هناك لحظات على المرء أن يتصرف فيها ، ولحظات أخرى عليه أن يتقبل فقط..*
يعني هو أنا تقبلت ، ورميت كل الأسئلة وهديت ، بس مش قادرة أخلي قلبي يبطل يدق بشكل مضطرب كل ما أصحى الصبح ،ومش عارفة اتناسى إني مبقتش قادرة أتكلم مع حد ولا عندي طقطان في أي مكالمة تزيد عن 45 ثانية ، وإن كل ما حد يكلمني شات اسكت عند لحظة معينة ومردش واعتذر لاحقاً مُعللة إن حصل ظروف عندي وقفلت من غير ما أقول ..
حتى "هو" بقيت احط ما بينا حدود في الكلام بتمنعني حتى أقول له الكلام العادي وده شيء رخم جداً عشان "هو" بيفهم كويس ويمكن يكرهني أصلاً قريب ويبطل يقول لي يا ست البنات اللي عمري ما سألته يعني ايه (بس هي اكيد حاجة حلوة صح؟)
حتى "هو" بقيت احط ما بينا حدود في الكلام بتمنعني حتى أقول له الكلام العادي وده شيء رخم جداً عشان "هو" بيفهم كويس ويمكن يكرهني أصلاً قريب ويبطل يقول لي يا ست البنات اللي عمري ما سألته يعني ايه (بس هي اكيد حاجة حلوة صح؟)
.............
ميرا قالت في مرة Don't trust a boy ، و"هو" قال لي إن الثقة في اللي أدامك 90% بتيجي من ثقته فيكِ سواء ولد أو بنت..أنت غلطان على فكرة ،والثقة أمر شخصي ملوش علاقة بالناس..
............
لولو كانت بتحاول تخليني أحسن وعملت لي سويسرول فاشل للغاية وكان بتفكر فيا لدرجة إنها كل شوية تفكرني بحاجات مش عاوزة افتكرها ثم ترجع تعتذر لي ، أنا ضحكت أدامها عشان متحسش إني حالتي صعبة واعتمدت اني حافظاها اكتر ما هي عارفاني وفضلت أهزر لدرجة انها قررت تصورني عشان تحسسني إن الحياة بينكي ، محاولتها منجحتش بتاتاً بس بصمد علشانها...بصمد عشان لما اقع محدش هنا يسندني ويمسك ايدي..
..........
كل يوم بالليل أقرر إني هنزل الصبح واروح الـ meetings بتاعتي وأرهق نفسي في الشُغل واتناسى أكتر بس مبقدرش..الصبح دايماً هو الأصعب ووقت النوم أكتر صعوبة مش محتاجة أقول ! بس يمكن في وسط الزحمة في النص بتعايش حتى لو مش قادرة أتكلم أو مش عارفة..
.........
و أكتشفت امبارح من ناس معينين إني اتغيرت ، اتغيرت اوي في تفكيري وردود افعالي وتمثيلي حاجات انا مش حاساها فعلياً ، ده مبينفيش التصرفات الغبية اللي بعملها ، بس مش بإيدي (مهو لو كان فيه زرار كنت هدوس عليه وامنع نفسي) كلنا غصب عننا..كلنا في الوجع سواء
.........
ناقص لي حاجات صغيرة دلوقتي متعلقة بالتقبُل للواقع ، زي إني استوعب كلياً عدم وجود إجابات لأسئلة كتير مش مصيرية ،و زي اني مش هينفع اهرب لاسكندرية الاجازة ديه رغم إني حوشت فلوس للهروب الكبير، وإني مش هاكل بطاطا سُخنة في وسط البلد برضه الشتا ده ، وإني مش هبدأ في الرواية قريب ، وإني لازم أنزل اجيب البيجاما ( نرمين عندها واحدة شبهها لما كنت عندها وريتهالي :) )
.............
ورغم إن عندي اختيارات كتير اسهلها الانتحار ، فباولو قال لي النهارده الصبح وأنا بفتح النوتة الزرقا:
"في هذه الحالة يكون أما فارس النور خيار واحد هو أن يتابع حربه الفاضلة ويتلو صلواته منطلقاً من واجب أو خوف أو مهما تكن الحالة لكنه لا يتخلى عن المسار". *
..............
يارب ثبتني
ويارب أحمد يرجع بالسلامة من الشُغل ..عشان أنا خايفة عليه اوي :(..وموجعة م اللي بيحصل
ومش عارفة أروح فين.. معنديش مكان غير هنا
.............
فارس النور-باولو كويلهو *
