18.1.11

رغي مع كوباية لبن

هفتح الكومينتس بس اعذروني لو مردتش عليها..وارجو الابتعاد عن الكومينتات المثيرة للشلل..ولو معرفتش تقول حاجة أو كسلت تكمل قراية حط سمايل وامشي ...كدهون :) :) :)

آخر مرة كنت معاها في المستشفى..
عملت حاجات كنت بخاف منها وكنت فاكرة اني عمري ما هقدر اعملها
ولما هي لاقتني بسطانة بزيادة وانا بحكيلها عن اللي عملته


قالتلي: ربنا خلق البنات كده
فيهم قوة مش موجودة في الرجالة مجتمعين..
خلقهم بحواس داخلية وغرائز

خلقهم بيمسكوا في الحياة أول ما يتولدوا مهما كانت حالتهم صعبة

طول حياتنا بنسمع عن بنات لسه مولودة قبل ميعادهم 
والدكاترة بيرجحوا موتهم بس هما بيكافحوا ويعافروا
ويبقوا كويسين ويعيشوا حياة طبيعية

مصدقتهاش..كنت ببساطة متخيلة البنات
كائنات رقيقة وهشة للغاية
بتتظاهر بالقوة لاخفاء ضعف كامن جواها

دلوقتي بس صدقتك..في 3 أيام بس غيرت رأيي..
البنات أقوياء اوي
ربنا خلقنا كده..وانتِ ربتيني على كده
في المواقف الصعبة بيبان..
في اكتر وقت المفروض نقع فيه بنقف أحسن من أي راجل

...............

جدو على طول كان بيقولك ان ربنا بيدي البرد على أد الغطا
وانتي على طول بتقوليلي الجملة ديه

الحمد لله يارب انت مديني غطا كبير اوي
ممكن ديه تكون من أقوى التجارب اللي حطتني فيها
والحمد لله عشان خلتني آخد بالي من مشكلة كبيرة فيا..
مشكلة ظهرت مع احتياجي لناس حواليا

عشان كده بقولك بكل ثقة أنا آسفة يارب
آسفة...عشان عاملت الناس معاملتكش انت
عشان قلت (انا استحق اكتر من كده) لمخلوق بشري
انا مستحقش اكتر..
ولو استحق انت عادل هتديني حقي بالكامل  
كنت فاكراه حق مشروع ان الناس تعاملني
زي ما انا بتعامل معاهم 
تديني اللي محتاجاه من غير ما اطلبه..
تشغل ذكائها شوية

كنت فاكرة ان القريبين مني
لازم يبقوا معايا زي ما انا مبتأخرش عليهم
كده غلط...عمري ما قارنت نفسي بحد..
عشان كده أنا آسفة يارب


بس برضه تعرف ظهرلي اللي بيهتموا بجد..
واللي بيسمعوا بجد وبيفهموا صح
اللي واثقة جدا انهم مش هيخذلوني
لو صحيتهم في نص الليل أو في آخره
بسبب نوبة فزع أو حلم وحش
على اساس اني ممكن اعمل كده مثلا :)

...........

سارة كانت بتسألني ايه سبب التفاؤل
اللي جالي فجأة ده أول الأسبوع..ومكنتش عارفة ليه
بس دلوقتي فهمت..
هقولك يا سارة الحكمة اللي شوفتها الجزء البسيط اللي اقدر اشوفه
وفيه جزء تاني عجزي كانسانة هيمنعني افهمه

كان لازم ربنا يأهلني لباقي الأسبوع  للاختبارات ديه كلها
كان لازم يديني أمل..والأمل يديني قوة
الحمد لله ..مكنتش عارفة انها خطتك ليا
وانه قدري علشان اصبر
وعشان استقبل كل المواضيع بهدوء أقل من حدتي في العادة

..................

انا مش مضايقة اني لوحدي ..اني بنام وبقوم لوحدي في البيت..
انا بطبعي مستقلة ومبخفش من الوحدة المادية..مش هشيلكوا همي أبداً

انا بس  كنت متضايقة عشان السمك
مكنش راضي ياكل مني أول يوم..خفت يموت بسببي
ماما مش هنا تأكله ..وهم مش متعودين عليا

وكمان كنت متضايقة عشان محدش بيطمني
كل ما اتصل عشان الاقي معلومة تطمني بيجيلي نفس الرد..الحمد لله
هوا الحمد لله طبعا..بس انا عاوزة اطمن..

