-آلو...
- أيوه
-رضوى طارق معايا؟
-أيوه.. مين عاوزها؟
-احنا المجلس العسكري. سعادتك وصل لنا أخبار إن النهارده مش يوم كويس عندك وعينيكي وارمة من العياط امبارح بالليل، ولما اتشافتي في الكلية النهارده كانت حالتك صعبة جدا وده خلى الحزن يتسلل في نفس المجلس العسكري اللي بيهتم بالمواطنين وحالتهم النفسية الحرجة وبيحاولوا يبذلوا أقصى طاقتهم في تحسين المود السيء عند الشعب الحر.
-فعلا؟ ده انتوا طلعتوا طيبين اوي عكس اللي بيقولوه عليكوا.
-اه طبعا طبعا.
-كده ممكن انتخبكوا المرة الجاية مادام بتهتموا بالمواطنين وبتجيبولهم تذاكر حفلات هدية.
-اكيد...وطبعا مش هنوصيكي الدايرة الواسعة بتاعت سيادتك تنتخبنا هي كمان...يعني الفولورز بتوع تويتر والفريندز ع الفيسبوك
-دون ذكر المدونة بالكام ألف فيو عليها..
-ما شاء الله نبيهة، بالظبط كده ربنا يبارك ف سعادتك...وبعدين كنا بنقول امبارح إن ربنا بيجبُر الغلابة...وأنتِ من الغلابة واحنا بننفذ إرادة ربنا في الارض..وكنا جايين وهدفنا نجيب التلت نقط والحمد لله ربنا كرمنا :D
ولو فيه حد مضايقك قوليلنا بس واحنا هنحبسه..
-لا مش عاوزين نتعبكوا.. ممكن تسيب الحبس ديه علينا، أنتم شئون خارجية واحنا داخلية.,
-لا ديه حالة طواريء فاشطة يعني احنا بنعمل كل حاجة.
-طيب...انا ممتنة للغاية دلوقتي.
-ممتنة!! معلش يافندم انا مبفهمش اللغة ديه..حضرتك كاتبة كبيرة واحنا أغبياء.
-ايه... انت غبي؟!!!
-لا لا مش أنا هما :D :D
...................
وهكذا يتضح من المكالمة السابقة إن رضوى مش كويسة،
وإن المحاولات مستمرة لتخطي الأجواء القاتلة بالبطيء...وبقالي 30 ساعة مأكلتش ولا قربت لأي حاجة بتعدي على الجهاز الهضمي الغضبان وعايش في تراجيديا ملحمية مُبالغ فيها وهذا لأسباب لا استطيع البوح بها بعد، ولأن -بصراحة يعني- الكلام المنطقي هيوعجني أكتر من الحدث نفسه،
وأنا بشفق على نفسي من كم الحقايق اللي اتكشفت في ساعتين من حياتي ومحتاجة اتعامل معاها لوحدي، وبحاول أصالح أجهزتي التنفسية والهضمية عشان يعني مش هيبقى انا والزمن عليا.
ومحتاجة الزعل يخلص لوحده بسرعة لأن ورانا حاجات كتير محتاجانا ننبسط بيها، وخطط محتاجانا نحطها أو ننفذها، ومغامرات ومذاكرة مواد بنحبها، وصحاب ناخد بالنا منهم، ومقاومة للعالم الخارجي اللي بيسحب السجادة من تحت رجلينا ومحاولات يائسة للتصالح مع البلاد والأوطان الصغير منها والكبير.
....................
ونحب نقول ايه قبل ما ننام النهارده؟
يارب أنت عارف وأنا عارفة مش محتاجة كلام بقى.. :)
