البنات اللي بتشوفهم مدمعين الصبح بدري وأنت رايح الكلية في المترو ، البنات اللي بتتكلم في الموبايل وصوتها مقهور ، البنات اللي مش بيعرفوا ميبطلوش عياط لما بيبصوا في المراية ويحسوا من جوا بانعدام جمالهم الداخلي ، واللي بيصحوا الصبح عينيهم وارمة من كتر العياط......أنت تعرف إن ربنا بيعِّد دموع البنات!؟
أما اللي عندهم مرض الحزن المزمن - أمثالي - ..فلازمن تكون عارف ثواب اللي بيضحكهم ويفرح قلبهم في لحظة ، أيوه امال ! ..عارف كده زي ما في شركة المرعبين اكتشفوا إن الضحك بيولِّد طاقة أكبر بكتير من طاقة الصريخ ، وبعدها المخوفاتية اشتغلوا مضحكاتية..كارير شيفت زي الفُل
بالمناسبة لما بفتكر البنات، بفتكر هند وآخر مرة شوفتها في الأوبرا.. فاكراها وهي بفستانها البُني اللي شبه لون عينيها ..يوميها مكنتيش زعلانة يا هند..كنتِ خايفة من حاجة مش معروفة..حتى واحنا قاعدين نلعب وسايبين الحفلة تضرب تقلب..كان فيكي حاجة تايهة منك..
بفتكر لُبنى ونُهى واحنا قاعدين ف الأوبرا برضه وبنحكي في عُقد وكلاكيع وبنضحك ..
كان عندي حكايات كتيرة مش فاكرة حكيتهالك ولا لأ.. مش فاكراني أبداً وأنا عينيا منورة و ببصلك بتركيز وانا بحكي حاجة وبعدين بخلص كلامي وانت سرحان وباصص لي ..عاوزة اقولك اني خلصت كلام عبيط ممكن تغير الموضوع.. فاحاول أنبهك وأقولك "وبعدين خلاص خلَّصت الحدوتة" ، ومع ذلك تفضل مركز مع عينيا فأوديها يمين وشمال على غرار جيري وهو بيبص حواليه بالتأثير البطيء بيشوف توم في المكان ولا لأ.. ثم تتقلب ضحك هيستيري غير مبرر..أنت كنت بتضحكني من غير ما تتكلم ازاي!؟
ساعتها كنت بستناك تقول لي بنفس أسلوبك هو أنتِ ازاي... (هبلة/مجنونة/سيللي/سمجة/رغاية/كريزي) كده..بس عمرك ما قلت لي ،وكأنك كنت بتستمع إن فيه حد بيتكلم..او يمكن أصلا مكنتش بتسمع اللي بيتقال !
تعرف إنه مش سهل أبداً تقعد مع حد من غير ما تتكلم وأنت مش حاسس بتُقل القُعاد على قلبك.. حاسس إنك عادي قاعد لوحدك بس متونس بحد موجود .. السكوت أوبشن مهم عشان تعرف بترتاح لحد ولا لأ .. الحياة مش كلام بس .. الحياة كتابة وخناق وكُتب وسعاد ماسي وشوشو بتحوم في المكان وكِتف تتسند عليه وكيبورد بيستحمل قوة ضغط صوباعين على كل حرف فيه..وبلوجز عبييطة بتشيل شوية وجع من هنا على هناك..وبدايات سخيفة وهروب وخوف وثقة وميلات ومليون خطوة في كل طريق أعرفه..
كان لازم شيماء تقول من زمان متشاركوش الحاجات اللي بتحبوها مع حد.. كفايا شير وإعلانات فودافون بقى! وكان لازم شيماء برضه تجاوبني ازاي ممكن ضدين يبقوا من جوا شبه بعض أوي كده ! وازاي الحاجات اللي بتبدأ بخوف بتنتهي برضه بخوف !
عارف..أنا حاسة إحساس البسكوت اللي وقع في الشاي بلبن لحد ما باش ومبقاش نافع تطلعه غير بالمعلقة..وأنت عارف إنك لو طلعته بالمعلقة هيتفتت منك أكتر..فأنت طلعته و مكلتوش وسبته محطوط ف الشمس مستنيه ينشف يمكن يبقى قابل للأكل.. فاتلمت حواليه العصافير وبدأت تقطم فيه.. ببساطة عمره ما هيرجع بسكوت تاني ..
حاساني دلوقتي - وأنا مغمضة عيني وبفكر وعقلي بيقول لي "لأ".. وكل حاجة تانية بتقول "ليه لأ" أكنها مش سامعاه..-
قاعدة أدامك وباقولك
" عبيط أصله قلبي ده !! آه والله عبيط"
فترد وتقول لي
"والله مش عبيط.. ده جميل اوي !"
وأنا أعيط وأعيط ..وانسَى أقولك متخفش دموع الطبطبة .. ربنا مبيحسبهاش
.
