22

زي ما أعلنت عن الكتاب قبل ما ينزل..بعلن عنه بعد ما نزل

لابد من التسييح لأقراننا الأعزاء..ولأخت صغيورة بس كبيرة اوي..ومهمة للغاية
..

يوم الخميس إن شاء الله حفل توقيع كتاب إيثار أحمد نور-حواس مستعارة 

عمارة 2 - ممر بهلر- قصر النيل-وسط البلد

طريق الوصول عن طريق محطة مترو السادات او حتى العتبة..اسألوا على ممر بهلر الموضوع سهل جداً لما توصلوالشارع طلعت حرب أو شارع قصر النيل

ولمزيد من التفاصيل..وأرق الأمنيات للكاتبة الرائعة افعصوا هذا اللينك

بالمناسبة الكتاب رائع وصغنتوت برضه..

....................

 اليوم والنشرة النفسية في ملاحيظ صغيورة:

(يوم التلات 27 -9 في 22 ملحوظة)

 الطريق الطويل لا يحتاج سوى فيروز وأفريل لافين عشان نعمل أجدع دماغ-

.

.

. بكره التلامس الجسدي حتى لو غير المتعمد في المترو او الباص بتاع الكلية النهارده-

.

.

حاسة إني عاوزة أقفل على نفسي في أكتر وقت لازم ابقى طبيعية-

.خلينا واقعيين ما أنتِ كده طبيعية

بجد؟؟

....

.

.

.الارهاق لا يلغي أعراض الاكتئاب ولوم النفس-

.

.

واقفة وكل حاجة بتقع حواليا ومش بمسكها..يا ترى مش عارفة امسكها..ولا مش عاوزة؟-

.

.

عندي اقتناع إني هموت منتحرة(ده مش بجد طبعا)ا-

ولكنه لا يمنع سباحة الفكرة داخل عقلي الصغنتوت.

.

.

.محتاجة المذاكرة..مش مصدقة اني بقول كده بس فعلا محتاجة اشغل ذهني عن الناس-

.

.

هو أنا ليه بطرد الكل من حياتي؟-

.

.

محدش فاهم حاجة على فكرة...محدش فاهمني...غيركوا..

هو أنتوا فعلاً فاهمين؟

.

.

عاوزة أعلم نفسي ازاي مسكتش لما حد يتهمني بحاجة وأرد أقول أسبابي..هبقى حادة اوي ساعتها وبقتل اللي قدامي..وأنا بحاول أبطل-

 .ده...وفي نفس الوقت سكوتي بيقتلني

.

.

!!!!هو أنا ليه لازم أبرر موقفي ليهم..طز-

.

.

بحب البهدلة وهدة الحيل...ومستمتعة إني في آخر الدنيا..

.

.

.كلمة واحدة لأربع اشخاص...بحبكوا بجد (من بتاعت رامي بابي)ه-

أنتوا اللي مخليني لسه واقفة على رجلي..علشانكوا بس لسه عندي أمل

.

.

;) شكراً يا ربنا..وزي ما اتفقنا بقى..أنا مش هنسى-

.

.

!!!!!!!!!!!!تواضعي يا رضوى تواضعي تواضعي تواضعي أنتِ أقل من أي حد في الدنيا ديه..اوعي-

.

.

هظبط مواعيدي إن شاء الله بعد كده..ومش هلوم أي حد....ليه ملومش اللي يستاهلوا اللوم طيب؟-

.

.

بحب رقم 22 جداً

.

.

لسه محفظتش سورة مريم غير صفحة ونص...ليه دايماً بقف في نص الطريق للحاجات اللي- 

عاوزاها اوي كده...ليه بهرب مع إني بتدعي إني فايتر؟

.

.

.كل حاجة..كل حاجة بجد..بقت بتخضني...حالة غير طبيعية من الخوف والارتباك...بس مبيبانوش عليا عشان من جوا بس-

.

.

عاوزة أروح السيدة نفيسة وأصلي الفجر........اوي -

.

