النور قطع أول ما مسكت الكتاب ومعنديش غير لاب مشحون جزئياً وبطارية أخويا اللي معرفش مشحونة أد ايه بالإضافة لبلكونة منورة ومش حَر اوي فيها 3 زرعات فُل وروزماري ونعناع بالإضافة لكيس مشابك وورد صناعي تنكر بِل حاطاه كتمويه وكأنه حقيقي..
إني واي قطع النور ده معناه وقت كتابة بوست لحد ما النور يرجع ..
ملحوظة: أنا عاملة نفسي ناسية ان فيه كشاف في الأوضة وكده.. ;)
عزيزي ميم..
النهارده كنت بفكر لما يبقى عندي بنت هحكيلها عنك ايه..ممكن أتخيل فكرة إن يبقى عندي بنت وممكن أتخيل ليها مليون اسم زي "اسكندرية" مثلاً وعن العلاقة المتبادلة ما بينا.. مش متخيلة إن هيبقى ليها أب بصراحة يفضل يلعب في شعرها كل يوم قبل ما تنام، زي ما كل الأبهات الكويسين بيعملوا.. ممكن أتبناها وأخلص من المشكلة ديه..أو جايز لمّا أكبَر شوية عقلي يستوعب الفكرة بس واحدة واحدة..العيال الصغيرين -أمثالي- مينفعش تصدمهم بمعلومات خطيرة زي ان اسكندرية هيكون ليها أب كده وِش مرة واحدة..
ميرا قالت لي اني ممكن احتفظ بالنوت بوكس بتاعتي واديهم لها في عيد ميلادها العشرين.. فكرة عبقرية..متهيألي لازم تشوف الجانب المراهق بتاعي ..ميرا بالمناسبة هتكون صاحبتي وقتها.. هتبقى الـ Godmother بتاعتها ..هتعلمها فرنساوي عشان أنا مش بعرف أنطق كويس وهتحفظها السِلم الموسيقي كأساس للبيانو والمزيكا ..بفكر أجيب مؤمن يعلمها أسباني وازاي تكتب اسكريبت كويس..بالنسبالي هعلمها تكتب وتقرا وتدور وتتوه وتجرب، تحب البوك ستورز وتشتري كُتب لما تكتئب أفيد من الشوبنج ! مش لازم تحب الكتابة وقت ما أعلمها، بس هييجي عليها مرحلة هتحتاجها، لازم ساعتها تكون مستعدة..
وأنت..!! مش عارفة.. هتعلمها كتير ده اللي انا واثقة منه..ازاي مثلا ترمي Coin لما تبقى واقفة في مترو ماركت ومش عارفة تختار أنهي حاجة أحسن !..ازاي تكسبني ف الشطرنج ف اسرع وقت ممكن ! ازاي تعمل تحليل منطقي عجيب للأمور مثلاً ! وازاي تطلع مني الكلام اللي مش عاوزة أقوله كله ! جايز تعلمها تحب علي طالباب (وهنا هقطع علاقتي بيك) الموضوع مش شخصي وقتها ده مستقبل جيل بأكمله ! هتخليها تحب STP بجنون.. حتى لو كانت قفلت وقتها، لأنك هتفضل توزع إيمانك بيها وللأسف هتعلمها طريقتك بتاعت الــ motivation لازم أقبل الأمر الواقع..محدش بيغير قدره :@
غالباً هقول لها كلام كتير حلو عنك من وراك وأسلمها الرسالة وأقول لها لما تلاقي حد زيك تقدر تثق وهي مغمضة عينيها قبل ما تسأل حتى عن الأسباب.. أصلاً اللي زيك مبيعرفوش يكسروا وعود عشان يكونوا احسن من التوقعات(او بحب أصدق ده)..واللي أكيد أكيد عنهم إنهم بيشوفوا كويس اوي ، بيسمعوا وبيلتمسوا أعذار، مش بيحكموا ولا بياخدوا مواقف حادة..هقولها إن عشان كده اللي زيك قدرهم العظمة مهما عملوا.
