهتش) ، قابلت أبو الفتوح وأتكلمت معاه فيس تو فيس ، عشت مواقف طريفة أغلبها كنت بلاقي معتز جمبي بيقولي (رضوى افتكري اللحظة ديه بكرة هتفطسي على نفسك من الضحك لما تعدي في نفس المكان) ، كلمت أحمد يونس وبعتله مسجات السنين، VIP بعت لي على تويتر وعشان مبدخلش على تويتر مشوفتش الرسالة غير بعدها بشهر وكنا محتاجينه جداً وطبعاً طيرته أنا (محدش يقول لمعتز بقى) :D
ياسين اللي مش بيشكر في شغل حد غير لما بيشتغل فعلاً بعت لي بعد آخر ايفنت عشان يقول لي إني نجحت وجزاكي الله خيراً وعملت شغل حلو اوي وانه كان شايفني بتحرك وبعمل أي حاجة ممكن تتعمل حتى لو مكنتش تبع شغلي لمجرد إن الشكل العام يطلع كويس..
السنة ديه اكتشفت إني ممكن أبقى أي حاجة ومش كل حاجة عشان كده عندي القابلية للاختيار ، وأنا اخترت مبقاش PR تاني :)
بس ده ميمنعش إي بحب STP ومخلصة جداً ليها .. السنة الجاية أنا Juniors ،هناك واثقة إني هلاقيني وهبقى من العظماء بتوعها :)

............

السنة ديه كمان دخلت K-vector المكان اللي كان نفسي ادخله بس حاجة كانت مأخراني عن الخطوة ديه ، بقيت Fundraiser  ، رائف الهيد بتاعي وده محببني جداً في الحوار عشان عارفة دماغه في اختيار الناس وعشان عارفة انه هيتفهم ظروفي وده هيشجعني اشتغل واعمل كل جهدي ، متأكدة إني هستفيد اكتر كمان من الــ BR ومش عارفة الموضوع هينتهي لإيه بس اديني فيها :)

.............

كان نفسي اعمل مينشن للناس كلها بس كنت واثقة إن بياعة المناديل اللي بتقعد على باب المترو معندهاش أكونت على الفيسبوك وانا ممتنة لصباح الخير اللي بتقولهالي كل ما اشتري منها مناديل..

السنة ديه عرفت ناس غاليين اوي على قلبي ، خسرت ناس تانيين لأسباب معرفهاش ،وفيه ناس كملوا معايا زي السنة اللي فاتت واللي قبلها وقبلها ، اكتشفت ان فيه ناس بيغيبوا عنك مليون سنة ضوئية وترجع تلاقيهم زي ما هم بالظبط مهما حياتهم اتغيرت ، وناس تانيين تفتكر إنك خسرتهم بس تآلف أرواحكم بيخليكم ترجعوا لبعض من تاني وتنسوا كل الخلافات ، السنة ديه اتعلمت إن فيه ناس موجودة عشان تساعد غيرها بس ، وإن فيه ناس بتنزل وتتمرمط مرمطة السنين عشان 500 واحد يقعدوا مرتاحين ويتعلموا حاجات محترمة (EPRs )ويل ريلات :)

والسنة دي اتعلمت من ناس اني لازم اجدد نيتي كل شوية ، وافكر في كل تصرف عشان الكون بيرمي اشاراته واحنا اللي بنفسرها او نتجاهلها ، السنة ديه شوفت العظمة بعينيا ، واتأكدت إن مفيش حاجة اسمها ملل العالم مليان احنا اللي حابسين نفسنا في صندوق ازاز وفاكرين اننا شايفين الدنيا...

السنة ديه أكتشفت رضوى ، شوفتها بتكبر وبتكتشف العالم الكبير ، كنت فخورة بيها للحظات كتير ، وكرهت تصرفاتها للحظات تانية ، كان نفسي اشوفها احسن من كده ،كان نفسي آخد بالي من أختي الصغيرة "نور" وأدلها ع الطريق وقصرت معاها اوي..

