لا شيء غير الحقيقة

#حوليات عاملة أسبوع التدوين ده عن" الحقيقة كل الحقيقة ولا شيء غير الحقيقة"

تتكلم إزاي في أسبوع التدوين عن الحقيقة وأنت عارف إن مفيش حقايق كونية.وإن العالم أكبر من أن تتسع له مدونات!

طيب خليني أتكلم عن الحقيقة بتاعتي، يمكن أعرفني كفايا.. أو أكتشف إني عرفتني صح في يوم....

(10 حقايق، غالباً هيطولوا مني عشان أنا في مود رغي كوين، لذلك وجب التنبيه أن البوست نرجسي فشخ.. وشكراً)  

-1-

اسمي رضوى طارق.. الاسم الوحيد اللي أعرفه بيدمج جبلين في نفس السطر.. 5 حروف لجبل في الشرق و4 حروف لجبل في الغرب..طارق هو اللي تولى تسميتي ويقال إن آي واز نيمد آفتر سوبر ماركت نوت آ مونتن ومحدش فعلياً كان عارف معنى الاسم لحد ما بقيت في 3 إبتدائي..

ليا نصيب في القوة والهشاشة في نفس الوقت من الاسم..أو بحب أدعي ده مع إني مش متأكدة من صحته!

كنت بسأل نفسي إيه الإجراءات اللازمة عشان أحوّل اسمي ويبقى شغف. وايه احتمالات إننا نكتسب نصيب من الأسماء الجديدة اللي بنضيفها لنفسنا؟! مش عارفة

-2-

كان عندي حيوانات أليفة زي الكتكوت اللي انتحر من البلكونة بتاعتنا في الدور الرابع..وعصافير كتير .. أول مرة عصفور يموت كان لونه أخضر واسمه نور.. ساعتها صليت عليه ودعيت ربنا إنه يدخل الجنة بسذاجة بنت عندها 7 سنين بتجرب فقد حاجة بتحبها اوي.. ، كان عندي عصفور تاني صغير نسبياً ، مامته ماتت قبل ما ريشه يكبر وكنت بخاف عليه من البرد، بسذاجة بنت عندها 10 سنين عملت له جاكت بيلبسه ويدخل منه جناحاته.. العصفور ده مات بعديها بس على الأقل ضميري كان مقتنع إنه مماتش من البرد ! 

السمك مبيتحسبش السمك عمري ما حبيته ..

-3-

من برج السرطان.. اللي مبيعرفش يعيش أنصاف حالات ..حينما يتعلق الأمر بنص سعادة أو نص زعل أو نص معلومات/رغبة مبيرتحش هناك.. 

صحابي بيقولوا عليا ملكة اتخاذ القرارات لما مبيكونش فيه غير قرار واحد..

دايماً شنطة سفري جاهزة.. مبقفش أتكلم مع حد كتير، مبطولش في القعدات، بهرب أول ما أحس إني هبقى تقيلة..

بحب التفاصيل وعشان كده صعب ابهاري بحاجة..ومع ذلك حاجة صغيرة جداً ممكن تخليني طايرة

دراما كوين.. أحياناً.. غالباً.. اوكي اوكي طول الوقت 

-4-

ردود أفعالي بطيئة نسبياً لو مش تحت تأثير صدمة..مليانة من جوا بتفاصيل بتخنقني وتسيبني قاعدة ساكتة..

بحلم كتير ولما بحلم عيني بتنور ..آه وبخاف اوي

من يومين حسيت إني عندي crush بولد ميعرفش عني غير اسمي وخيالي الواسع المتعلق بالكائنات الفضائية اللي بتطلع من بلورة، مش متأكدة لو ديه اللحظة المثلى إن حد يعرف فيها غرابة أطوارك، ابتسم واتكلمنا لمدة 50 ثانية وابتسم تاني.. حسيت بالألفة ومتخضتش منه فابتسمت ونسيت اسمه بعدها!

-5-

بتخيل نفسي لما أقع في حب حد هروح له بكل استماتة - بشكل درامي شبيه بيحيى الفخراني وهو بيمثل مسرحية لشكسبير مثلاً (واللي محضرش للفخراني مسرحية قديمة ممكن يتخيل محمود حميدة ف ملك وكتابة)- وأقوله :"اجعلني خطيئتك المقبلة" ..

الفكرة في حد ذاتها مثيرة للضحك .. ومش عارفة لو كنت مجنونة لتلك الدرجة أو لأ.. 