.

...عاوزة أعيط بحُرقة-

.

.

يارب...بعض السلام..يا الله- 

خبيني..

عارفة أنا نفسي في إيه

نفسي استخبى اوي..نفسي ألعب استغماية لوحدي

أكون انا اللي فيها وانا اللي بدور عليا..

عاوزة أنام ومصحاش تاني..

زي سنو وايت لما أكلت من التفاحة المسحورة

.........

نفسي اقول للناس اللي اعرفهم وبحبهم

كل اللي أنا حساه بس مش عارفة ..مبعرفش اقول حاجة

مبعرفش اعبر عن سعادتي وحبي

بعرف بس اقول اني مجروحة..

طاقة الألم والحزن هيا اللي بتحركني

........

ما تيجي نغني بصوت عالي ونضحك اووووي بهستيريا

نضحك لحد البكا ..بهستيريا لم تُشهد من قبل..

محدش هياخد باله كبيرهم هيقولوا مجانين..

واحنا اتعودنا على كده

........

هما ليه حسسوني اني صغيرة اوي كده..

في يوم هكبر اوي اوي..وهروح ادامهم واقولهم انا كبيرة

بس عمري ما هبقى وحشة

واستغل قدرتي وانتقم..مش شبهي

ممكن بس أقولك كلمة واحدة..

انتي وحشة على فكرة و شبه الساحرة الشريرة :(

.......

بص ياربنا انا مش عارفة طاقتي ع التسامح هتقدر تنسى الظلم ده ولا لأ

انا كان في ايدي قوة ومرضتش اضر حد..

اكتبهالي عندك حاجة كبيرة

عشان انت عارف انا متضايقة اد ايه

ومتكلمتش..

......

أنا عاوزة تعويذة باتروناس

هاري بوتر بالتعويذة ديه بالتحديد..

كان دايماً بيحارب الديمنتور _وده مخلوق سحري بيتغذى على الخوف والحزن _

كل اللي بيتطلبه الأمر

انه يمسك عصايته ويفكر في ذكرى سعيدة

سعيدة اوي..ويقول الكلمات السحرية..ويسيطر ع الديمنتور في ثانية

هوا أنا ليه معنديش عصاية سحرية لحد دلوقتي؟؟

.....

مستنية نجمتي..بقالها كتير غايبة راحت تجيبلي أي حاجة تفرحني

وهترجع الساعة 2 الصبح

مدياني ميعاد وبقالي كام يوم بستناها مبتجيش

مستنياها برضه مش هيأس

خد بالك منها يا قمر..ونورلها طريقها زي ما بنتورلي طريقي

......

مبسوطة عشان انت مبسوط

وعارفة انك متشوق للسفر هناك

بس انا مش عاوزة اسافر واسيب بيتنا واوضتي ولعبي وكتبي

مش هرتاح مهما كان المكان عندك حلو..بس ليه لأ

مش أنا نفسي أهرب..وكمان انت هيبقى عندك بحر.

هجرب كدهون..

......

الدنيا بقت مكركبة من كل ناحية..وكل ما اعدل حاجة

حاجتين يميلوا بدالها

نفسي انسحب من كل حاجة واهرب

بس مش هعرف المرة ديه

مضطرة أقف بكل شجاعة امتلكها وصمود

زي ما أليس واجهت الوحش في الآخر وقتلته..

لازم اقتل كل الوحوش اللي حواليا

........

أنا مش غبية وبصدق إحساسي و ديه مشكلة أحياناً

وبعرف كويس جدااااااا لما حد بيكدب عليا بس مبقولش

بسيبه فاكر نفسه ذكي

الخلاصة إني مبحبش أكون في مكان مش مكاني

عشان كده بنسحب...مينفعش ابقى مجرد (سد خانة)

يا إما أكون قد المكان اللي فيه وأبقى أحسن من أي حد

يا إما دورلك على أي كومبارس مع مرتبة الشرف

أنا مباخدش أدوار أقل من البطولة المطلقة

بس كدهون

.....

