30.10.10

بين الــ (قوسين)

...........

وفقا لمنطق الحياة المعاكس

لازم الواحد يزهد ويترفع عن الحاجات اللي بيحبها ..
عشان تجيله ورجليها فوق رقابتها وتخضعله
لكن الحاجة الوحيدة اللي مش هقدر اترفع عنها..هوا انت
(برغم انك انت اساسا مش موجود حاليا)

........

حسيت انه لمسني من جوا وبدأ ياخد باله من المنمنمات اللي بعملها
زي نوع الشيكولاته اللي بحبها..واني بعض شفايفي
لما بكون عاوزة اعبر عن حاجة وبحاول اداريها وبفكر جوايا
والالوان اللي بتميزني ..واللينسز اللي بلبسها بدل النضارة
فبدأت اهرب عشان معلقوش
او اكون جزء تاني من فيلم نهايته دايماااا بتفضل مفتوحة..
(مش شرط يكون حد حقيقي)

..............

الساعة 1 .. مش لاقية القمر في السما دلوقتي والدنيا مضلمة..
كلهم خرجوا وانا قاعدة بكتب لوحدي..
الجو برد..بس مكسلة اجيب سويتر ومش ليا مزاج اتدفا
مستمتعة بصوابعي المتجمدة بقالي كتير محستش بالبرد من برا..

(بموت في الشتا والقمر والوحدة والمونتوهات الطويلة)


............


بيتهيألي عندي القدرة اني اتصالح مع كل الناس اللي بيسكنوني..
كلهم برغم كترهم
(بس بواجه صعوبة في التصالح مع نفسي ومع الحاضر..
هل فيه امل اني اعيش يا دوك!!)


.............

حاسة اني بلف في دواير طول الاسبوع...
اصحى واروح المدرسة
ارجع اخد ادويتي واخد درس او درسين (ده ف يوم الاتنين بس)

ارجع انام ساعة واقوم على 8 بالليل
وتناوشني حيرة كل يوم ..ياترى هذاكر رياضة ولا فيزيا!!

رفعت شعار
Busy all the time

(بطلت اخرج زي زمان او اقعد ع النت
او ارغي ف الفون ولا حاجة كده خالص معرفش بعمل ايه)


............

مستمتعة بانشغالي لأنه بيمنعني م التفكير..
بس حاساني طاقتي خلصت
هسافر اسكندرية كام يوم

وهرجع خميس او جمعة ان شاء الله..
معنديش خطط لما نسافر هعمل ايه خصوصا
ان احمد مش معانا وهبقى لوحدي..

(يا اهالي اليكس الكرام..قولولي اروح فين
اللهي يطعمكوا ما يحرمكوا ^_^)

............


انا بحب اووووووووووي اليومين دول ابقى لوحدي..
مش شرط اقلبها نكد وافضل اعيط..عشان قاعدة لوحدي

ولا شرط برضه اغمض عيني واقعد افتكر في مواقف وناس
بفتقدهم ..وتيجي ف بالي حجات بتوجعني

ممكن جدا اقعد لوحدي واضحك من قلبي
واقول نفس النكتة الرخمممممة اللي مش حافظة غيرها

المهم اني مش بفرض عليا حاجة
انا الوحيدة اللي بسيبني انطلق بلا حدود..

أضحك او أعيط ..أرقص أو أقعد في هدوء.. أقرا او أكتب

(مش مهم ..بحاول بس احبني..مهما كانت عيوبي
ومهما كنت وحشة ..)


.........

ازاي الوقت فشل في انه ينسيني جزء مهم في حياتي..
بذاكرتي التعبانة ديه وفضايحي المستمرة في نسيان الاسماء
لسه برضه مش عارفة انسى..
ولا يمكن انا مش عاوزة..
يمكن يكون عندي امل في بكرة..او يمكن بحط
اي سبب يمنعني من ازالة الحواجز بيني وبين الناس مرة تاني

(ايييييييييييييه معلش يبنتي كله بيطلع في الغسيل )

............

مستر عبد المنعم بيقول عليا شبه الاتراك (اللي من تركيا يعني)
عشان الكِبر اللي عندي..

اخيرا وبعد سنة كاملة من معرفتي بيه
عرفت تفاصيل عنه واستدرجته في الكلام
حياته مليانة اوي..هل ممكن حياتي ف يوم تبقى مليانة كده؟؟

ميزته اللي مخلياني بحبه ومتمسكة بيه انه اولا شبه جدو
وثانيا بيحسسني اني عندي دماغ
(احيانا واحيانا تانية بيبقى عاوز يولع فيا!! )

.............

