نموت نموت ويحيا الجنيه..

طبعا مادام العنوان فيه جنيه يبقى غالبا هتكلم عن بنك...بس الغريب إني هتكلم عن ميني باص
اللي بيركبوا كل الناس الطبيعية او اللي مبيعرفوش يسوقوا العربية،،
موقف اعجب م الخيال...خناقة على جنيه _ياريت على دولار كنت اقول عندهم حق_ والضحية هما الناس اللي راكبين ملهمش ذنب.

أحد الركاب بعت 10 جنيه لحضرة السواق والمفروض ان الباقي 8,5 بس لسبب ما السواق بعتله 7.5
ومن هنا قام الراكب من ورا وطلع للسواق ادام وهنا تظهر الجنتلة وكرم الاخلاق بدأ الراجل الكلام بهدوء كأي خناقة ثم تطور الوضع وبدأنا نسمع عبارات سب وقذف والناس طبعا غير مستوعبين ايه اللي بيحصل؟؟!

وبعد السب والقذف انتقلنا للمرحلة التالتة وهي"الضرب" الاستاذ السواق اتضرب بسبب ......الجنيه ،،
طيب قولولي السواق هيسكت... أبداااااااااا ده جري ورا الراجل وساب الدنيا كلها...يا حوستي...!!!! هنروح ازاي يا بنات طيب مين اللي سايق دلوقتي يا طنط حد يلحق الدريكسيون ...طب اجي اسوق انا..؟

وفي لمح البصر الباص وقف وبأسرع من السرعة السريعة لما تبقى سريعة رفع السواق السلاح القومي اللي ظهر حديثا بداية من بوش وحتى مجلس الشعب إلى داخل الباص...الجزمة مقاس 45

وطبعا لتهدئة الموضوع الراكب اللي بيتخانق بسبب الجنيه الناس طردوه عشان يهدوا الموضوع ولكن السواق انطلق وراه والله ما انا سايبك......سيبنا احنا ومتسيبوش يا استاذ اسطى احنا مورناش حاجة

وبعد لحظات رجع الاستاذ فلحوس السواق وهو متعور في دماغه والناس بدأوا يهدوه وانطلقت عبارات زي:ده قليل الادب،،،، وحد الله يبني،،، خلاص اللي حصل حصل ،،، ربنا يهدي
لكن من الواضح ان السواق مستبيع وكان عاوز ينتحر ...كل ده ليه؟بسبب الــ جنيه
وبسرعة كبيرة جدا دخل السواق ملف والميني باص كان هيتقلب...بس ربنا ستر

كان نفسي اعرف هنا فين التسامح والاخلاق والجنتلة كل ده بسبب جنيه ادفعه انا بس اروح سليمة في بعض الناس عاوزني

ااااااااه ياني منك بقى انت يااللي شبه الـــ شلن تعمل فينا كده امال لوكنت جنيه دهب كان ايه اللي حصل..
يعيش الجنيه واحنا مش مهم...