إيه اللي بيأذي حد لدرجة إنه يفقد القدرة على الكتابة؟ مش عارفة يا هندا
لما انتي اتوجعتي فضلت تكتبي وتكتبي وتكتبي.. حتى لو الناس شافوا الكلام كئيب.. طز ف البشرية جمعاء.. هنا في مدونتي ، المهم أنا.. المهم إني احكي وابقى كويسة.. ايه اللي جرالي يا هند ؟ بكبر؟ تفتكري؟ بكابر؟ يمكن؟
# نظرية
الأنقطاعُ عن الكتابةِ يشبهُ أنقطاعَ مريض الربوِ عن "بخاختٍهِ" لأنه لم يعدْ يحتملُ رؤيةَ آخرين لهُ وهو يتنفسُ رذاذَهَا .
نظراتْ شفقتهم تصنعُ ثقوبً غير مرئيةِ برئتِيهِ لا يُدرِكُها طبيبهُ حتى ، فقطْ تصنعُ هواتً منمنمةً تتسللُ مِنها روْحَهُ ببطءَ !
حين تكتبُ عن وجعِ داخلكَ للمرةِ الأولى ، تكون قدْ تركتَ فرصةَ سانحةَ لقراءةِ مشفقةِ ان تصنعَ ثقبَهاَ بقلبِكَ .. ان تُكررَ الأمرَ معناه ان تَستيقظَ يوماً لتجدَ جسدَكَ ثوباً فضفاضاً غادرتهُ روحُكَ أثناءِ نومك بلا رجعةِ !*
عارفة تلك الأيام اللي بتصحي فها نفسيتك مضطربة بشكل ملحوظ..لما رواية عبيطة تخلصيها وتلاقي نفسك بتعيطي على مذابح صبرا وشاتيلا وعلى بريدجيت اللي مشيت ورجعت بلادها عشان زهقت م الهروب.. وبتعيطي بشكل أسوأ لما توصلي للصفحة الأخيرة وتلاقي مفيش نهاية سعيدة !! الروايات الكويسة ملهاش نهايات سعيدة ، الروايات الكويسة ملهاش نهايات أصلاً..ازاي العالم متعايش مع نفسه كده ،و ازاي انا وصلت لتلك الدرجة من اللاواقعية ، مش مؤمنة بالفلوس ولا بالماديات مش مؤمنة بالمآسي ومش عاوزة اصدق في المؤامرات والكدب ونفس الدايرة بتاعت الناس مش لازم يمشوا !! (متقوليش لميم اني بلف لسه ف نفس الدايرة.. بحاوله اقنعه اني كبيرة حالياً عشان يسيبني أمشي لوحدي خطوة خطوة من غير ما يخاف عليا لاقع..)
انا متأكدة إني مش طبيعية وإن اضطراب الهرمونات المرتبطة بمغادرتي لمرحلة المراهقة ده أمر طبيعي.. !! طبيعي نكبر يا هندا بس مش طبيعي نعجِّز اوي كده مرة واحدة لما نكتشف إن سانتا كلوز مش حقيقي ، أقصد هو عمره ما زارنا عشان نصدق في وجوده أساساً بس صدقناه عشان كانت مرحلة.. وخلصت خلاص.. بح !
# واقع
متى أمتنعتْ عن بخاختِي ؟
لا أعلمُ ..
فقط ما أدركتَهُ هو رعباً تملكَني من يومِ قادمِ آرى جسدي فيهِ ثوبِ مهتريء لم يَعدْ يُخفي عوراتَ القلبِ ، ان اقابلَ وجهي في مرآتِي .. أنتظرُ روحي تقفزُ لتحيَتي من خلفِ عيني ككل صباح .. فلا تأتي .
ما يُزعجُني هو الحاجةَ الى الهذيانِ كوصفةٍ طبيةٍ لعلاجِ إدمانِ سابقِ - على الأقلِ - !!
"أهذوُ" ..
فتخرجُ الكلماتُ واهنةً ، تصمدُ حروفُها لثوانِ حتى تتعثرَ خطواتُها فتسقطَ لتعودَ أبجديةٌ مُبعثرةٌ !