و صحيح : قبل ما انسى

فيه مكان بحبه اوي بحس فيه بنشوة غريبة كل ما اقرا حرف

بسبب بنوتة بموت فيها

وكاتبة صغنتوتة هيصدر ليها أول كتاب قريب جداً

إيثار أحمد..مبروك يا قطتي

بلوج إيثار هنا..

والكتاب ع الفيس بوك..حواس مستعارة

..

تصبحوا على خير

Just 4 her

يوم سبيشيال عشان عيد ميلاد سارة ريحانة الاسلام

او اختيتي..اللي عمري ما قلت عليها صغيرة عشان هيا فعليا كبيرة اوي

اول واحدة عملت كومينت في البلوج ده..وادين بالفضل لأنكل بلوجر اني اتعرف عليها

كل سنة وانتي طيبة يا سارة

قبل ما ابدأ البوست اصلا عديت على بلوجك

واكتشفت حاجة غريبة

ان انا اللي ف البلوج ده مش انتي

كل حتة فيها مني..فعليا

الاغرب ان أقدارنا متشابهة بشكل عجيب

انتي زيي بس على أنقى وأحلى برغم المسافة

وبرغم ان كل ترتيب للقاءنا بيحصل فيه حاجة تفركشه ..بس مش مشكلة صبراً بقى

مفروض كنت اقطفلك سحاباية على هيئة غزل البنات واجبلك شوكولاته

بس لأن الظروف الجوية مش متظبطة فشكلك هتتنازلي عن الهدية ديه

خدي البالونات كلها اللي عاوزاها
..

انا مش عارفة انا برغي ليه وانا اصلا مش قادرة

بس كان لازم اقولك كل سنة وانتي اختيتي..

واوعي تنسير..بكرة جاي اخضر :)

..

هطير بقى أنا قولت اهو :(

اليوم كان حلو.. اليوم لسه حلو..وبكرة هيبقى حلو

(بقنعني برغم ان عندي بوادر اكتئاب خانق)

دماغي مصدعة اوي واعصابي مشدودة

عاوزة اقوم آخد شاور متلج في عز السقعة

لأ لأ لأ

أنا عاوزة أطير زي الفراشات اللي منى قالت عليهم هنا

مش هعرف أطير دلوقتي..لسه روحي مش شفافة

لسه صعبة عليا شوية صغيرين..

محدش يقولي مش هتعرفي تطيري

أصل الفراشات مش أقل مني في حاجة..

متكسروش مجاديفي ..خلاص اتفقنا؟

قررت اني رايحة ان شاء الله لقاء المدونين الجاي

عندي درس يوميها الصبح

بس هضغط على نفسي واحاول آخده في يوم تاني

وبكتب عشان حتى لو الاكتئاب زاد متراجعش ف القرار ده

عندي ايحاء اني اول ما اقرب من اللقاء هلف وارجع تاني

(مجنونة واعملها)

للي ميعرفش اللقاء عند مركز التبرع بالدم اللي في الدقي
ومحدش يسألني فين بالظبط عشان انا نفسي معرفش

يللا احسن عشان اتوه بقالي كتير معملتهاش

..

مش قادرة ارد على كومينتس البوست اللي فات

وطبعا شكرا للردود كلها :)

تنويه: الشوكة الناعمة

مش عارفة اكتب ايه..تقريبا اتصدمت جامد ونسيت كنت هكتب ايه

مدونة الشوكة الناعمة..تمت ازالتها

لأسباب غامضة ..بس اكيد ليها عذرها وأسبابها

المفروض اني انوه 

ان المدونة اتقفلت واي حد هيستخدمها

أو هيرجعها من تاني مش هتكون صاحبتها

...

وده اثبت اني محتاجة اعتذر جدا ليكي عشان مكنتش هنا الفترة ديه

لأنك بجد مهمة بالنسبالي اوي...

ربنا يفك كربك يارب