سامع المزيكا ؟..
قوم نفض التراب من على قلبك.. شيل الأقفال اللي ملهاش لازمة .. اخلع الجاكتة ،وَلَّع ف الكرافات وسيب الحزن مرمي فوق الكومودينو.. ارقص معايا سلو تاني خطوتي ورا خطوتك ..واحد اتنين ..وبعدين انا همسك الزمام وخطوتك ورا خطوتي ..
مش تانجو لأ .. مش هنفضل نبعد بعض ونقرب تاني وهكذا !..
اللي بتعملوا ده مش منطقي..أنت بتلعن روحك وقلبك .. وبتعمل زي ما بيعملوا ف جزر سليمان بالظبط ، عارف بيعملوا ايه لمَّا بيحبوا يتخلصوا من شجرة .. مبيقطعوهاش، بيتجمعوا ويلفوا حوالين الشجرة يفضلوا يلعنوا فيها لحد ما تدبل لوحدها بعد كام يوم وتموت ..!
قلبك هيقف.. روحك هتتشوه أكتر ما هي متشوهة.. مبسوط كده؟؟ متعود؟؟ مش خايف؟؟
طيب متردش.. مش عاوزة اسمع..
(من كواليس الانترفيو مع اختلافات بسيطة اظن !)
* مكنش ف دماغي اي حاجة ومكنش قدامي غير خمس دقايق ولاقيتني بكتب كده..من وسط كل اللي كان ف دماغي، ده بس اللي اتكتب، واديت نفسي 6 من 10.. سالني ليه 6 ؟ كدبت ، وده كان السؤال الوحيد اللي كدبت فيه النهارده..مكنتش fake.. ومجاوبتش اجابات مثالية.. مقلتش فعلاً غير اللي كنت مصدقاه..بس هو مصدقنيش وحس إني بتصنع.. كان لازم اقول له من سلبياتي إني مبعرفش اتصنع ! ومبعرفش اكتب ف 5 دقايق اي حاجة كويسة..
* ودلوقتي بقى أنا خايفة اتعود على اللي بحبه وعندي رهبة إني لو ركزت عليه هابطل احسه.. ده هبل صح ..هبل عشان انا خايفة الحاجة اللي كنت بعملها وبتريحينيي تفقد معناها بالتكرار .. خايفة ابطل كتابة ع المدونة زي اللي خدوا الطريق ده قبليا .. خايفة ابقى بلاستيك في الواقع وعلى الورق .. اصلا مكنش مفروض اخاف م الانترفيو ومع هذا صوتي كان مهزوز.. هو مخدش باله بس انا خدت..
* أنت خدت بالك اني بعرف ابص ف عينيك اوي.. من غير ما اخاف و من غير ما ابعد نظري؟ وانت عارف كويس اني مش بعرف اعمل eye contact لمدة تزيد عن الـ 3 ثواني ، بس ده مش بيحصل معاك.. اصلك مش هتشوف اكتر من اللي شوفته جوايا.. ده عمق القاع المسموح بالنسبة ليك.. عينيا مش هتكشف أكتر من كده ادامك.. فمبخفش
* عزيزتي ماما ميرا ، وفي رواية أخرى ماي ليتل برينسيس .. انا عاوزة اروح swimming pool وده حاجة مهمة لأول مرة من سنيييين أحس إن نفسي فيها ، أنتِ قلتي اما يبقى نفسي ف حاجة ممكن اكتبها هنا وانتي هتنفذيهالي صح؟ يللا نروح بقى :)
* هو انا ازاي مقلتش لــ "علي" الجندي المجهول شكراً على مرمطته معايا في عيد ميلادي بسبب الهدية لحد دلوقتي ! حتى لو معرفوش شخصياً ده مش مبرر..
عائلة بنداري الكريمة..أنا ممتنة ليكم من أعماق أعماق أعماقي.. آه وربنا.. ابهرتوني وانا يسهُل إسعادي بس لا يسهُل إبهاري..
* ميرا جابت لي كتكوت صغير بيضَّحك اوي النهارده.. كان نفسي اخدها ونروَّح عندي وفاكس مدينة نصر ، بس مينفعش يا راء لازم نكبر ده شُغل..شغل شغل شغل شغل شغل اوف
* وكل ما بنكبر نفسِنا بتتكِسر.. أنا زعلانة دلوقتي عشان مخدتكيش معايا :(
* فرمان أول : انا مش هبعت مراسيل هنا لأي حد بيقرا البلوج.
فرمان تاني : الفرمان الأولاني لاغي بمجرد ما حالة الغضب اللي عندي دلوقتي تروح.
* بالمناسبة أنا بحب الشاي بالنعناع جداً.. بس مبشربوش
* متغيرتش يا عزيزتي .. كل الموضوع اني بطلت اعييش حياتي بطريقة زمان.. بطريقتك دلوقتي.. فبقيتي شايفة فجوة عملاقة ما بينا ..بقيتي بتستخبي مني وانا مش بحاول أطلعك من الصومعة وكل واحد بيكابر ف ناحية.
* هو الكتابة الحلوة بتتقاس ازاي .. يعني أنت عاوز مني ايه دلوقتي ، مش بعرف اختار!
* عاوزة أتعلم assembly واعمل الامتحان اون لاين من غير غِش :)
* من الحقايق الداخلية جدا إني كان نفسي يبقى عندي أخت ..مثلاً رغم إنها عكسي 180 درجة ، مجنونة وشعنونة وأصغر مني وضايعة أصلاً زائد إنها بنت بزيادة لدرجة إنها بتهزأني عشان معنديش lipstick لونه أحمر ومبلبسش الكعب الـ 12 سم بتاعي.. بس ديه كلها حاجات ممكن التغاضي عنها في مقابل الوَنس اللي بتسيبهولي لما ببقى قاعدة لوحدي او وهي بتفرجني بالعافية على حكايات بنات وبنتقمص شخصيات او بنعمل شعرنا كيرلي وهي قالبة وشها عشان مش لاقية ال charger..
هتقطع بيا لما تسافر..هي فاكرة انها بتهرب من المشاكل وشايفة الكون كله ضدها.. بس هتكتشف انها مشافتش حاجة.. كان نفسي تكتشف ده هنا مش برا مصر.. كان نفسي ابقى معاها.. أرض الأحلام مش نيفرلاند وأنتِ مش هتكوني سندريللا ، يارب تفهمي ده قبل ما تمشي.. يارب
* يارب.. أنت عارف إني بحاول أبقى مبسوطة بكل طاقتي .. واكتشفت إن مينفعش ممكن يكون عنده شجرة فُل وياسمين ويتضايق.. يارب أنا مش زعلانة.. وممكن أنزل كل يوم انترفيو لو ده يعتبر أخد بالأسباب.. وهستحمل سؤال introduce yourself ، وهراجع الحاجات اللي عملتها وانا رايحة المترو عشان مقعدش افتكر قدام الانترفيور.. بحاول اهو يارب
ممكن بس يارب تجبُر بخاطري أنا والبنات يارب ومتخليهمش زعلانين من حاجة ، نوران وجي وميرو ولوو وميرا ونور
ويارب خلي نوران accepted .. هي محتاجة ده اوي
بس كده.. شكراً اوي :)
.