كان نفسي أقرب من ربنا أكتر وأحبه زي م المفروض يكون..في المجمل انا فخورة وممتنة لكل حاجة حصلت او محصلتش .. ممتنة ليك يا ربنا عشان ادتني الفرص ديه كلها، عشان استخدمتني ومش أي حد تاني غيري، عشان لسه بتمسك ايدي وحتى لو مكنتش استاهل أو كنت مش كويسة كفايا...
وأخيراً عشان ادتني ناس أجبروني أكتب البوست ده وأجبروني اقاوم الاكتئاب ولو حتى نسيوا يقولولي إني حتى وشكلي بشع من كتر العياط هفضل أمورة :)

كمان ممتنة لـ عمرو عشان هيبعتلي هدايا النهارده مع سانتا بما اني مش هحتفل عشان امتحان بكرة(مفيش احتفال ينفع من غير اللي بنحبهم مكنتش هحتفل ع كل حال)

سلام يا 2012 بحلوك وبمُرك وبنهاية العالم اللي جت والعالم اللي بدأ من جديد :)

آه والسنة ديه جبت الكاميرا خلينا مننساش النقطة ديه فيري ايمبورتنت

..........

And that pain you feel?
That's life.
The confusion and fear?
That's there to remind you, that somewhere out there is something better,
and that something is worth fighting for.

..........

إلى أحمد خالد الجمال : من سنة زي دلوقتي قلت لي اكتبي بوست طويل

وعدت سنة اهو ولسه بقول نفس الكلام زي السنة اللي فاتت وكتبت البوست بعد 365 يوم إلا ربع..

خالصين وملكش حاجة تاني عندي :D

دراما كوين

تمر هناك في الخامسة من كل يوم فتترك رائحتك في المكان، أعبره من جديد في اليوم التالي في نفس التوقيت، تعبرني بقوة وكأنك هنا، يدفعني شيءٌ ما إلى الابتسام المُعلن بلا أسباب سوى أن رائحتك مرت هنا في بُعد زمني مختلف .أُفكر في كمْ الكلمات التي يمكن قولها و"وشوشة" ذاكرة المكان علّك تسمعها حينما تمر من جديد فتتعثر بكلماتي وتشعُر بأنك تفتقدني أيضاً لوهلة في زحام يومك...

..........

ولما سألتها عن إحساسها ناحيته قالتلي :

-حاسة إن بيتي معاه ، مش حاسه إن هنا بيتي anymore !!

-حاساه وطنك..

-بالظبط ، مش مهم أنا فين مادام هو هناك.

-عشان معاه جزء من روحك.
  
..........

في حياتي السابقة كنتُ أميرة لملكين من ملوك الرومان ، أمتلك الكثير من حدائق الياسمين والتوت دون ذكر الأحذية والفساتين،وهناك كما تعلم  الخمسمائة وصيفة دروس الرقص والبيانو والإتيكيت، في حياتك الأخرى -أقصد السابقة- كنت زعيماً لأحد التنظيمات السرية التي تهدد أمن المملكة وذراعك اليمنى هو الفتى قوي البنية الذي يصر على تدمير حدائق ياسميني قبل بزوغ الفجر في كل يوم، عم السلام المملكة حتى بدأت بوضع خطة قلبك للحكم، جمعت أتباعك الستة ،كنت أنت السابع والقائد كما ذكرت ، وضعت خطتك في الهجوم على القصر للتخلص من الملكين وأسر الأميرة - وهي أنا - ، وضعت حساباتك بدقة متناهية حتى أتت ساعة الصفر و صممت على الولوج للقصر، أشتمت المملكة الأخبار بعدما أُلقي القبض على ذراعك الأيمن، وحينما علمنا بموعد قدومك ، أُمر الحرس بالقبض عليك وعدم إنتظار إعدامك بل إلقائك من نافذة القصر للتماسيح الجائعة بالأسفل ، لم تنجو يا عزيزي للأسف في الحياة السابقة.
لذا يتوجب عليك الشعور بالامتنان لأن فرصة الحياة الحالية أقل صعوبة ، ولأن روما الامبراطورية انتهت ، وعلي الشعور بالامتنان لأنك لا تود إيقاعي في الأسر من جديد، أنت لا تخطط لذلك أليس كذلك؟


.........

