أنا بقع بس بشياكة

كل ما بحس إني هتهاوى بنط في كتاب أو رواية أو فيلم أوبفتح ناشيونال جيوجرافيك.. مادام كده كده هتقلب، القَلبة جوا الكُتب بتكون كويسة .. أخف بكتير من القلبة وسط الناس ولما تسيب نفسك لشخصيات خيالية لدماغ غيرك أحسن برضه ما تسيب نفسك لدماغك ولأفكارك..

.....................

الناس بتتمعن في حياتها الشخصية وإنجازاتها.. وأنا شايفة كل ده بلللح.. ورايا هم ما يتلم.. وعارفة إني لو عملته هعمله حلو اوي بس مش عاوزة أعمله.. مش ملل..بس إنعدام رغبة في كل حاجة (ده ممكن يكون اكتئاب، بط هوو كيرز!)

مش متأكدة لو فيه حاجة واحدة في حياتي شغفي مش قليل بيها حالياً.. حتى المشروع على عكس العادة رامياه على تتشات بسيطة

وده بيإنديكيت يا أصدقائي إني بعييش أيام جميلة نومي فيها مش مظبوط ، مش مرتاحة ، مش باكل ، ولا بهتم.. ومش مضطرة حتى.

.....................

 

 إيه احتمالات إن أروح الصحرا دلوقتي أو البحر.. أو مبنى ميكانيكا (بالتحديد في الكلاس رووم اللي فيه سيكشن الإلكترونكس) لمجرد إني أقف أشرب قهوتي لوحدي وانا باصة للسما من غير دوشة ولا أي صوت.. ؟

.....................

“وكانت تؤمن بأن المرء إذا أحب شخصاً فيجب أن يخلص له الحب, حتى إذا لم يبقَ لديه شيء يمنحه إياه, بقي لديه ذلك الحب”  

جورج أورويل قال الكلمتين دول ومات..

.......................

هو الناس هتفضل تتكلم عن الفقد؟.. جيت أوفر إت..الحياة بوابة دخول وبوابة خروج محدش بيتحشر في النص أكتر من عمره...

أنا آخر واحدة تتكلم عن الفقد -أنا عارفة- بس الواقع إني مش بزعل على الناس اللي بيمشوا ..أنا بزعل على الفجوات اللي بتفضل ورا اللي بيمشوا ..بالظبط زي اللي بيخسروا إيديهم أو رجليهم ويمروا بمتلازمة الـ(phantom limb) ، بيفضل عندهم إحساس في أطرافهم اللي مش موجودة، بيحسوا بالألم وبالتنميل ..بكل حاجة كانوا بيحسوها قبل كده..الجسم مبيتقبلش فكرة حدوث صدمة كبيرة وتخليه عن جزء منه ..

ولهذا ازعلوا وعيطوا..ازعلوا لحد ما تكتشفوا إن الحاجة الوحيدة اللي في إيديكم دلوقتي .. إنكم تتقبلوا.. افضلوا كده سنة كاملة.. حداد على الأرواح الطيبة اللي سكنتكم.. حداد على دفا الكرسي الفاضي اللي حد كان قاعد عليه جواكم وقام لسبب أو لآخر..فالكرسي بدأ يبرد وأنتم باصين عليه ومش عارفين تعملوا حاجة..

.......................

معنديش طاقة لاحتمال تداعي أي حد بحبه دلوقتي.. 

......................

يوم الأربع عموماً بيبقى أطول يوم ف الأسبوع لما تحط معاه تجهيز بريزينتيشن وزيارة عزا كمان..حياتك هتفور زي القهوة وتدلق منك وتبهدل السبرتاية ..

الأربع اللي فات مكنتش نايمة كويس عشان أظَبط تاني يوم وبالتالي مرضتش ألبس العدسات ورحت بالنضارة..لمَا اليوم خلص اتخبطت جامد جداً وأنا مروَّحة معرفش ازاي (تقريبا عينيا غمضت لثانيتين وانا ماشية من غير ما احس)، غسلت وشي ولميت حاجتي وبعدين شُفت وفاء وميم ..وفوجئت إني فعلياً كنت هعيط، ليه؟ (عشان اتخبطت والخبطة وجعتني ومعيطتش وقتها، فانا عاوزة اعيط دلوقتي)..أنا بقيت بعيط كتير اوي لأسباب مجهولة من غير ما حد يلمسني !

ده بيفسر تماماً إني قعدت ربع ساعة على بلاط المطبخ ساندة ضهري للحيطة وفي حالة هيستيرية هتسبب ورمان عينيا لمدة شهر أدام عشان مش عاوزة آكل ولازم آكل عشان أعرف آخد أدوية تمشيني باقي اليوم أو أشرب نسكافيه من غير ما يجيلي هبوط..

ولحد دلوقتي مش عارفة أنا قمت من هناك إزاي؟

.....................

أول ما أعرف أركن كويس وأبطل أطلع على الرصيف.. هعمل احتفال عظيم وأوزع على صحابي كاب كيكس..

.....................

شكراً عشان أنت هنا.. شكراً عشان أنت الوحيد اللي بتتقبلني حتى وانا مش حاسة بحاجة ومبتاخدش الموضوع بشكل شخصي.. شكراً عشان بتاخد بالك مني وبتتسامح مع كم البارانويا اللي عندي وهتفكرني أجيب فرشة سنان بالكهربا ..شكراًَ عشان هتسيبني أغلبك ف الشطرنج وعمري ما هصدق إني عملت ده من نفسي وأنت عمرك ما هتعترف إنك بتسيبني.. شكراً عشان بتحاول تخليني أعمل حاجات عشان تبسطني مع إنك عارف إن الحاجات ديه مش هتخلينا بيست فريندز اوي..باط يو دو إت إني واي ..وشكراً عشان أنت مش مطالب نهائياً تعمل ده، وعارف ده ولسه هنا..

كل سنة وأنت طيب يا ميم مع سبق الإصرار والتربص :) 

....................

البوست ده نصه اتمسح عشان غير لائق..إنك تتكلم عن حد من ورا ضهره .. غير لائق..

إنما إنك تموت بقهرتك.. عادي