الموبايلات ديه اختراعات فاشلة..سعات كتير بيبقى نفسي امسكه
واتصل بناس عندي عليه بس بتردد..
بخاف من ردود الافعال
ومبحبش افرض نفسي على حد..
وسعات تانية ببقى نفسي ارميه من الشباك لما حد مش عاوزه
اكلمه بيتصل وبضطر ارد..(ببقى باردة اوي ف المكالمات ديه هع هع )

وبرغم ان الناس مش بتتصل غير لما ببقى نايمة
(وبلقح كلام على سارة دراز
^_^)
بس بفرح اوي باتصالهم..ابقي فكريني اقفل الموبايل قبل ما انام
الناس لما بتلاقيه سايلنت ومبردش بيقلقوا ويشتغلوا ع البيت
تقوم طنط سوسو مامتي العزيزة تصحيني

............

نفسي اتخيل اني ممكن اوصل للحلم اللي محدش يعرفه
جوايا وبس..مرتبط بالشغل وبالكارير اللي نفسي
اكون فيها ان شاء الله..مش بوهم نفسي
ولا بحلم احلام واسعة هوا حلم محندق بس فيه مجازفة كبيرة

(لسه ببص لبكرة وبضيع مني النهارده..ركزي بقى)

.............

بالمناسبة برضه انا قلتلك اني بثق في الناس..
لكن بعد التفكير ..انا مش بثق في حد بنسبة
تتعدى الــ70%
والــ30% الباقيين خليط بين
الخوف واني مبحكيش لحد كل اسراري

(على الأقل مرتاحة عشان محدش ممكن يكسرني بسهولة ناو)
...................

مبقتش حاسة اني ببعد الناس زي الاول
عشان اصلا مبقتش اقرب الناس..ده يعتبر تحسن لأني مش بأذي
حد كده

..........

وافتكرت لوهلة اني اتغيرت وهاخد بالي من نفسي
بس جيه ف بالي صوت هاوس وهوا بيقول

People don't change

(ههههههههههههههههههههههه
بتيجي ف اوقات يا حاج هاوس )

..........

باين رغيت كتير بس كنت بسلي وقتي واهرب من الفيزيا حبة
أو بالأحرى حبات كتير
ومعلش مش هرد ع كومينتس البلوج التاني او اللي هنا دلوقتي
عندي ازمة ف الوقت

إلى اللقاء..

هناك 22 تعليقًا:

The illusionist يقول...

لو انا الاول ومفيش اشراف على التعليقات

هقراه كلو كلو كلو

The illusionist يقول...

ما شاء الله عليا وعليكى

يبقى هقراه كلو لان الصراحه اوله عجبنى

The illusionist يقول...

(بس بواجه صعوبة في التصالح مع نفسي ومع الحاضر..
هل فيه امل اني اعيش يا دوك!!)


بما انى باشمهندس فأقدر اقولك

ممممممممممممممممم

للاسف

عمرك قصير

استمتعى بيه بقى

The illusionist يقول...

ارجع انام ساعة واقوم على 8 بالليل
وتناوشني حيرة كل يوم .

.ياترى هذاكر رياضة ولا فيزيا!!


والله لو محتاره انا اتذكر ان الفيزيا نظرى وفكرى

والرياضه فكرى بس

مممممممممممممممم

يبقى الاحسن حسب رايى

تذاكرى لغه عربيه



رفعت شعار
Busy all the time


شعارى

eshta

The illusionist يقول...

(بطلت اخرج زي زمان او اقعد ع النت
او ارغي ف الفون ولا حاجة كده خالص معرفش بعمل ايه)

كويس قوى

شطوره

هو دايه بدايه اما الاكتئاب او انك عايشه الدور

وفى الحالتين مراهقه

فعيشى حياتك

عشان المراهقه حلوه قوى

بتحسسنى انى سوبر ستيودنت

The illusionist يقول...

(يا اهالي اليكس الكرام..قولولي اروح فين
اللهي يطعمكوا ما يحرمكوا ^_^)


انا مش من اليكس

بس ممكن تروحى

ممممممممم

البحر

هه

صح

قولى صح والنبى عشان اقتنع انى بفهم

The illusionist يقول...

