9.12.16

الناس شايفني إزاي؟

من كواليس ورشة "نص مفتوح على الفوتوغرافيا"


صديقي شايفني كيس مخدة، كل ما أبوه هيرموناته تقوم عليه ويعمل مشاكل في البيت، بيرزّع فيا بعزم ما فيه...عشان جبت له هدية معملتلوش واحدة بإيدي مخصوص، أو عشان مرضتش أخرج معاه!

خلود شايفاني قنبلة موقوتة. مرة من سنتين ونص انفجرت فيها لمّا كانت بتتصرف تصرفات غريبة ومؤلمة، وكان عندي ارتباك شديد جسدي مكنتش فاهماه، فلومتها وزعّقت لها وسط صحابنا...عمرها ما سامحتني!

أخويا مش شايفني أصلا...فضلت بايتة لوحدي أسبوعين مسألش عليا ولا مرة.

الولد إياه شايفني جولييت بينوش فتاة الأحلام، بيحبني وبيكتب ليا وعشاني...بيستنى أي تلكيكة يفتح بيها كلام...فبيطمن عليا ليلة الانترفيو، يوم الانترفيو 3 مرات، قبل الانترفيو، بعد الانترفيو، بيطمن أكتر ما بيدخل الحمّام!

مروة وإسراء صحاب المدرسة القدام شايفني عفريت، بيظهر وقت ما يحب ويختفي وقت ما يحب ومبيعرفش يطلب مساعدة!..بيقولوا علينا صحاب، بس هما الاتنين اللي صحاب وكتير جدا بينسوني..أو مبيفهمونيش!

مريم الكوافيرة شايفاني زومبي ميّت 3 مرات ومرهق من تأثير الموتات المتكررة...كل مرة بروح لها بتأكد إن وشي خاسس وشعري خفيف، وشكلي دبلان ومحتاجة آكل كويس وأقعد في البيت وأبطل فرهدة.

القطة اللي ع السلم بتعاملني كصاحب مسمط بيبيع لانشون بس..كل ما بتجوع بتتسرسب من الباب وتستخبى تحت سريري...تخرج فجأة فتخضني، ومترضاش تمشي غير لمّا أغريها بحتة لانشون وأسربها من باب الشقة.

حسام شايفني أودري هيبورن، شايف إني بعمل من التفاصيل اليومية بالغة التفاهة جمال حقيقي، وإني بتصرّف زيها، وشبهها في نظراتها في الصوّر...مع إنه عمره ما شاف لها فيلم حقيقي...مجرد صور.

امي شايفاني مش بساعد كفايا، شخص مناسب جدا لتفريغ الإحباط عليه من شغلها ومن أبويا، وساعات في هشاشتها المطلقة بتحس إني مبحبهاش عشان هي عمرها ما حبت أمها!


هناك تعليق واحد:

شيـمـاء يقول...

ههههه ضحكتيني المرة :)
حلو انك رجعت تكتبي ...
بالفترة الاخيرة بحب اسمع من الناس الي حواليي شو بفكروا عني .. مرات بستغرب من رؤيتهم بس مرات بفكر انا كل هاد وما بعرف!!