مش عارفين نضحك، كل ما بنضحك الوجع يشد الابتسامة لتحت فتختفي
بنحاول نضحك...بنزُق الوجع بشويش واحدة واحدة على الجمب...
يمين سِنة أيوه لا شمال سنِتين ...ممتاز
كده ركننا الوجع على جمب وهنبتسم شوية حلوين
:)
...................
عارفة إنها سفرية قد لا يكون ليها لازمة...لكن مفيش سبيل للتراجع
عارفة إني مش هيجيلي قلب أدعيلي هناك فهدعيلهم كلهم ومش هنسى حد
هحفر أسمائهم ودعواتهم جوا قلبي
يمكن تنفعهم الدعوات ديه....لو ربنا سمعني
...
هيمشي الحال...خطوة يمين وراها خطوة شمال..زي أول مرة أتعلم المشي..اليوم هيخلص
ويوم ورا يوم ورا يوم...الأسبوعين يخلصوا وهرجع تاني
الموضوع مش كبير..مش كإني هعيش هناك للأبد!!
دول يادوبك كام يوم..
مبحبش المطارات؟؟ وفيها ايه المطارات كانت عملتلي ايه وحش في حياتي؟
على رأي الرفيق العزيز ليه بنحَمِل الأماكن ذنب البشر
ومع ذلك هحط مزيكا حلوة في الطريق للمطار..عشان منسمحش للدموع تغلبنا
وهاخد النوت بوك والمشبك بتاع جيجي وسلسلة سارة...فهيبقى معايا الناس اللي بحبهم في شنطتي وقريبين مني..
ثم إني سافرت قبل كده ولوحدي مرتين على الأقل..محصليش حاجة! عادي يعني
....
عارف أنتَ لما تحط خطة لحياتك زي الفُل..متخرش الميه..زي ما بيقول الكتاب
وفجأت تلاقي الخطة الأساسية ضربت منك!!..ومش محتاجة أقولك إن الخطط الثانوية هي التانية فرقعت في وشك
بقيت ماشي بدون خطط ..وده_ على حسب ما قالولنا في الكلاس واحنا زوغيرين_ مش تفكير علمي نهايته الحتمية الفشل والضياع ..
مش المشكلة في إنك تمشي حياتك كلها بدون خطط ،بس المشكلة إن العالم ليه أبعاد كتير غير اللي أنا عارفاها ،شايل مآسي فوق ما خيالي ممكن يوصل!!
السنة ديه..أنا بطلت أحط خطط، هكتفي بقايمة الأمنيات بتاعتي وهنفذ منها قدر الإمكان، والأمنيات المؤجلة تتحط لقايمة السنة اللي بعدها ،السنة ديه مش هعيش لنفسي عشان كده القايمة مكنش فيها كتير أمنيات ليا_أي نعم لسه مكملتهاش_بس مبدئياً عارفة إني خرجت نفسي من دايرة الــ أنا...
مش عارفة بالظبط أنا بكبر ولا بصغر..بس أنا بحاول أتعلم وأجرب حاجات جديدة وأتغير..
ملحوظة: أنا مبسوطة ،ومتفائلة ، وكويسة ، ومش هتراجع عن ولا قرار أخدته في الفترة اللي فاتت
ملحوظة تانية:
" إن الذين قالوا ربنا الله ثم استقاموا تتنزل عليهم الملائكة ألا تخافوا ولا تحزنوا وأبشروا بالجنة التي كنتم توعدون"
يارب
.
.
تمت
:)