وستظل مشكلتي الأبدية إني مش بعرف أقول كل اللي عندي ، خصوصاً لو اللي قدامي غضبان مني وبيزعق

مش بعرف أنطق بــ ولا حرف من اللي حاساه أو واحدة من المليون فكرة اللي بفكر فيها أبداً !!

فبتأتأ وعنيا بتدمع وكل طاقتي بتتركز في جملة واحدة ، (راء،مش هنعيط أدام حد).


.........

يبدو أنني أتيت متأخرة، حينما نفذت كل الحروف وأصبحت الأقوال كلها إكليشيهات مكررة، أتيت متأخرة لألعن الشاعرات اللاتي قلن كل ما أود قوله إليك وتركنني في حيرة من أمري.
على الأغلب لن تتفهم حينما أخبرك بأنني " أفتقدك " أو أن "لا شيءَ يعادلُ قربَك " أو "أُحبك " ستقول عني بائسة ومبتذلة تروي ما قيل في مئات القصص الأخرى ؛ لذلك أنغمس في البحث عن تركيبات جديدة وأفشل الكثير من المرات .
فاستمر بلعن كل من باح بتلك الكلمات قبلي، وتركني أحدق بصورك في خيالي وبالورقة البيضاء..

...........

#سيلانترو مساحة
 

-ايه ده بجد ؟أنا أخدت بالي من وسط كلامه بس تعالي هنا احكيلي...

-مفيش ، خلاني أشوف الدنيا بشكل مختلف ، من غيره مكنش زماني واقفة على رجلي دلوقتي ، سلفني نضارته لمَّا كان نظري ضعيف جداً ، كان هنا ، محدش بينسى اللي بيفضلوا هنا في حين إن العالم كله بيتبخر من حوالينا.. أنتِ عارفة الباقي.

...........

المجد كل المجد للشيكولاته اللي بتقدر تصلح أي حاجة خربانة في الكون .

.
.
.
 

المسكنات والوجع والكلام والصمت

أمس لم أنم ، لقد قُتلت ، عشر ساعات متصلة بلا استيقاظ، إنها إحدى المعجزات أن أغفو تلك الفترة الطويلة (بالنسبة لي)، وأتحمل استيقاظي اليوم التالي ببعض الهالات حول عيني الناتجة من كثرة النوم والخمول المصاحب لتخطي فترة نومي القصوى.
يجب علي -إحقاقاً للحق- شُكر للأدوية المهدئة للأعصاب التي ساعدت على تلك المعجزة ، أتناولها فلا اتحمل أكثر من خمسة دقائق وأنا في وعيي ..لا بأس بذلك احتجت للراحة .

يعتقد بعض العلماء أن الأحلام أغلبها عوادم ناتجة من خبرات أو مشكلات حياتية، فرويد قام بتفسير الأحلام كمصادر لرغباتنا التي تسكن اللاوعي.

من غير الجدير بالذكر أنني عادةً لا أتذكر احلامي ولكن على غير العادة قبل يومين في حُلم قصير قابلت أشخاص عابرون في حياتي، تظاهرت بأنني لا أعرفهم، لم يتعرفوا عليّ لكنهم شعروا بأنها أنا فركضت قبل أن يسألوني عن حقيقتي أو تشي بي عيني وملامحي كالعادة، تكثر الممرات في أحلامي وأركض دائماً فيها وأنا لا أعلم إلى أي الطرق تؤدي ، أمَّا ليلة أمس حلمت أنني أبحث عن دواء ما في جميع الأماكن الممكنة، انتهيت من عدة صيدليات فتوجهت لمراكز التسوق، كان دواءاً مسكناً معروفاً بالنسبة لي، وحينما وجدته في أحد محال الملابس أكتشفت أنني لا أمتلك أموالاً لشرائه...فأصابتني الخيبة وتسرب اليأس لي في الحلم حتى انتهى!

