أنا عمري ما حكيتلك عن النغزة اللي في قلبي اللي بتيجي لما بعدي بأماكن معينة لوحدي..
عمري ما حكيتلك عن الإحساس بتاع "هيرموناتي قايمة عليا" ونفسي في ولد صغير أحضنه دلوقتي وأحكيله حدوتة وألعب في شعره..وأصحى الصبح على تنطيطه.
عمري ما وصفتلك وجع القلب لما بستناك وبتتأخر..
عمري ما غنيتلك لكيلي كلاركسون بصوتي وانا بتنطط وبرُقص بهبل عشان فرحانة حتى لو الاغنية المفضلة بتاعتي بتتكلم عن الخيانة !
عمري ما جبتلك سماعة دقات القلب تشوف بنفسك مدى الاضطراب الفسيولوجي اللي بيحصل لي وانت قريب واللي بيخليني عاملة زي قالب التلج اللي قاعد في الشمس وبرضه مش بيسيح..ولا حطيت ايدي بشويش على قلبك وأنت مش واخد بالك عشان أتأكد إنك مش زومبي !
عمري ما خدتك كونسيرت لعلي الحجار وبصيتلك اوي بعنين مدمعين وهو بيغني "لو تعرفي" ..أو شوفتني وأنا بضحك اوووي وهو بيقول "بكرة جاي أخضر".
عمرنا ما اتسحبنا وطلعنا المكان اللي جمب الاوبرا اللي بيشوفوا منه الفلك والذي منه وقعَّدتك طول الليل متكلفت معايا ببطانيه عشان مستنيةالـ falling star ومجهزة نفسي عشان اتمنى أمنية...
وأنا عمري ما قلتلك الأمنية ديه ايه.
عمري ما اتخانقت معاك عشان بصيت للبنت اللي لابسة فستان قصير وشبه هيفاء وسيبتك ومشيت وأنت جيت ورايا تصالحني.
عمري ما رقصت معاك ف شوارع وسط البلد تحت المطرة..ولا جرينا من غير ما نبص لهدومنا هيبقى شكلها ايه.
عمري ما وزعت معاك ورد على الغلابة اللي قاعدين على الرصيف وشوكولاته على أولاد الشوارع اللي ماليين المترو.
عمري ما قولتلك بخاف لأنهي درجة.. بخاف عليك ازاي.. بخاف من بكرة ازاي.. وبخاف منك اد ايه.
عمري ما أستنيتك تنام عشان أهمس لك بكلام كتير معرفتش أقولهولك وجهاً لوجه،وعمري ما قلتلك حاجات كتير ما عادش ليها معنى بعد ما خبيت أحلامي تحت المخدة وكملت نوم.
عمري ما شربت معاك قهوة في محطة مصر ولا سافرنا اسكندرية ورجعنا في نفس اليوم مفلسين ومعاناش غير dozens من الصور الهبلة على الكاميرا..وشوية انبساط محتاجين يطلع منهم زكاة عشان ميقلوش.
عمري ما عملت معاك سباق جري على كوبري قصر النيل ولا سوقت بيك من غير ما ادوس فرامل..
عمري ما قلتلك إني ضعيفة اوي وقلبي هَش ومش حمل الوجع اللي أنا شايلاه لوحدي وماشية بيه في الشوارع يمكن يقع وعمري ما الاقيه تاني !
عمري ما حكيتلك عن الجناحات اللي أكاد اجزم لك انها مستعدة تطير.. أو الأحلام اللي بتنكشنا لاجل نفضل ماسكينها ومنسيبهاش.
عمري ما بطلت ألوم الكون على إشاراته السخيفة اللي لو مكنتش شفتها كان زماني قلتلك ده كله ..
وعمري ما هعرف أصدق إني بضيع طاقة نوستالجيا فظيعة على كائن مش حقيقي.. ومش هيهتم بحاجاتي التافهة وتقلباتي المزاجية التعيسة أغلب الوقت :)
