14.4.11

مجاديف مكسرة


الكلام وقع مني امبارح ومعرفتش الاقيه
وقع واتكسر
ومسبتش حد يلمه ..جيت ألمه انا اتعورت
ومعرفتش اجمعه من تاني

الصداع كان نصفي قاتل الفجر خلاني منمش بسهولة
قمت الساعة 8 لقيت دماغي هتنفجر
وبكل تمكُن مسبنيش لحد ما سيطر على دماغي كلها

النسكافيه كافيينه داب مع السكر
في كوباية تانية غير اللي بشربها
ومبقاش ليه طعم..بقى في كوبايتي نسكافيه بلاك
بدون سكر ولا حتى كافيين...!

الميوزيك بتستفزني عشان اعيط..
بس الدموع خلصانة..
والصداع مستمر ف الازدياد ..متحاوليش

حل المسائل مبقاش ليه اي تأثير على سعادتي
والانجلش لأول مرة ف حياتي
مش عاوزة احفظ الــ
reading

الاستيكة مش راضية تمسح الشخابيط بتاعتي
مش عارفة أعبر..واقلامي بتاعت الرسم خلصت

كل الناس ادوني أمل كداب ..كلهم وجعوني اوي :(
من غير قصد

يارب ابعتلي شمعة..
ومسكن..
وحالة من اللاحرب..
ضروري اوي

ليست هناك تعليقات: