غريبة أوي..!!

* * * * * * * * * * * * * * *

رجعت من جديد من بعد حالة اكتئاب بجنان إلى حالة ازبهلال باستغراب..!!!

معلش معلش هما بتوع الثانوية العامة كده على طول بيشدوا ف شعرهم وده دليل ع الذكاء عشان بيبقوا شبه اينشتين :)

ندخل ف الغرايب اللي بفكر فيها بقى..

غريبة أوي ليه دايما لما بنسمع كلمة دموع بنفكر ف الحزن والاكتئاب

ليه وجهة نظرنا إن الدموع بتعبر عن الحزن، الوحدة، الغضب ،

الخوف ،الأسى مع إن على طول الدموع ملازمة الانسان من ساعة ما يتولد،

كمان الغريب اننا لما بنكون مبسوطين اوي بنبكي ، ولما بنحب حد اوي بنبكي ،

ولما بنحس بغيرنا بنبكي ...حتى لما بنقشر بصل بنبكي برضه ^_^

يبقى ليه ربطنا الحزن بالدموع مش بنفكر ف الفرح ..

.بيتهيألي ده سوء تقدير ليها ..


غريب اوي إن المستحيلات بتتضمن الخل الوفي مع إن فيه اصحاب كتير

أوفياء ممكن يضحوا بنفسهم عشان أصدقائهم وبيفضلوهم على نفسهم وعلى أي حد ...

أنا يمكن معرفش اللستة بتاعت المستحيلات ديه مين اللي قالها

وقالها إمتى ....؟ بس لو فكرنا هنلاقي إن الزمن والتاريخ بيشهد

على أصدقاء أوفياء بجد وأعظمهم سيدنا أبو بكر وقت الهجرة

وف كل الاوقات كان وفي جداً مع _الرسول عليه الصلاة والسلام_ وعمره ما خذله.

وبرضه غريبة ان المستحيلات تضمنت العنقاء والغول

ومتضمنتش مثلا ابو رجل مسلوخة أو ماري الدموية..

غريبة اوي ان الناس بيقولوا فاقد الشيء لا يعطيه مع ان ده مش شرط

بالعكس وخصوصا الأمور الحسية

ففيه بعض الناس معاشوش في رحمة او حب او تسامح ومع ذلك قدموا كل الحب

أطفال أتحرموا من حرية بلدهم ومع ذلك قدموا حرية النفس واحترام الوطن

والعكس فيه ناس عاشوا الحب بالكامل وماقدموش غير الدمار والحرب ،فده مش مبدأ ابدا

مع احترامي لصاحب المقولة فانا هفضل اقول

"فاقد الشيء يعطيه ونـــص"