مش عاوزة أنزل تاني من البيت
ومش عاوزة أقعد ف البيت
مش عاوزة أعرف إن فيه حدوتة مهمة هتتحكي ومقعدش أسمعها عشان مش قادرة
مش عاوزة أحل ريبورتات السيركتس
ومش عاوزة روان تكلمني تاني عشان المشروع واقف بسببي
مش عاوزة أذاكر ولا أعمل بريزينتيشن ولا أستف زفت سلايدس ولا أقف أتكلم أدام ناس عارفين ألريدي أنا بهري ف ايه
مش عاوزة أفتح المسج بتاعت الشغل عشان ملاقيش حاجات جديدة بتتراكم
ومش عاوزة أكتب المقالين
مش عاوزة أعيش الأسبوع ده تاني ومش عاوزة أصحى بكرة
مش عاوزة حسين يكلمني تاني عن الوركهوليك بيبول عشان هفضل طول اليوم اسأل
مش عاوزة احتاج كتف وملاقيش
مش عاوزة اسأل نفسي أنا ليه مش عاوزة أسند على كتف حد
مش عاوزة حد يسألني "ازيك؟" أو "أنتِ كويسة؟" تاني
مش عاوزة ألبس بينك عشان البني هيحسسني إن كئيبة
مش عاوزة أي أمل إن الحياة هتتحسن
مش عاوزة توقعات فيا من الناس ولا العكس
مش عاوزة حد يحبطني ويكسر مجاديفي
مش عاوزة زحمة ولا دوشة ولا ناس
مش عاوزة أحارب طواحين الهوا
مش عاوزة صحابي ميبقوش كويسين
مش عاوزة أقعد بدون هدف..ومش عاوزة أحقق أهداف دلوقتي
مش عاوزة أروح الميتنج..ومش عارفة أنا عاوزة أروح السيشن ولا لأ
مش عاوزة أتخانق في البيت ولا أغسل الأطباق وأنشر الغسيل إني مور
مش عاوزة آكل ومش عاوزة أسرح شعري ولا أقصر الفستان الأسود
مش عاوزة فرشة سنان بالكهربا حتى..ولا قطة
ومش عاوزة سيلف بيتي
ومش عاوزة أصحى بكرة عشان ألاقي يوم تاني..
