26.1.10



لم اتخيل يوماً انه يمكنني الاستمتاع معهم هكذا..

. اليوم تعرفت على شخصياتهم..اخترقت جميع الحواجز التي وضعوها

ضحكنا وشربنا بيبسي وشاي ونسكافيه..

عملنا حلف واحد ضد تلاتة...

ولو اني اشك ان الواحد هيكسب برضه


حسيت بمتعة كبيرة اوي واحنا بنحكي عن القلل زمان

وضحكنا لما واحد اعترض وقال انا كان على ايامي كولدير مش قلل


كنت حاسة اني عندي جناحين..

مطرتش بيهم لسه بس على الاقل جناحاتي اتصلحت من تاني


النسكافيه كان غريب اوي اللبن من تحت كان بيتحرك زي الويفز بالظبط مهما نقلبه بيرجع تاني يمشي في موجات تحت وكأن النسكافيه اتعدم تماماً وقوانين الجازبية كلها مش بتنطبق عليه

..حسيت اني انا اللبن ده..كنت خيالية اوي وبتحرك بخفة وكأن الهوا شايلني


كان الجو برد اوي اوي اوي بس انا حسيت بالدفا من جوايا وايدي مكنش لونها ازرق واطرافي كانت دافية على غير العادة..


سمعنا اغنية قديمة من سنة 89 قبل ما اتولد حتى بتاعت انغام...قعدنا نضحك وهيا بتقول التلج داب في اللمون كانوا طيبين اوي زمان تلج ولمون ورايحة تستناه قبلها بيوم ههههههههه

وسرحت منهم فكرت كتير فيه وياترى كان هيستمتع قد ايه لو كان معايا..


انا بحب الحواديت اوي على فكرة بحب الف ليلة وليلة وبحب سنو وايت وسندريلا

استغربت لما واحدة قالتلي انتي شبه أليس في بلاد العجائب يوميها بالليل توقيت غريب انها تقولي الكلمة ديه مسألتهاش هيا قصدها في الشكل ولا ايه بالظبط بس هكتشف هيا تقصد ايه اكيد :)
_ _ _ _
أنا بحب الشوكولا اوي ...وبحب الناس كلها

... أنا متفائلة ومش ببص للنص الفاضي عشان فيه نص مليان

ده اللي فضلت اقوله لنفسي كنت محتاجة ارتاح شوية كنت محتاجة طاقة ايجابية وخصوصا اني بقيت بخاف اكتر من الناس وكترت حدودي ودفاعاتي اوي

ده يمكن بيفسر حجات كتير وخاصة انطوائي عن الناس وحبي للوحدة والكتابة اكتر



كلمت ساااااارة على البيت صوتي علي وانا بكلمها كنت حاسة اني فرحانة ولقيت

الولد اللي كان قاعد بيبصلي مهتمتش وديرت

وشي وكملت كلام بس وطيت

صوتي...

وقومت اتمشى عشان كنت ممكن اتنطط قدام الناس ..كل الناس كانت بتبصلي

كانوا بيبصوا باستعجاب اوي لدرجة اني شكيت ان فيه اشعة تفائل وحب خارجة من جوايا ووصلتلهم حتى الراجل بتاع الايس كريم كان بيبتسملي اوي


واخدة اجازة من صحابي لمدة يوم بس هشوفهم في الدرس بكرة الساعة 5 ونص


* * * * * * *

من مذكراتي يوم الجمعة 22 يناير

بتخليني ابتسم كل ما اقراها :)

هناك 30 تعليقًا:

لولا وزهراء يقول...

رضوى القمر
-*-*-*-*-*

كلماتك فرحتنى بجد حسيت انى كمان طايره معااااكى لفوووووووووق
يارب على طوووووووول مبسوطه وفرحناه يا ارق رضوى
انتى عارفه اغنية انغام التلج داب فى كاس الليمون مش تنفع للايام دى خالص مالص
دلوقتى بقى عصر تانى خالص غير العصر ده
تقبلى ارق الامنيات لكى بالسعاده الدائمه

لولا

لولا وزهراء يقول...

هو اول تعليق كان من نصيبى
ايه الهنا والفرح ده كله
ربنا يكرمك يا رضوى ياااااااااااااااارب

Tears يقول...

لطيفة اوى يا رضوى

ربنا يوفقك

I'm The CraZy One يقول...

rooodi 7abibitii

ana lessa ma2aretsh 2l post bas tab3an ha2rah bas 7abet a2olek 2lawel 2n f leka2 modawniin yom 2l gom3a laaaaaaaazem tigi bgd boss hya kol 2l tafasiil 3ala 2l link da
http://mosh3arfa7aga.blogspot.com/2010/01/blog-post_17.html

heba يقول...

السلام عليكم

كلامك جميل ياحببيتى وربنا يكرمك وتنجحى وتحققى كل اللى تتمنية

تقبلى مرورى
heba

بــــ الخطاب ــن يقول...

ربنا يارب يخليكى مبسوطه دايما انتى وكل الناس وكل البشر يعيشوا فى سعاده على طول
ادعيلى دعوه زيها . محتاجها

Just Smile يقول...

لولا..

ربنا يسعدك يارب ويهنيكي انتي وزهراءعشان تستحقوا كده فعلاً :)

اما بالنسبة لأنغام فانا اؤيدك تماماااااا

وتحياتي ليكم كمان

Just Smile يقول...

Tears

ميرسي يا قمر لمرورك

Just Smile يقول...

هندو

....تعرفي كنت ناوية اجي بس مش هينفع للأسف عموما هنتقابل في المعرض باذن الله وهبقى موجودة يوم 6 عشان اوقع الكتاب واحضر حفل توقيع سحر غريب..

Just Smile يقول...

هبة..

ميرسي يا حبيبتي بجد على الكلام الجميل ده :)

Just Smile يقول...

بن الخطاااب


تعرف ان لما حضرتك بتدعي دعوة..الملايكة بتقول ولك بالمثل..يعني لما بتتمني الخير لغيرك بيتردلك :) الكلام ده عن تجربة

ربنا يسعد حضرتك ويهنيك والمسلمين جميعا

3mr wa2el يقول...

الى كل مدونين الارض
الى كل مدون داخل او خارج مصر
اسمعو وعوا
وادركوا واعقلو
وبركو و هنوا
وزغرتوا و اشربوا
انها حقا رضوى ف زيها الجديد
تنبعث من عينيها بريق امل و تفائل
بغض النظر انها شربت شاي و نسكافية و بيبسي و نست الكاكو بلبن ( عليكي لعنة الكاكاو ) ههههههههههههههههههه
مبروك يا بت يا بنت اونكل طارق ههههههههههههههههههههههههه
يارب ف تفائل و سعادة دايما
استمري ف تللك الحالة الى اطول وقت و مدى العرض
تفائل شكرا مع خدم تفائل ليا وليك هتضحك اكتر
لية تضحك مرة مع انك مممكن تضحك طول العمر
تفائل شكرا عندي و بس
نيااااااااااااااااااه

I'm The CraZy One يقول...

:((((((

5alas ba2a felma3rad isa

Just Smile يقول...

ههههههههه ابيه عمرو

يا مسيطني ومظبطني...بجد شكرا جدا جدا كلماتك خلتني مزقططة كده...
ربنا يسعدك ويهنيك ويوفقك ف الامتحانات يارب


_ _ _ _ _ _ _

هندو

معلش مفيش نصيب هيا قفلت من كله :) في المعرض بقى ان شاء الله

شاب فقرى يقول...

وخصوصا اني بقيت بخاف اكتر من الناس وكترت حدودي ودفاعاتي اوي

عجبتنى اوى الحته دى

ربنا يسعدك وتقدرى تبتسمى اكتر واكتر

فقرى

Sam Sh يقول...

حلوة جدا .. مشاعر بجد بجد بجد رجعتنى لأيام جميلة أوى .. وصفك لكل حاجة أكتر من رائع .. حتى البرد .. حسستينى بالدفا و أنا جوا البرد .. و على فكرة .. أنا كمان إبتسمت لما قريتها :)

تحياتي

dodoo يقول...

كلماتك فيها تفاءل وتنقل احساسك لاى حد بيقراها عشان كده انا حسيت انى منتعشه وطايره انا كمان زيك

ربنا يسعدك ياااااارب

وعلى فكره مدونتك جميييله اوى وسعيده انى هنا عندك

دمتى متفااااااااائله

Just Smile يقول...

فقري

* * * *

يارب يسعدك انت ويهنيك واشوفك كده مبسوط لمدة 3 ايام :)

Just Smile يقول...

Sam Sh

متشكرة جدا لحضرتك...ويارب دايما تبتسم وميرسي على المتابعة :)

Just Smile يقول...

dodoo

ربنا يجبر بخاطرك يا اوختي ^_^ ميرسي جدا وانا اللي سعيدة انك منوراني

مي يقول...

جميلة يارضوى وجميل يومك بما يحمل من ذكريات تنبع بالصوت والحركة وذوبان المشاعر
جميل ان نتذكر يوم ترك فى داخلنا ذكرى نحملها مع الايام حتى ترتسم بسمة خفيفة عندما نتذكرها

مبروك اللوك الجديد ياقمراية
وحشانى يابت يارضوى جدااااااا

أميرة الورد يقول...

كنت حاسة اني عندي جناحين..
مطرتش بيهم لسه بس على الاقل جناحاتي اتصلحت من تاني

عجبتني الجملة هادي اوي

كتير حلو انو نتعرف عشخصيات جديدة ونحس انو بنعرفهم من زمان
وخصوصا لو كانت السهرة منورة بالناس اللي بنحبهم
حبيت مدونتك اوي يا رضوى
وودي لك
عزة

الجواز و سنينه يقول...

ياه هيه انغام بتغنى من زمان اوى كده
و تلج و لمون فى البرد ده
انا بحب النسكافيه اوى
بس ازاى اللبن كان غريب اوى كده
بصى هاعملك واحد تحفه و ابعتهولك فى البرد ده
بدل الليمون اللى انتى فيه ده
صحيح هو ليه محدش غنى للنسكافيه ؟
و عجبى
بس مذكرات سكر ذيك

blue-wave يقول...

حلوة الذكريات اكيد

Just Smile يقول...

مي

ازززززززيك يا قمر والانتي كمان وحشاني ونفسي اتكلم معاكي

ميرسي على زوقك واول حد يقولي ان اللوك حلو هماوش بالهم ولا ايه ان فيه نيو لوك ^_^

Just Smile يقول...

أميرة الورد..

منوراني بحضورك الجميل ده واختارتي اكتر جملة انا حاباها في البوست :)

ميرسي جدا يا قمراية

Just Smile يقول...

الجواز وسنينه

اها انا فعلا استغربت زيك ^_^
والله مي تو انا بعشق النسكافيه وخصوصا لما بعمله بمزاج بقى وارسم من فوق على الرغوة بتاعته قلب يخلاااااثي جوعتيني :D

ولا يهمك يا قمراية الشعر الجاي يكون عن النسكافيه ^_^ وانكل شعبولا أو الصغير ممكن يغنوها

منوراني وميرسي على زوقك

Just Smile يقول...

أ/عمرو

اكيد طبعا حاجة بتساعدك تقهر حزنك اوقات لما بتفكر فيها

لولا وزهراء يقول...

أنا متفائلة ومش ببص للنص الفاضي عشان فيه نص مليان

ده اللي فضلت اقوله لنفسي كنت محتاجة ارتاح

تعرفي حسيت بأيه غير اني مازلت طايرة لما اقرأ انا كمان مذكراتك دي؟

الجملة اللي اقتبستها فكرتني لاننا كل شوية لازم نذكر احنا ههههه حلوة دي لازم نفكر نفسنا كل شوية ان فيه نص مليان في الكوباية لان ساعات اللي بيقلقني مش اني اشوف النص الفاضي لأ اني مش بشوف الكوباية اصلاً هههههههههه

فكرتي جملتك واصرارك على غرز هذه اللحظات الجميلة التي لا تتكرر في حياتنا كثيراً باللي وقف قدام المراية وعمال يقول انا مش قصير انا طويل .

اتمنى ليكِ كل السعادة والحب والهنا والخير.

على فكرة يا دودو فيه لسة ناس بتحب بقلب زمان ونقاء زمان ورومانسية زمان والتلج اللي داب بس مش في كاس اللمون لأ التلج ذاب من انتظار من يستحق اني احبه الحب الافلاطوني ده منتظرة ردك بفاااااااااااااارغ الصبر على تعليقي.

Just Smile يقول...

أنا اسفة بجد بجد بجد مشوفتش التعليق

أنا متأكده لسه ان فيه ناس بتحب بجد وهيفضلوا موجودين..الدنيا عمرها ما هتبقى بلاك وبراون طول عمرها ابيض واسود


***********
الجملة اللي اقتبستها فكرتني لاننا كل شوية لازم نذكر احنا ههههه حلوة دي لازم نفكر نفسنا كل شوية ان فيه نص مليان في الكوباية لان ساعات اللي بيقلقني مش اني اشوف النص الفاضي لأ اني مش بشوف الكوباية اصلاً هههههههههه
************

ههههههههههههههه حتى لو مش شايفة الكوباية تعرفي ايه الحل انك تفضلي تقولي لنفسك انا هبقى كويسة والفترة ديه هتعدي..ده بيدي من جوانا دافع نفسي رائع :) يعني العسر هييجي بعديه يسر :)

تفاءلي خير ان شاء الله يا جميل

واسفة بجد بجد اني اتأخرت ف الرد