من الجدير بالذكر كمان إني في حالة من حالات ال serenity العظيمة.. بعد اليوم الجامد تنين بتاع النهارده ومع هذا كنت بفكر برضه في اللي حاساه (غير إني حسيت احساس الزومبي )
عارف لمَّا ساعات بييجي عليك لحظة تقول ما يمكن العالم مش بتلك العشوائية اللي أنا متخيلها.. يمكن بطريقة غير منطقية هو منطقي.. الناس اللي بتموت أو بتمشي أو بتنسحب من روحك فجأة..كل ده ليه حكمة أكبر من الوجع المصاحب للفراق
ديه حقيقة كبيرة..مش بتشوفها إلا لما تلاقي الناس اللي بعدت عنهم او بعدوا عنك بينجحوا وبيكبروا اوي.. ترجع تفكر ما يمكن انت اللي كنت تقيل وبتشدهم لتحت أو هُما اللي بيمنعوك تتحرر.. يمكن أنتوا الاتنين او التلاتة مكنتوش مناسبين كفايا في موقعكم..
لما تكتشف الحقيقة ديه متزعلش ابداً إن ربنا رسملكم الطريق ده وإن مش دايماً كل الناس بتبقى عاوزة تروح روما عشان كُل الطرق تودينا ليها.. بلاد ربنا واسعة يا اخي.. أفرح اوي عشان أخيراً شوفت المنطق من الأشياء..عشان كان نفسك تفهم وبتقول يارب فين الحكمة عاوز أشوفها وصبرك كان ليه آخر.. الحمد لله أنا حاسة برضا تام لأول مرة من قرون ده انا حتى احتمال اتصالح مع نفسي.. لوحليت كويس ف كويز الالكترو يعني :D
.................................................
من باب التدوين : أنا مبسوطة الحمد لله اليوم كان حلو اوي..عاوزة أكتب عن اللي فيه واحد واحد عن اني مستحيل كنت هبقى أكتر سعادة مما انا عليه مع ان قلة النوم بتقلب معايا باد موود اغلب الوقت..ومع اني أكتشفت في الكلية إني كنت لابسة فردتين شراب مش شبه بعض وكل ما بفتكر بضحك عليا (فَشَر.. ومين قال ان الشراب لازم يبقى شبه أخوه..ده اسمه تعجيز..)
المشروع كان مُبهر..المناقشة كانت مُرضية لتعبنا..انبسطت عشان شوفتهم بيتعلموا وبيشوفوا اجواء مختلفة لأول مرة..بحب بصة الفخر والانبهار في عيون الناس اللي بتعمل الحاجة لأول مرة.. حتى لو حاجة غلط..أول مرة بتكون مختلفة..
واللمة كانت أحلى حاجة في اليوم..الرغي في كل حاجة بحبها في الكون..الضحك..والناس اللي بينموا عليهم وانا معرفش هما مين..افتقاد ميرا لما سيرتها جت..انتظار بنداري عشان اطمن انه عمل كويس في المشروع .. مدحت وهو بيحرق الفيلم .. حُسام بيضحك عليا وهو بيحاول يثبت اني كيوت ولا مؤاخذة زي اللي بيقولوا "مش بتفرج بدلاً من مبتفرجش" و اني حاطة "هاللو كيتي" بدل"جريندايزر" في الفلاشة ، ومعرفش اي حاجة عن الـ sequential circuit ، حتى الناس اللي ميعرفوش اسمي وانا معرفهمش غير طشاش كلهم كملوا اليوم..الناس دول بيقولوا عليا مُبهجة وميعرفوش إنهم مصدر البهجة أساساً..ميعرفوش إن كل واحد فيهم عنده حاجة بحبها اووووي ومميزة اووووي ..متخسروش اللمة ديه أبداً ، فعلاً كنت محتاجة الوَنَس ده ومكنتش عاوزة أمشي..لدرجة إني متهيألي كان ممكن نفضل نرغي 3 ايام لحد ولما الكلام يخلص نعيده م الأول.. ومش هنزهق !
حبيت كل تفصيلة في اليوم.. شكراً عشان أنتم كما أنتم وكنتوا في اليوم ده بالذات..طاقة نور
.
