28.8.17

العيوب الكاملة

Collage by: Douglas Hale

النهارده كنت ببص في المراية وافتكرت كلام نورا -صاحبتي في الشغل- عن إني لازم أشتري كريم ليلي ضد الشيخوخة وتقدم العمر، وملقتش تقريبًا عندي تجاعيد غير خطوط عند عيني والقوس اللي حوالين شفايفي اللي بيترسم لمّا بضحك، واتصالحت جدا مع واقع إني هاكبر والخطوط دي تزيد؛ عشان زي ما عندي علامات لكل التعاوير اللي خدتها في حياتي، التجاعيد دي دليل حيّ إني ضحكت جدا لدرجة إن الضحك علّم عليا!

في الفترة دي من حياتي...
الواقع لمّا بيقسَى عليا ويحط وشي في الحيط مخرجي منه مبقاش حلم أو فيلم في منتهى الرومانسية... مَخرَجي بقى واقعي جدا ومتسامح مع الحياة. 

أنا فاكرة إني زمان مثلا كنت بحب أفلام زي before sunset و sunrise و midnight
لمّا الفيلم اتعرض قدامي بالصدفة اكتشفت حقيقة إني دلوقتي مبقتش أحبه...خالص يعني!
بقيت بكره كل الأفكار الكليشيهية عن الرومانسية، هو فيه حد بيقابل حد حافظ أسئلة واسكريبت؟ ولّا حد هيتكلم مع غريب باستفاضة عن مشاعره الحقيقية ويفترض إنه عرفه وراهن عليه؟ أو حد هينزل من القطر عشان خاطر حد ميعرفش عنه حاجة؟ 
يمكن لفترة طويلة من حياتي كنت شايفة إن ده الحب اللي أنا "عاوزاه"، ولما طولته وقلبي اتكسر بقيت متأكدة إن مش ده اللي أنا "محتاجاه"!

والحقيقة في التخلي عن الفكر الرومانسي إنه صعب أوي التنازل عن صورة الوشوش الرايقة اللي بتصحى من النوم مبتسمة لبعض، وتقبُّل إن الناس بتصحى شعرها منكوش ووشها عرقان من الكولاجين اللي بيتفرز طول الليل، وغالبا هيقوموا مأيرين عشان ميعاد الشغل، وريحة نَفَسهم مش هتبقى أحسن حاجة، وإني في الأغلب شخصيا مش هعمل شعري كل مرة آخد دُش ومش هروح للكوافير كل أسبوع عشان معنديش وقت وغالبا هنسى أحلق شعر رجلي في الشتا، أو ده أكيد مش غالبا... بس هو مين يعني اللي حط في دماغنا إن عدم الكمال مش جميل؟

الحب مش محجوز للناس اللي على سنجة عشرة بس...ويمكن كوباية قرفة بالجنزبيل يعملها واحد عشان اللي بيحبها وقت البيريود ويضمها بهدوء تخلق لحظة رومانسية في منتهى الجمال والهشاشة أحسن من سبعتلاف مشهد لاتنين حاضنين بعض في وسط باريس.

أقصد مين قال إن الجمال هو بس اللي بيتعرض في الأفلام والأغاني والصور؟!

أنا مبحبش ثلاثية Before sunrise...
بس بحب الحدوتة اللي حكاها حد عن صعيدي كان راكب معاه في القطر وبشخصيته البسيطة والـ "شقية" لقى في أول محطة القطر وقف فيها بلد فلاحين، وواحدة ست حلوة قاعدة ع الشط بتغسل الحلل فالراجل الشقي مدّ راسه من الشباك وقال لها:
"بقولك ايه...تتجوزيني وأغسلك المواعين؟" 
فهي ضحكت وقالت له: 
"اسكت يا منيل!!!"