البوست تجميعة درافتس متفرقة في النوت بوك بمواعيد مختلفة، قد يكون مش مترابط بالمرة.. ولذلك وجب التنويه.
تلات حاجات متعملهمش في نفسك:
1- متصدقش إنك ممكن تبقى "مش كويس" بسبب ناس ومع ذلك تضحي عشان تبقى موجود "معاهم" لأنك مش متخيل حياتك من "غيرهم".
2- متقبلش بأقل من اللي محتاجه، أكسر الفريند زوون اللي الناس بتحاول تحطك فيها لو أنت مش شايفهم فريندز لحد ما وطأة مشاعرك تخف ناحيتهم.. ساعتها يبقى فيه تكافؤ.. ساعتها نعرف نتكلم واحنا على نفس الأرض.. ولو المشاعر مخفتش.. أهرب !!
3- متتصدمش في حد.. صدق إن الناس بتتغير اوي، لدرجة ممكن تخليك تسأل نفسك "هو أنا إزاي فكرت أدخلهم في حياتي في يوم من الأيام؟"
.................
."I disappear into the people i love"
.................
- هو قالِّك إيه بالظبط خلاكي كده؟
- قال لي أحلى حاجة ممكن حد يقولها بعد "بحبك"
لمّا يحس إنك مش قادرة تستحملي دلوقتي "بحبك" بتاعته.
.................
إيه مثير للشفقة أكتر من إن معدتك تبقى بايظة وتاكل أكل مُتعب وأنت متأكد إنك هتتعب؟
أو إنك تمسك مكواة فتتلسع وتنسى فترجع تمسكها تاني فتتلسع تاني وهكذا..مش بتتعلم، وممكن نقول "مُغفل" على رأي جوزفين..
المثير للشفقة فعلاً إنك تقف في نفس المكان، بتكرر نفس التجربة وبتسأل نفسك هو الوجع هيبقى زي أول مرة؟
الوجع فانكشن أوف تايم زي السعادة زي الزعل زي كل حاجة.. مرة هيبقى تقيل أوي أتقل من إننا نستحمله لدرجة مهيجة لمعدتنا وقاولونا العصبي، ومرة تانية هيبقى متسامح معانا لدرجة تخلينا نبتسم للغريب ونشرب بُق مايّه، نقرا سورة مريم وننام..
.................
I thank God for FEAR! .. Because for the first time, I'm afraid that the person next to me would be the one who wants to leave.
.................
أنا مُتعِبة ومتعَبَة حد الموت..
عشان كده كل الأشخاص اللي بيدخلوا في حياتي في آخر كام شهر وبيقرروا يقربوا بيتظلموا جداً معايا وهما مش واخدين بالهم.. أو جايز واخدين وفاكرين إني مش مهتمة.
المؤلم إني مهتمة.. المؤلم إن خايفة من اللسعات الجاية.. المؤلم إني بحط أسباب ضعيفة لرفض أشخاص ميترفضوش
المؤلم أكتر إن محدش فاهم.. وإني مبرتحش في أنصاف الحالات وإني متأقلمة مع حالة التلصيم ديه وبقول كل يوم في سري
"ناقص 7 أيام وبيقلوا.. ناقص 7 أيام والوقت بيمر وكل حاجة مصيرها تكون كويسة.. هتكون".
................
#عنها
عمري ما كتبت عنها غير مرة واحدة كنت بقول فيها إني مش عارفة أكتب عنها..
عمري ما قلت إن دماغنا مش متناسقة وحلولنا الوسطية صعبة عشان احنا الاتنين صعبين المراس.
حالياً مش هعرف أكتب عنها .. عشان الكتابة متوجعهاش، كفايا اللي هي فيه..
بس وانا بكتب أفتكرتها وسألت نفسي أمتى آخر مرة شوفتها بتضحك؟
مش قادرة أفتكر!
فانا بكتب عشان أفكر نفسي
"اوعي لما تكبري تكتشفي إن اختياراتك خلتك تعيسة اوي كده.. ولو حصل لا قدر الله.. اوعي تقفي ف مكانك خاضعة للأمر الواقع.. الزُهد حلو بس التعاسة وحشة اوي".
.................
متعملش حاجة منتاش عاوز تعملها.. متكلمنيش عشان مفروض تكمني، كلمني عشان أنت عاوز تكلمني.
متحبنيش عشان أنا الأوبشن الأخير.. حبني عشان أنا الأوبشن الوحيد اللي شايفه رغم تعدد الأوبشنات بالنسبالك.
امشِ معايا طول السكة على رجليك كعب داير.. ولما تتعب خبي زي ما أنا هخبي بالظبط ولما نوصل نقعد همدانين جمب بعض بنبص على السما ونعترف بمدى فداحة المشي طول المسافات ديه، وإننا كان لازم نستجيب لأوامر السماء ونوقف تاكسي ..
متقوليش فكري وهتلاقيها متسواش..أنا عارفة إنها متسواش بس حاسة إنها تساوي..do your math وافهمني أقصد مجازاً يعني حِسني!
حبني عشان أنا رغاية وهادية ودوشة وبزعل بسرعة وبتصالح أسرع وبتَقل عليك وبسرح منك.
حبني وأنا بعيط لسبب ومن غير سبب وأنا بصحيك بالليل عشان عندي panic attack ..
حبني وأنا بتفلسف وأما بكون مش عارفة حاجة ، وانا واقفة مش عارفة أعدي الشارع، وانا حاسة بالظلم ومش عاوزة أبقى هنا، وانا بتقوقع وعاوزة مساحتي لوحدي ووانا بكتم على نفسك يوم ما بكون مهيبرة.
وانا شعري كيرلي أو استرايت ، قصير أو طويل، لابسة فستان وكعب زي ولاد الناس المحترمين، أو وأنا ضاربة تيشرت على بنطلون ..
حبني حتى وأنا مترددة وبحط فرمانات وباخد أوسكار في التصرفات الغير مبررة وبرتبك ..
مسموحلك توعدني ومسموحلي أشك ف صدق الوعود..ساعتها طمني إنك بتحبني..
مسموحلك تتغير وتكدب وتمشي بكل بجاحة بعد ما تلم كركبتك، وطبعاً مسموحلك تحب تاني وتكدب تاني وتتغير تاني..واوحشك!
مش مسموحلك ترجع بعد ما تمشي ولا مسموحلك تحب بعديا واحدة اسمها إليسا أي حد تاني.. ممكن، بس اوعى تخليني أعرف.
وأخيراً حبني من غير عُقد ..حبني من غير عُقد أرجوك..