.......
حاسة احساس غريب..قلق وهدوء في نفس الوقت..لأ انا تقريبا مش حاسة
بقيت سفنجة..بمتص اي صدمة واعصرني في آخر اليوم

أنا بشرب لبن متلج..مش عشان انا مكتئبة..
بس عشان مش لاقية حاجة تانية اعملها

عشان لو ماما كانت هنا في البرد ده كانت هتعملي سحلب
وأنا مش بعرف السحلب ده بيعملوه ازاي
كده يا ماما نسيتي تعلميهولي
ينفع كده تشربيني لبن وانا مش مكتئبة؟ :(

...........
مفيش حاجة الحمد لله 
كله هيبقى تمام ..واللي وقفوا معايا مش ناسياهالهم بجد
واللي ببساطة (عارفين هما عملوا ايه)..شكرا انا مش زعلانة 
بس وعد مش هطلب منكوا اي حاجة في حياتي..ولا هتوقع حاجة
أنا عملت اللي عليا عشان خاطر ربنا..
بس انتوا معملتوش اي حاجة عليكوا
ومديتونيش اسباب عشان اسامح..

وبس كده ..هقوم انام واذاكر علم النفس الصبح..
اشك اني هلحق أخلصه على معاد الدرس بس لسه راجعة من بره ومرهقة جدا
بس عادي مش مهم لو ملحقتش..
كمان ناقصلي فيزيكس كتير ورياضة فوق مما اتخيل..
هتصرف كالعادة ان شاء الله

تصبحوا على خير او صباح الخير (على حسب التوقيت الشخصي)

هناك 6 تعليقات:

Heidenröslein يقول...

بقالي كتير معملتش كومنت هنا بس متابعاكي على طول يا رودي
:))

مش هقولك الكلام المعتاد هوا ده اللى انا حاساه وكده بس بجد يا رب تبقى على طول مبسوطة وتلاقي ناس كتير جنبك ويعينك على الثانوية .. وشدي حيلك :)

أنا بس حبيت أسلم :D

مصطفى سيف يقول...

ده اول مرور ليا في مدونتك واتمنى ميكونش تعليقي زي التعليقات اللي بتقولي عليها
اولا اسلوبك و سردك في منتهى الروعة حسيت فعلا بالحزن والالم من احساس طاغي بالوحدة
عجبتني جمل كتير فيها فلسفة جميلة زي
ربنا خلق البنات كده
فيهم قوة مش موجودة في الرجالة مجتمعين..
خلقهم بحواس داخلية وغرائزخلقهم بيمسكوا في الحياة أول ما يتولدوا مهما كانت حالتهم صعب

وعجبتني اوي جملة ربنا بيخلق البرد على اد الغطا
الجملة دي فيها ايمان كبير ودليل على رحمة ربنا
في المجمل والخلاصة الوحدة اقسى شعور في الحياة وافتقاد الوالدين الم وحسرة
ربنا يهون عليكي ويقويكي على المرور من الصدمات وربنا يشفي والدتك ويرجعها بالسلامة
تحياتي وتقديري وامنياتي ان ربنا يعينك في مذاكرتك ومواجهتك للوحدة

samamasr يقول...

ربنا معاكي يارب

Ramy يقول...

الأول اللى فهمتوا

ان ماما تعبانة شوية

تقوم بالسلامة قريب بأذن الله

البنات قوية!!!

ايوة قوية انا عارف دة من زمان

و أتأكد ليا دة مع أختى (:


انا مش مضايقة اني لوحدي ..اني بنام وبقوم لوحدي في البيت..انا بطبعي مستقلة ومبخفش من الوحدة المادية..مش هشيلكوا همي أبداً
انا بس كنت متضايقة عشان السمك مكنش راضي ياكل مني أول يوم..خفت يموت بسببي
ماما مش هنا تأكله ..وهم مش متعودين عليا
وكمان كنت متضايقة عشان محدش بيطمني كل ما اتصل عشان الاقي معلومة تطمني بيجيلي نفس الرد..الحمد للههوا الحمد لله طبعا..بس انا عاوزة اطمن..

عجنى الجزء اللى فات دة جداً
انا عارف ان انتى مش كاتبه حاجة ادبيه
لكن المشاعر فى الجزء دة جميلة
طفولية زى ما لازم تكون (:

شعورك بربنا صح

ربنا يطمنك و يوفقك

يا رضوى

يا طالبه مش مقهورة (:

(:

شمس النهار يقول...

مقدرة كل مشاعرك
وكويس انك كتبتيها علشان ترتاحي

وايوة البنات ربنا خلقهم في منتهي القوة علشان الامومه محتاجه قوة الام هي اللي بتسند البيت كله

وان شاء الله كله هيبقا تماااام

ريحانة الاسلام يقول...

:)
على فكرة مش حسيت ان كلامك فيه اكتئاب زى ما حاسة فى الكومنتس انهم بيعلقوا ان عندك اكتئاب!!!
يمكن اكون فهمت غلط
بس مش مشكلة
بس تصدقى اقنعتينى بكلامك..^_^
بس خلى بالك اللى جاى عايز تفاؤل اكبر عشان اللى جاى اكبر
^_^