نفس عميق
،ابتسامة
،احساس جديد
قلق مع توجس
لكن لا يقلل من روعة الاحساس
بقى قليل أوي لما بقول اللي حاساه...مفيش وقت كفايا ،طاقة كفايا ،حرية كفايا
النهارده هكتب وبس...
عن البطة السودا:
فيه ناس كده...كل ما بتحس إنها جميلة بتحط روج بلون معين وتطبع بشفايفها علامة على المراية اللي بتبص عليها طول الوقت
فــ لما تبص على المراية بتاعتهم...هتلاقي لون أورانج وفوشيا وأحمر وبني وشفاف!
بس مشكلتهم إنهم أول ما بيحسوا إنهم مش حلوين...وفي ثانية واحدة بيجيبوا وايبس ويمسحوا كل العلامات ديه
جواهم بيتكون كائن عنده شيخوخة مزمنة..وبيحسوا إنهم شبه البطة السودا
كل تفكيرهم بينحصر في إحساسهم الداخلي ومش بيفرق معاهم هما حلوين فعلياً ولا لأ.
ساعتها لو سألوك سؤال لازم تجاوب على سؤالهم بكل بساطة...وتقولهم بدون مبالغة..أنتُم حلوين اوي
وتطلع لهم كلينكس لأنهم غالبا هيعيطوا في ذات المومينت
يعني وكمان ساعتها تربيتة خفيفة على ابتسامة هتعمل مفعول فوق السحري بشوية
:)
حتة بره الموضوع:
حاسة إن لساني معوج من كتر الإنجليزي اللي بستخدمه ...آه وربنا...وحتى الكتاب اللي بقراه حالياً إنجلش لحد ما مبقتش أعرف أعبر بالعربي !! شيء غلس مش عاوزاه يسيطر عليا لو هفضل في تلك الدايرة كتير...لف وأرجع لمبدأ أول أرابيك أول ذا تايم
عن الناس اللي بتأثر في غيرها من دون مقابل:
عاوز تساعد حد يكون كويس...ساعده يبقى كويس من غيرك أكتر ما يبقى كويس بيك ، وخليك موجود جمبه في تلك الأثناء تصحح له مساره لو مقدرش يكمل...حَفزه يتمسك بقراره
لأن ببساطة لو خليت نفسك مركز سعادته ومشيت..هتدمره ، هتاخد منه كل حاجة وتسيبه يقع من فوق البرج اللي طلعته عليه عن طريقك وتسيبه أسوأ حالاً من قبل قدومك..
:(
حتة 2 بره الموضوع:
أنا نفسي اوي اسافر تاني السعودية...عندي اشتياق رهيب للكعبة ورب الكعبة والجو العام هناك ..يبدو إن الرحلة جت بفايدة على المستوى البعيد
ربنا...انا بحبك اوي اوي اوي اوي اوي إلى مالانهاية
عن الأفكار اللي لازم تترمي في الزبالة:
السعادة مش الهدف بتاع الناس اللي عايشة...السعادة حالة...قرار بناخده وبنكمل بيه
بيهون علينا حاجات كتير في السكة اللي بتزقنا ع الهموم.
السعادة وسيلة للحرب من نوع تاني...نوع محفز في حد ذاته
عشان كده بطلت استنى الحاجات اللي عاوزاها...بقيت أجري وراها وأجيبها من قفاها وأتشعلق فيها لآخر نفس
بتلكك علشان أفرح..وبسيب غيري يفرحني
حتة 3 بره الموضوع:
خليني أعترف إن البيزنس واكل دماغي...بس شوية كده وهرجع طبيعية..العالم ده طلع مُعقد ومش شبهي خالص :)
عن التشبث:
مش معنى إنك بتمسك في حد جامد
إنك أنت في الضياع..ممكن معناه إنك محتاج تحس بحد ساندك حتى لو مش هتقع
حد يقول لك i got your back
ومش بس ضهرك لأ وكمان جنبك وقدامك وفي الدايرة المحيطة بيك
مش أي حد هيفهم المنطق ده غير اللي بيخاف اوي..فبيمسك في اللي بيحبهم اوي
أنا ماسكة فيكم اوي..وفرحانة بيكم
متسيبوش ايدي ..بليز
:)
إمتنان :
شكراً لربنا عشان حطيتلي ناس محتاجاهم في سكتي..
شكراً لكل الأشخاص اللي بتسندني وبتحطني فوق أرضية ثابتة
وده خلاني بقيت واثقة أكتر..مبتهزش بسهولة..
وبحاول مبقاش نكدية على حسب الظروف (الموضوع ده في جيناتي بما اني مصرية من زمان)
شكراً لباشمهندس إمبابي عشان أكدلي إن الكوباية مش مليانة...فيها نص ميه
والنص التاني هوا...والهوا من ضروريات الحياة
شكراً للتيم وورك اللي بتعامل معاه...ولكل حد فادني
وألهمني(خصوصاً اللي بيناموا على البيبان لحد ما يحققوا اللي عاوزينه)
شكراً للشخصين اللي بيحسسوني إني بساعدعهم وإني صوت العقل والضمير والحكمة :D :D
وأحب أقولكم ده مقلب
والتانيين اللي لما بسكت بيقولولي رضوى أنتِ ساكتة ليه..العالم محتاج رأيك
واللي بينفخوني وبيحسسوني إني بعرف أصور..واللي بيسيبوني أصورهم في كل وقت
وأكتفِ بذكر هؤلاء اليوم...
..