حياته مليانة اوي..هل ممكن حياتي ف يوم تبقى مليانة كده؟؟


لا هتبقى مليانه اكتر


ميزته اللي مخلياني بحبه ومتمسكة بيه انه اولا شبه جدو
وثانيا بيحسسني اني عندي دماغ


اه
حلاوه حلاوه

مش بقولك

سن المراهقه جميل

بحب سبايدر ستيودنت انا كمان

بحس انو شبه رئيس الغفر

The illusionist يقول...

بالمناسبة برضه انا قلتلك اني بثق في الناس..
لكن بعد التفكير ..انا مش بثق في حد بنسبة
تتعدى الــ70%
والــ30% الباقيين خليط بين
الخوف واني مبحكيش لحد كل اسراري

نسبه غلط

شور يعنى

غلط

مش عارف ليه بس انا متاكد انها نسبه غلط

فى حد غير والدتك عارف اسرارك

اذا كانت هى اصلا تعرف

واسرارك بتتوزع

محدش يعرفها كلها

بس كلهم يعرفوها

The illusionist يقول...

مبقتش حاسة اني ببعد الناس زي الاول
عشان اصلا مبقتش اقرب الناس..ده يعتبر تحسن لأني مش بأذي
حد كده


تفكير منطقى صحيح

احييكى

The illusionist يقول...

وافتكرت لوهلة اني اتغيرت وهاخد بالي من نفسي
بس جيه ف بالي صوت هاوس وهوا بيقول

People don't change

(ههههههههههههههههههههههه
بتيجي ف اوقات يا حاج هاوس )


شوفت انا هاوة الست مواسم ومتابع السابع

بما انى بشجع هاوس فى كل اراءه وكلها صحيحه

الا ان الناس بتتغير وقتيا بس يا ستى
لما تبقى هتموتى خلاص وبعدين ربنا ينجدك
ممكن تبقى عندك عزيمه تشكرى ربنا لباقى عمرك كلها يومين وترجعى
الناس مبتتغيرش
الناس بتمثل
هاوس صح

بس ويلسون هو اللى متفائل

عشان كده ويلسون مينفعش مدون

ينفع يلعب دور ماما سوزان

The illusionist يقول...

باين رغيت كتير بس كنت بسلي وقتي واهرب من الفيزيا حبة
أو بالأحرى حبات كتير
ومعلش مش هرد ع كومينتس البلوج التاني او اللي هنا دلوقتي
عندي ازمة ف الوقت


عادى

انا كنت بشوف انا هعرف اقرا بوست كامل شبه بوستاتى

وفعلا عرفت

الحاجات الشخصيه الظريفه تجذبنى

ناما قصه الحياه الكامله اللى بضطر اقراها بستنتج انها قصه اكيد مهمه بالنسبه للشخص اللى كتبها

بس ليا

دونت كير


بيس يا ستى

معلش على الاحتلال

كنت فاضى

دعاء العطار يقول...

"مستمتعة بانشغالي لأنه بيمنعني م التفكير..
بس حاساني طاقتي خلصت "


انا كمان يارودى بحب الانشغال عشان ماافكرش كتيييييير وبكره انى اكون فاضيه عشان كده

:::::::::::::


People don't change "

هههههههههههههههههههههه

لاء يارودى انا فى راى اى حد ممكن يتغير او يغير حاجه فيه مادام عنده استعداد لكده

واى بونوادم خلقه ربنا بتلاقيه فى تغير مستمر ممكن للاحسن وممكن للاوحش لاننا حياتنا مش خط مستقيم دى منحنيات

يعنى افتكرى نفسك من سنه مش هتلاقيها زى دلوقتى وانتى كمان سنه مش هتبقى زى دلوقتى برضه

:::::::::::::::

سلميلى ع اليكس لما تروحيها وخديهالى بالحضن

هههههههههههههههه

ولو ان مصر هتضلم

بحب اوى كلامك يارودى حتى لو كان مجرد فضفضه

اقدم عاصمه فى الحب يقول...

السلام عليكم
.
.
نعكشات المره دى اكيد صعبه طالما فيها فزياء
بس انتى عارفه
انا مقتنع اوى بمقوله جميله
لما بكون مخنوق بطبقها على نفسى
.
القمر طول عمره وحيد ومع ذلك هو اجمل حاجه فى الدنيا
.
المهم اكون انا مبسوط الاول وعادى الباقى مش فارقه
.
وانتى أجعلى
النهار ليل .. إذا لم تريدى رؤية الشمس .. فقط أغمضى عينك وأخلدى للنوم .. مهماً كانت مهماتك ..
يعنى فكك من بكره علشان تعرفى تعيشى النهارده
.
كلامك مقنع اوى وعجبنى جدا
.
هدعيلك فى ظهر الغيب علشان بيقولوا ان الدعاء فى ظهر الغيب يستجاب افضل
يلا بقه سلام كفاية رغى
:)

بــــ الخطاب ــن يقول...

