عادي جدا تتألمي ده جزء من كونك انسانة
هتنسي هتنسي
بقالك سنين بتقوليها لنفسك
بس انتي كذابة
مش هتعرفي تتصلحي ابدا
ومش هتعرفي تحبي نفسك
ولا هتعرفي تبتسمي بجد تاني..
هوا الألم ليه مبيخلصش؟
بقولك ايه متفكك بقى م الأفكار ديه
بقالك يومين بتحلمي أحلام مش حلوة
وبتضيعي الاربع ساعات اللي بتناميهم ع الفاضي
وبعدين يعني؟
هو انتي ليه بقيتي تتخضي بسرعة كده
وكل ما تمشي في حتة تتلفتي وكأنك متراقبة
اطمني خلاص حلّوا أمن الدولة
ومتبقاش غير هواجسك الداخلية اللي عمرها ما هتنحل
بطلي تكسري مجاديفي كده
انتي مش ملاحظة انك تقريباً بتقتلي نفسك عشان متلقيش وقت فراغ
من دروس لمذاكرة متواصلة
لخروجات
لمحاولات للنوم لأطول فترة ممكنة(يعني 6 ساعات)
ودرس العمارة..مع انك مستبعدة انك هتستخدميه
مش ده جنان؟؟
صحيح..
هو ممكن حد يتعور بسكينة من غير ما ينزل دم؟
ليه لأ ما انتي متعورة بـ 3 سكاكين ومش بتدمعي حتى
عندي أعراض قلب مكسور ومتدمر
بس انا مش مكسورة فعليا
لو احنا اللي كسرنا حاجة بايدينا ده مش معناه اننا بنئذي نفسنا
تفتكري يعني انك لما نمتي في البلكونة بالروب في البرد وعييتي
مكنتيش بتضري نفسك
تؤ أنا بس كنت بعاقبها عشان تفوق
وفاقت؟؟؟
ممكن تقولي اني عاقلة اوي لدرجة الجنون
مش مبدعة في كل الحاجات اللي حواليا
بس اللي مش بعرف ابدع فيه بعرف اتعلمه
ليه مش فاهمين اني مش بعرف اعبر عن غضبي غير كده
ليه مش بيعلموني اي حاجة غير الصمت ليه؟
أنا محبطة وزعلانة أوي أوي أوي أوي منك
وخايفة اوي برضه بس مش هقولك
نفسي في كوباية لبن كبيرة..ودوا منوم..منوم للأبد
نفسي في حد يقولي خدي بالك من نفسك
عشان انا مش عاوزه اكرهها كده..
الحقيقة وملخص الكلام
أنا مش شايفاني من غيرك سايبني لوحدي ليه مش عاوزة ابقى لوحدي:(
