يا هند.. الوجع مبيخلصش يا هند

الوجع هيطاردك لو هربتي منه لنص الكرة الأرضية التاني

قلت أكتب يمكن الكتابة تريح

وقلت احرق اللي كتابتة يمكن موت اللي اتكتب هيريح

ومفيش حاجة بتريح يا هند

محدش هنا ، الكرة الارضية فاضية ،الحزن والهم بيمصوا روحك بالبطيء وانتي مش عارفة تعملي حاجة

حطي وشوش بتضحك هنا وهناك.. ضحكيهم .. خليكي المُبهجة ونوري ادامهم

بييجي اللحظة اللي كله بينطفي.. بتيجي اللحظة اللي كل قواكي بتنهار

وبعدين ييجي حد يقولك حقيقة ان ضحكك مزيف امبارح و تستوعبي النهارده..متعرفيش تعملي حاجة

يخربيت العجز 

ويخربيت الوجع

ويخربيت اللي مبيفهموش ومبيحسوش ف ساعة واحدة

انا مش عارفة احكي ومش عاوزة اتنيل احكي

ومش عاوزة ناس.. يا هند مش عاوزة ناس 

...........

قوليلي انتي بس حسيتي بايه.. قوليلي انك متوجعتيش وانا هحس احسن

قوليلي ان مفيش وجع هناك وقوليلي انك كويسة ومش زعلانة مني..

قوليلي انك مشوفتيش نفسك بعد اللي حصل عشان ابطل اتخيلك في اسوأ صورة

ابطل اشوفك بتعاني 12 يوم لوحدك..

هتخيلك بتضحكي وسليمة زي اخر مرة شوفتك.. 

هتخيل ان كل حاجة تمام ..وهعرف انام ساعتها

العالم مكان بشع اوي..وانتي متستحقيش كده

............

متقلقيش عليا

انا مش خايفة دلوقتي انا موجوعة.. موجوعة اوي بدرجة لا تحتمل ولا تتوصف

 يا هند قوليلي الوجع بيمشي ازاي..

يخربيت العجز والمسافات والموت والوجع والكلام ستين ألف مرة.