استيقظت بعدها من الحُلم بألم ظهري لا يطاق صاحبني منذ عدة أيام وكالعادة أتجاهله ولا أشكو..علمت أن اليوم يجب أن أفعل ذلك قبل أن يزداد الوضع سوءاً، وقد كان.

-المسكنات الكتير مش كويسة علشانك .

تخبرني أمي فأباغتها في عناد وأنا أتناول مسكن آخر:

-ولا الوجع الكتير..

يؤلمها حالي وعنادي في الوقت ذاته، أمي لا تحب الشكوى وقد تعلمت منها هذا الأمر، تطَلب الأمر منها فرمان فوري بالذهاب للطبيب، لم أستطع العناد لأكثر من ذلك فخضعت...وقضينا ساعتين أحاول تجاهل النصائح المتعلقة باهتمامي بنفسي من جميع الجهات وتمنيت في داخلي ألا أكون متمادية في النصح بهذا الشكل حينما أكبُر.

.......

لحظة ،الحياة بتفاصيلها -من البشر والأماكن- يفصل بينها وبين الموت لحظة ، كذلك كل ما يفصل بين المواساة في الألم وبين السخرية من مشاعرنا...كلمة

you should put that in mind my friend.

.......

ما الذي أفعله هنا...يا الله ، اتبخر من جديد

 .......
 

All we need time management as he said
he's older than me
he knows better
but he likes what he's doing
that's the point 

.......

عن الكلمتين اللي اتقالولي وكنت محتاجاهم:

* كنت بضحك عليه يوم الـ opening لمَّا قعدته أدام القلعة بالبدلة على الرصيف (أو هو اللي قعدني) ،عشان يحاول يكلمني ويقنعني ممشيش،

 فجأة بدون مقدمات قال لي : رضوى...أنتِ من العظماء 


*والآخر معرفوش بالظبط بس ربنا بعتهولي عشان أعرف فين المشكلة ،ببساطة قال لي : متقوليش على الكتابة أقلهم أهمية مادام بتخليكي مبسوطة ، مادام بتبسطك فهي مهمة لروحك وأكترهم أهمية كمان.
مقاليش أبطل أكتب مع إن ده الحل اللي كنت بقوله لنفسي، وكمل كلامه بكل ثقة:  مفيش حاجة باظت ،كل حاجة كويسة ...محتاجة شوية ترتيب للفوضى وبس


تنهيييييييدة ، مجدداً أنا ممتنة للإشارات والعلامات الكونية ، الحمد لله

بصمتي الأولى

بوست شخصي عن إنجازات صغيرة مش هتهم حد...:)

أدون لأجلي كي لا أنسى فقط..متضيعش وقتك هنا

أنتِ إزاي عظيمة كده؟

من غيرك مكنتش بقيت أنا ،ومكنش حد جاب سيرتي في مدرستي القديمة بسبب إنجازات أنتِ المحرك ليها،

أنتِ اللي آمنتِ بيا وأنا ولا حاجة ، مجرد بنت عادية محولة من مدرسة تانية ، متعرفش أي حاجة عن قدراتها بس كانت عارفة إنها بتحب الرياضة و مادة التكنولوجيا عشان بتخليها تفكر وتخترع حاجات ، وبعدين عملت أسانسير بمجهودها الذاتي ومكنش فيه حد بيساعدها لحد ما أنتِ جيتي وشوفتي إنها استثنائية ! مكنتش عارفة إنها استثنائية خالص الحقيقة !.بعدها تبنيتي البنت ديه ودخلتيها مسابقات واتحادات وكنتِ بتحمسيها طول الخط حتى بعد ما مشيت ومبقاش ليكي مصلحة ، بيني وبينك هي طول عمرها بتحتاج حد يحمسها عشان بتبرد بسرعة من الإحباطات وأنتِ كنتِ الأروع في الموضوع ده ..ومن هنا بدأت الحدوتة ، حدوتة الشخص اللي بقت عليه دلوقتي.

