8.9.13

زُق الوجع.. وانبسط



السعادة هي إنك بعد يوم طويل، مريع، ومرهق .. ترجع بيتك ترمي هدومك مرة واحدة وتشغل مزيكا حلوة وأنت بتاخد شاور دافي مُشبع بريحة خشب الصندل اللي مسام جسمك بتربطه بالانبساط كويس ،وبعدين تشغل التكييف وتاكل بطاطا سخنة وأنت بتتفرج على فيلم حلو على الشاشة ال LCD والبيت كله مضلم ومطنش المخلوق اللي اسمه موبايل تماماً مادام خلصت الشغل.

السعادة هي إن ماما تعمل أكل حلو في يوم أخويا بايت فيه في الشغل عشان صحيت رايقة.

السعادة هي إن نتيجة التحاليل تيجي وتكتشف إنك مش عيان اوي ولا حاجة فتحمد ربنا عشان مشكلاتك الكبيرة قلت واحدة ،وهنا يزيد إحساسك بسوبرمان اللي جواك بشدة..

السعادة هي فستان سهرة أسود لفرح سارة ومعاه شنطة وشوز سوارية بكعب عالي، وشبشب فلات ملون بصوباع للبيت!

السعادة هي قرار جري الساعة 8 الصبح في نادي الجزيرة ،وصباح الخير لكل واحد بيرُش الجنينه عند التراك، وصوت فيروز جاي من الراديو لتوفير مجهود في اختيار للأغاني..ومن ضمن الـ 700 أغنية اللي عندها عُمر ما الإذاعة غيرت وجابت أغاني مختلفة عن بتوع كل يوم، شادي لسه هو هو بيضيع!

السعادة هي إنك تحط مبدأ جديد مهم للغاية في حياتك وعن إقتناع تام ، يتلخص في: "اللي عاوز يعمل حاجة بيعملها مهما كانت".. اللي عاوز يبقى معاك هيبقى معاك ولو شايف إنه مفيش طريقة يكون معاك بيها المفروض إنه يخلق طريقة ويوصل لك، اللي عاوز يمشي معاك سكة ومش عارف، هيشتري عجلة عشان يحصلك.. اللي عنده شجرة فُل بتطرح له كل يوم مينفعش يقول إنه إداها كل اللي عنده ويبطل يسقيها أو يقرر يرميها في حوش بيتهم بدل البلكونة!

السعادة لما تفطر مع حد كان واحشك وتحكوا في كلام فاضي لمجرد الرغبة في إنكم تشوفوا بعد وتحاولوا توصلوا المسافات المقطوعة بسبب الوقت.. وترجعوا تقربوا خطوة بخطوة .. 

السعادة إنك تيجي على نفسك وتعمل حاجة مش بتحبها عشان عندك باشون إنك تكبر في الحاجات اللي مبتحبهاش حتى وتبقى أحسن مما تعتقد يوماً ما..

السعادة.. لما تلاقي واحدة متعرفهاش كاتبة إن نفسها تتعرف على رضوى بتاعت التقارير من ضمن الحاجات اللي لازم تعملها قبل ما تموت!

السعادة إنك تفكر على آخر اليوم وأنت بتفرغ انترفيوهات اليوم في ملفات وورد.. أد إيه أنت تستحق الحُب والانبساط اللي هينوبك لو كتبت عن الانبساط وداريت الوجع اللي في العمق الليلة ديه على الأقل..