-6-

لأ أنا عارفة أنا مجنونة لدرجة أكبر من كده..وبكدب

-7-

لما جيجي سألتني يوم الاكتئاب العظيم هو احنا لسه بنكتئب زي زمان بس احنا مش حلوين زي زمان .

قلتلها إننا كبرنا بس.. والكُبر هم.. لكن احنا لسه حلوين وقررت إني أعمل لها ليستة بالحاجات الحلوة.

أنا مؤمنة إني حد كويس.. مثلاً بشتري تذكرة مترو لما بركب خط غير اشتراكي، بسيب الناس يدوسوا على الكوتشي من غير ما أزعق لهم، مبركبش والدنيا زحمة احتراماً لآدميتهم ..

بشتري نسخ أصلية مش مضروبة من الكتب .. عمري ما سيبت ماما تنام زعلانة مني.. بحب الكلية مثلاً .. بدفع المصاريف أول بأول وبسيب tips للولد بتاع ديوان ولسواقين التاكسي المش رغايين..مش بكسر على حد بالعربية...

أنا كويسة لدرجة إني بحب أنشر الغسيل.. وأغسل الأطباق!

-8-

عندي قدرة عملاقة لتقبل الآخر والمسامحة..

عجزت طاقتي كلها عن مسامحة وتمني السعادة لشخصية وحيدة في حياتي ، قطعت علاقتي بيها عشان محسش إني بسامحها في يوم وأنا مش عاوزة.

-9-

وقعت في الحب قبل كده ..والحب وقعني بعد كده وبقيت بكتب عن هلاوس ، حسيت بوجع لما وقعت وفي يوم صحيت الصبح لاقيت الوجع راح.. بتلك البساطة .

مش بسلم غالباً على ولاد.. ومبعرفش ولد معرفوش يمد ايده ومسلمش عليه ! ومبحبش السلام البارد وقتها !

مش بحاول أخوض في الدين عشان عقلي مبيحتملش الجدل وتوهاني وحش اوي عشان مبعرفش فين الصح في الآخر..
علاقتي بربنا بعيدة عن الخوف ..ونادراً ما بتبقى كده. 

-10-

أحلى لحظة في اليوم وأنا راجعة من الكلية لوحدي تماماً وحاطة السماعات في وداني وماشية على كوبري الجامعة وببص للسما والنيل والجو مظبوط مع لسعة برد خفيفة وابتسامة رضا تامة عن لحظات الهدوء الوحيدة في اليوم..

-11-

مبعرفش أجهز لأعياد ميلاد، والأعياد اللطيفة اللي عملت فيها مفاجآت ظريفة كانت بفعل الحظ وصفاء النية مش أكتر .

لما بكتئب اوي بسمع سعاد ماسي..ولما ببقى رايقة جداً بسمع فيروز..وحالياً بسمع على الراديو أغاني قديمة لعمرو دياب

بحب فيلم آميلي ومعرفش غير 5 أفلام هندي في حياتي كلها وبتابع مسلسل جرايز أناتومي حلقة بحلقة لحد آخر سيزون.

-12-

بقول لكل الناس إن نفسي اشتغل في فاليو.. وبعديها أعمل الشغل بتاعي ف الايمبدد برضه ..ومؤخراً بدأت أحس شغفي قل بالهندسة بس بقول لنفسي أنا عارفة إنه هيرجع تاني وأنا مش واخدة بالي..!
أوقات بحس إني غير ملائمة للاختيار ده وبتمسك بيه ﻷنه الاختيار اﻵمن ومع ذلك لسه بدور ف حاجات ممكن أحبها أكتر.. لسه منضجتش مهنياً ومحتاجة حد كبير يقول لي إني لسه صغيرة وده طبيعي..

-13-

دايماً بسبق الزمن واﻷحداث .. 

بحاول أوسع العالم بتاعي وأبعد عن الكمفرت زوون وأكسر تابوه برجي المائي العزيز المعروف بالعزلة والكآبة طول الوقت..

-14-

حالياً بمر بفترة تألق بعد أسبوعين كآبة مكثفين للغاية، وفي نفس الوقت عندي كسل شديد بيخليني أقوم بالعافية الصبح ، وفي نفس ذات الوقت بكتشف وجود جرأة داخلية وثقة عمري ما حسيت إنها موجودة جوايا ..الثقة اللي بتحسسك إنك برنس واللي طول عمري بخاف من نفسي لاقعد هناك كتير..

-15-

بقالي 3 أيام بحاول أنشر البوست والقدر بيعاندني ودلوقتي أنا اللي بعاند وبنشره من الموبايل .