ممتنة ليكِ والله ممتنة للأبد وسأظل كده لحد ما أموت ، أنتِ شوفتيني وأنا مبنساش حد بيشوفني ..

...........

 كأنك مش موجود بس لسه فاكرينك وأعمالك اللي سايبها متقدرة ، لسه كلهم فاكرين إنك كنت هنا .

...........

النهارده حققت حلمي ،حسيت إني سيبت بصمة في مكان كنت فيه ، باختصار سوبر ستار بسبب حاجات عملتها من 4 سنين،

أنا فخورة بنفسي بجد..فخورة بأخلاقي ساعتها وربنا ردهالي دلوقتي..

.......... 

كنت فخورة لما قلت ال Talk بتاعتي وايه حلمي، واللي وصلتله لحد دلوقتي ، متخيل إني وقفت وأتكلمت قدام جموع وناس من اليونيسكو واليونيسيف ومديرين كُبار ومخفتش ثانية وأرتجلت كل الكلام كل حرف كنت مؤمنة بيه ، وفجأة لقيت نص المدرسة من كل السنين ملمومة عليا وبيكلموني بحماس ، لاقيت نفس التوهة ونفس الطاقة اللي كانت عندي وقتها..وكاميرات بتصور وكلام وكلام ودفا..كنت دفيانة..وحسيت إني كبيرة اوي..

كنت هطير من السعادة لما بنوتة في إعدادي جت وقالت لي أنا عملت أسانسير زيك...ممكن تساعديني وتقوليلي الموتور أشغله ازاي ، أنا ممكن أوريهولك وتشغليه معايا تاني؟ ساعتها حسيت نفسي كبرت اوي ولما كنت زيها مكنش فيه حد أسأله زي ما هي سألتني ، واتفقنا اني هساعدها..

ده غير البنت اللي جت تكلمني وعينيها دمعت مرتين وكانت بتعيط عشان عاوزة تبقى حاجة بس مش عارفة ايه هو الشيء الــ Unique بتاعها ، أخدت وقت عشان أفهمها إن الدنيا كبيرة وإنها هتلاقي الشيء ده..كان نفسي أحضنها اوي بس حسيت أنه مش ملائم اهمل الناس التانيين اللي واقفين بيكلموني بحماس والتفت لوحدة بس مع انها كانت محتاجاني اوي فسيبتلها رقمي ..

...........

عارف يعني إيه تبقى قدوة لناس في غيابك ، عارف يعني إيه حد يقولك أنا نفسي أبقى زيك ، فتبصله وتقوله لأ ... أنت هتبقى أحسن مني مش زيي..

...........

كانوا ماسكين فيا أنا وآلاء ومش عاوزين يمشوا ، ملحقتش أسلم على بتوع اليونسكو ومكنش فارق معايا اوي بصراحة ، كنت موجودة مع اللي محتاجيني =)

..........

المدرسين اللي لسه فاكرينا وفاكرين الانجازات الصغيرة اللي طلعت كبيرة اوي

وزكريات زكريات زكريات...الكابتشينو اللي لحد دلوقتي مشربناهوش

أول ظُلم بيِّن شوفته في حياتي في المسابقات ، 

وأغنية مايلي سايروس اللي غنيتهالهم في امتحان الإنجلش في المسابقة عشان اثبتلهم استخدام other

اول امتحان رياضة اجيب فيه درجة وحشة وأقرر إني هنجح فيها اوي وابقى شاطرة.

أول واحدة قالت لي أنتِ هتدخلي هندسة .

أول تيم وورك اشتغل معاه وأثق فيه ونشيل بعض بجد ، كنا الفريق الأعظم في تاريخي الطويل مع التيم وورك.