أصابَ تكوينُها العجزَ حينَ تُركَتْ مكومةً فوقَ بعضَها داخلِ صناديق الصمتِ الضيقةٍ !*
صحيت الساعة 7 بحالة من البؤس.. بالتي شيرت الأسود الواسع اللي احمد عاوز ياخده مني وتجنبت اني ابص ف مراية الأوضة ..غسلت وشي وانا بتجنب اني ابص ف المراية للمرة التانية.. مش هعرف أعمل حاجة ف الهالات السودا ..سرحت شعري بإيديا وسيبته ف حاله.. وبعدين قررت اساعد ماما ف المطبخ .. تخيلي سوء حالتي وقتها يا هندا..او تخيليه بعد ما خلتني ألِّم شعري بالعافية رغم محاولاتي لاقناعها باللي نور كانت بتقولهولي عن ان شكلي بيبقى حلو وانا شعري طويل وهايش..ووقفت معاها عشان عشمتها إني هساعدها..عاوزة الحقيقة وقفت معاها من الأول عشان كنت بحاول أنسى النهارده إيه.. بحاول انسى المزيد من الوعود المتكسرة والخذلان المعتاد بالإضافة لذكريات مصممة تطاردني ..محدش بيختار يفتكر ايه يا هند.. بس فيه ناس بتسيطر على دماغها ، الناس اللي بيعرفوا يكتبوا بمواعيد ، وينسوا اللي عاوزينه وقت ما يعوزوا، اللي بيشتغلوا من غير تفكير ، ويعملوا اي هبل ف اي وقت
، محظوظين جداً.. بس أنا بشفق عليهم بأرواح الروبوت اللي عايشين بيها من غير إحساس.. ولما بيحسوا ببقى عشان غرض محدد مش أكتر.. صدقيني مش فاهماهم ولا عارفة بيعملوا ده ازاي..!
# نظرية آخرى !
روحُك ترتعدُ من بوحِ يَكشفُها ، تُهددُك كُلما حملتْ حرفَك بين يديكَ ان تركضُ بعيداً ، لتتركَ جسدكَ ميتاً .
انت تؤمنُ بالموتِ كسنةٍ حياتيةٍ مؤكدةٍ .
أتؤمنُ أيضاً بأن العيشَ بجسدِ محكمُ الغلقِ على روحِ مرتعدةِ اسوأ من موتِ اثناءَ محاولتكَ إنقاذِ حرفِ !
ولكَ اختيار ما تُريدْ .*
الفساتين مبسطتنيش امبارح ..محسستنيش بالسحر بتاعها ، لمَّا بتحسسك إنك أخف وروحك طايرة .. مفروض بعد كده نلبس الفساتين على كوتشيهات أو الأحسن نمشي حافيين عشان نساعد السحر على الانتشار.. وكمان نلبس خلخال واقع منه نجوم صغيرة
عارفة يعني ايه خلخال ونجوم ف نفس ذات الشيء ! اوف وهنجيبلك خلخال بفراشات متقلقيش
صحيح..عارفة رنيم قالت لي ايه عنك آخر مرة.. قالت لي إنك بترسمي.. هند لسه بترسم.. انا فرحت اوي لحظتها.. حسيت انك لسه عايشة..
واقولك كمان.. فيه يوم كان نفسي ارسم اوي.. هرسم حلم نفسي فيه.. بس ملقتش عندي قلم رصاص.. فمرسمتش.. او يمكن خفت يطلع الحلم ع الورق وِحِش او يمكن خفت من الواقع نفسه ..متشغليش بالك و ..ارسمي :)
والبوست ده ملوش اي لازمة.. لأني مقلتش حاجة فعلياً فيه..
وده معناه اني لسه عاجزة عن الكتابة.. بس بحاول
ومعناه برضه إني بحب هند اوي
ونسيت كمان أجيب سيرة الـ Dreamcatcher العظيمة اللي عملتها.. أنا فخورة بيا
............
*لــ باسنت خطاب / مدونة الحوليات