ربنا يعينك على الفيزيا
ويوفقك فى كل أحلامك الكارير وخلافه

فيوتشر مالوش ملامح بس بإذن الل ربنا يستر عليكى وعلينا وعلى كل المسلمين وكل البشر أجمعين

Ramy يقول...

مش عارف امشى بالمنطق دة يا رودى

معرفش رودى صح و لا غلط (:

اصل دى اول مرة اقولك يا رودى تقريباً(:

شوفى بقى البوست طوووووويل بس لذيذ

و على رايك عندى كويس انى نزلت البوست اللى عندى مش اللى كنت ناوى انزله

كنتِ هتضربينى بالنار (:

و لا يهمك

أهم حاجة تتوفقى

و رحلة سعيدة لأسكندرية (:

و ريحى دماغك خالص

ربنا يوفقك

(:

جايدا العزيزي يقول...

رضوى

اكيد التفكير مفيد بس مش فى كل الاوقات

انا معاكى فى حاجات كتير

ودايما مواضيعك بتعجبنى

اشكرك

تحياتى

richardCatheart يقول...

روعععععععععععععععععععه البوست

انت هنا ولا سافرتى لو لسه هنا

روحى اقعدى على مكان اؤدام البحر نضيف هاتلاقى كتير على الكورنيش والاماكن النضيفه هاتعرفيها بالنظر

على شرط يكون مفتوح مش مكان مقفول واستمتعى ببرد اسكندريه فى الوقت دا

يارب تستمتعى عندنا

إسراء عمران ؛؛؛ راجية الرحمه يقول...

والله بوست تحفه يا دودى
وبما انك سألتى على برنامج سياحى فى اسكندريه يبقى انتى جيتى ملعبى
اولا لانى اسكندرنيه
ثانيا لانى بدرس سياحه
تعالى انتى بس وانا هوديكى مكان عمرك ماروحتيه




اكيد بتنا

غير معرف يقول...

كلامك حلو على فكره بس حولى تعيشى ايامك دلوقتى انتى بس عشان اول مره تبقى فى المرحله دى فمتخيله انها صعبه بالنسبالك بس بعد ما تسبيها وانشاء الله تتدخلى الكليه هتقولى اايه الى انا كنت فيه دا فعيشى وولا يهمك فيزيا او اى حاجه ركزى وانتى مستمتعه وربنا معاكى يا جميل وكلامك بجد روعه استمتعت بيه ^_^

هـــرشــــه دمــااااااااغ "3mr wa2el " يقول...

حلو ان الواحد منا يحب يقعد لوحدة و يفكر في بكره او يشوف الايام هتمشي ازاى
يحب العزله و عمل الموبيل صيلنت او انه يطير زي الابراج الحمام لما بتبقى زي الصبحيه بتطير في السما الصافيه لما بيكون الهوا نضيف مش مليان جاز ولا بنزين
يالا معلش
بصي
حاولي اولا انك تتعاملي مع كل الناس بس بحذر
سرك مش يبقى لاى حد و لو لاختك او والدتك يبقى احسن بكتير
حاولي تفصلي مزاجكك الايام دي
بحث تركزي في مذكرتك
حاولي تغيري من حياتك عشان مش تملي
حاولي تعملي حاجة بتحبيها لتكسري الملل الى بيجيلك
حاولي عملي الى بتحبيه عشامن بعد كدة تلاقيه
بس خلاص

eng_semsem يقول...

احلى وقت بحب اقضيه مع نفسي واكون لوحدي ويا سلام لما يكون على البحر بليل واكون قاعد على الرمل وشايف البحر قدامي بحس اني بكلمه وموجه يبعد ليا رد واناقشه في رده لما ما يعجبنيش بس في الاخر بحس اني رميت همومي معاه واحيانا بقوم اجري يحسن الموج ما يقبلش يشيل همومي ويرجعها ليا تاني
تقبلي تحياتي

اقدم عاصمه فى الحب يقول...

السلام عليكم

ليكِ هديه عندى تعالى خديها :)