دفا ودفا ودفا
صور وأسماء وأرقام تليفونات وإيميلات ..تحذيرات من توزيع رقمي الشخصي، بس مهمنيش ..عيون منورة وفرحانة

أنا مبسوطة ومش عارفة أبطل ابتسم لدرجة إن عضلات وشي وجعتني =)

أنا سبْت بصمة في مكان كنت فيه.. أنا نجحت بجد !! أنا كويسة الحمد لله الحمد لله الحمد لله...

...........

وده هيؤدي لقرار عظيم السنة الجاية..انا لازم أدخل الــ Juniors ، عشان أبقى الــ Mentor لناس أكتر من كده ، أبقى الحد اللي كنت محتاجاه لما كنت زيهم بس مكنتش محظوظة عشان ألاقي الحد ده...

............

كتبت المشاعر العظيمة ديه : رضوى طارق ، الأوفر حظاً ونصيباً في هذا الكون.

الحمد لله =)

صور..

 

حاولت أتكلم ، خصوصاً إن فيه كلام كتير أتكلم عنه ،بس سكت 

...وقُلت سيبي الصور هي اللي تتكلم

شكراً..عشان كنت دافي والتكييف مخلانيش بردانة المرة ديه 

وشكراً على الحكايات ، وعلى إنك سبتنا نعمل كل حاجة إلا المذاكرة 

وديه المهمة الأساسية اللي جينالك علشانها أصلاً.

#سيلانترو معادي

__________________

 #Cupcakes can do magic وكما تعلم

 :)

_________________________________

 

وكل ما بعدي على محل فضة 

بحط إيدي على رقبتي أتأكد إن تعويذة أحمد وسارة لسه معايا..وابتسم في سري
إذن أنا في أمان ..

#...ممتنة :)

_____________________

  

كان هَبل في أول اجتماع بخط وحش لأني كنت ساندة على رجلي

وطلع كلام كبير اوي....واللي قاله كان أكتر حد محتاجه في اللحظة اللي حطيتهاله فيها

#STP

___________________

 

 

 وكنا بنحضن إيدين بعض وبنغني سوا بصوت كل ما أذكره إنه كان وحش اوي ..

"حُــــــــــــريَّة"

#وكأنه امبارح

__________________

 

أنا عملت داتا شييت للروبوت ، متخيل أنت 4 موتورز ، بس محدش استخدمها ، 

الروبوت مات أو انتحر ،مش هنعترض اسمه قضاء وقدر :)

 

#ديوان_الجامعة

______________________

أوعدكم هعمل كل اللي ممكن أعمله عشان أرد جزء من إحساس الوطن اللي بتدهوني

 #STP

______________________

فيروز والبرد ،كاميرا وكوباية لبن ،تورتة شوكولا وملبس ، لوحدي مش وحش أبداً الصبح

#تأمُل

_____________________

 هو برغم إن كل حاجة باعثة على البكاء والكون بيعاندني واللي بحبهم كمان..أنا بقاوم والله بكل طاقتي

بفتكر اللي لسّه ماسكين فيا..وبنسى المليون حاجة اللي بتوجع

بفتكر تعليق ضحى في البوست الأخير وسارة ورامي وسارة دراز..بفتكر نور وهي بتصحيني بالليل ولما قعدنا نرغي وأخويا وهو مبسوط ، ومعتز وهو فرحان بيا وبيقول لي ازاي محدش فكر الفكرة ديه قبل كده؟..أنتِ مُبهرة ، ومحمود اللي بقى المنتور بتاعي فعلياً كل ما بتوه بلاقي ربنا بعتهولي...بحاول افتكر ميرا ورنا اللي بتضحك ورفيف وهي مخنوقة م الانترفيو ، ويوم الوقفة لما كُنت البنت الوحيدة وسطهم بس بمليون راجل ،وكتاب أحمد خالد توفيق ، وإن ربنا بيحبني...اوي

وده كفيل اني اتماسك على الأقل لحد الصبح ما يطلع.