ملحوظة : كل جملة مش مرتبطة باللي قبلها لا من قَريب ولا من بعيد..
والبوست مش محتاج حد يقراه..
حتى العنوان اتكتب عشان الصورة اللي ف الأصل لا تعني شيء على الإطلاق ..
وبما إن الحياة مش عشوائية فهي تعني حاجة أكيد :D
 |
-لو الرُبع جنيه اللي (مش مخروم) كان فيه وِش مَلِلك.. كان هيبقى احتمال اني أروح أقعد في وسط البلد موجود بنسبة 50% وكنت هرجع أكتب حاجة عن ميدو مش بتتضمن اني بقالي كتير مشوفتوش واني مفتقداه تنين.. وانه ميعرفش اني مفتقداه وإني حتى لو شوفته كبيري هاسأله ازيك وخلاص !
-حد كان كاتب على تويتر النهارده ان فيه فرق بين انك تقول لها افتقدتك.. وآي ميس يو... ووحشتيني !!
-ورغم لساني اللي طوله 10 متر مع نوعية ناس معينين.. لسه فيه ناس من نفس النوعية بقف أدامهم متنحة مش عارفة ألضُم الحروف جمب بعض.. مع احتمال وجود فراشات داخلية واضطرابات فسيولوجية تؤدي لتلك الحالة..
-انا بحب فيلم أحلى الأوقات أكتر من المايونيز..هو عبقري جدا.. وفيه شيء ما لا أعلم كنهه بيربطني بيه..
-ملاحظة إن أفكارك بدأت تموت بسبب الناس..متخافيش وقولي اللي بتفكري فيه حتى لو قالوا عليكي بتتفلسفي ،
حتى لو شافوا انك غريبة عشان ممكن تقعدي ساعتين ف الزمالك بتدوري على نوت بوك جديدة،
أو إنك مش مقتنعة بفكرة ان حد يقعد ساعة ونص يتفرج على ماتش كورة لمدة ساعة ونص.. ومع هذا أنتِ عارفة من أعماق أعماقك إن من أمنياتك في النوت بوك الخضرا إنك تتفرجي على ماتش تنس لايف ياخد بتاع 3 ساعات تعويضاً لنقص اعتزالك المُبكر..
-وكمان اعترفي إنك اعتزلتي غصب عنك..محدش دخل الكلية ديه غير وضَحى بشيء ما..
يعني انا مثلا اهو بضحي بشابتر النانوتكنولوجي عشان اكتب بوست جديد !
-هو ليه مفيش وِلاد كتير مدونين أعرفهم؟ على رأي أميرة بستغرب جداً لما بلاقي حد مش بنت بيدون مع ان فيه مدونين رجالة كُبار وشباب.. بس مش كتير !
-لو كُنت ولد.. كنت هبقى شبه بنداري بنسبة 80% .. آه بجد فعلاً ..
من الجدير بالذكر إن عمر ما موقف يحصل وبيبقى ف دماغي تعليق من منظور تاني..غير لما يسبقني ويقوله.. !! هنقطع على بعض بعد كده..
-يارب كلهم ينجحوا يارب يارب يارب..
-حد يفكرني أكمل الجواب بتاع اميرة.. هي على وشك اغتيالي لو مديتهولهاش قبل م الامتحانات تخلص.. ده درس تعليمي في كيفية ان الكسل وِحش.. وحِش اوي.. لازم نصلحها ف نفسنا قبل ما نروح نقول كده للجونيورز
-ميم.. زي ما قلتلك أنت الوحيد اللي كنت معايا صادق ف الإجابة..و بصراحة أنا هزعل جدا لو متقبلتش ومش متخيلة هعمل ايه لو ده حصل.. لأني عارفاني وعارفة إني معنديش ثقة في أغلب الحاجات اللي بعملها فيبقى لما اكون واثقة من حاجة.. أكيد أكيد هي الصح.. أكيد انا اعرفني لتلك الدرجة..وانا عاوزة الخطوة ديه عشان هتخليني أحسن وهتخليني بساعد الناس.. أنا عندي مرض الرغبة في مساعدة الآخرين حتى لو ده هيخليني آجي على نفسي (وأكيد ده مرض بس معرفش اسمه العلمي)..
-وعارف.. من ساعة ما سألت السؤال إياه..وأنا مجاوبتش.. ومش عارفة أخرج الفكرة من عقلي.. أنا مش وحشة لتلك الدرجة حتى لو عملت حاجات وحشة..الأشخاص السيئين مش بيندموا والكويسيين بيغلطوا بس بيحسوا بالذنب ، صح ؟ أنا لسه كويسة؟
-ساعات بفكر إن تنكِر بِل الشهيرة بــ ماما.. كان لازم تعلمني اسامح الناس أقل وأقابل الإساءة بالحُسنى.. ومضُرش اللي يضرني عشان الوجع بيتردلنا بطرق مختلفة.. كان لازم تسيبني أسمع كلام تيتة أكتر وهي بتقول لي " اللي يضربك أضربيه" وتسيبني أحدف الولاد اللي كانوا بيغلسوا عليا فـ KG1 بالطوب..
-مؤخراً أكتشفت إني بقالي كام شهر.. غلبانة.. مش بشكل مبالغ فيه لكن مش طبعي أكون أليفة لتلك الدرجة..بقيت أخاف أوجع الناس زي ما بخاف أتوجع بالظبط.. وبما إن حاجات كتير بتوجعني فمباخدش ردود أفعال مناسبة على بعض الأشخاص القذرين وبسكُتُ.. بحاول أقنع نفسي إن ده مش عفو عند مقدرة.. واني على الأقل لازم أرُد وأوجعهم بكلامي قدر المستطاع.. بس بسكُت..وده بيستفزني جداً.. انا بستفزني !!
-ميم.. تأثيرك كبير وواسع المدى عليا.. ويتضح ذلك في استخدامي لكلمة تنين ، وعادة رمي الكوينز في الأيام اللي مش بعرف اقرر فيها هعمل ايه ، بالإضافة لمليون تفصيلة زوغيرة أُخرى زي صورة البوست كده ..خد بالك بقى من الإشارات السلبية واكتفِ بعلامات التعجُب ..وبلاش موتيفيشن الفرح، هتضيعنا.. :/
-وعلى فكرة يعني..الناس اللي بيضحكوا البنات اللي بتعيط..احتمال كبير اوي ان ربنا يدخلهم الجنة :)
..
دقت ساعة العمل.. نستكمل الجيلي كولا موود في وقتٍ آخر رُبما
