نمت خايفة اوي ..
-الدولاب بتاعي بقى زحمة اوي ..كل شوية يحطوا فيه حاجات ومسابوليش مكان فاضي يسعني
فمعرفتش أروح فين بالليل.
-تعرف إن الحاجات اللي بتخوف مستخبية تحت السرير..بس ازاي ممكن نطردها؟!
ممكن نطردها لو حافظين تعويذة الباتروناس
بشرط يكون معانا عصاية سحرية...........لكن للأسف معندناش
-امبارح
كنت عاوزة أعيط اوي بس معرفتش ..ولما صحيت قبل الفجر معرفتش ارجع للنوم تاني بسهولة
-هوا أنا قلتلك قبل كده إني لما بقول أي كلام بيبقى حالتي النفسية ايه بالظبط؟؟
غالباً بتبقى أسوأ من لما بقعد ساكتة..
وأنا بعمل ايه دلوقتي؟؟ بقول أي كلام عشان مقعدش ساكتة
-أنا مش عاوزة أغمض عيني تاني واعمل نفسي مخدتش بالي..
وبعدين أرجع اكتشف إن كان لازم آخد بالي وأوقف كل حاجة عند حدها
أنا متعصبة أوي م اللي حصل :/
ويمكن ده السبب الأساسي لعدم الاتزان والقلق ده..
عشان ربطته بحاجات تانية
-مش لاقية مكان محدش يشوفني فيه معنديش أي حصون ودفاعات..
عاوزة أجري بعيد عن الدنيا كلها..بس معنديش طاقة كفايا
-ياريت بس لو كان عندك مكان فاضي في دولابك تخبيني جواه
يمكن الخوف ميعرفليش طريق تاني!
.................
الامتحانات ماشية لحد دلوقتي كويس يعني نوعاً ما لسه فيه أمل أوصل
لو استمريت بنفس المستوى...
الشيء المبشر إني موصلتش لدرجة الفزع لسه الحمد لله
مأجلاها للصعب اللي مجاش بس هييجي لا محالة..لازم هييجي
