8 حاجات هايلايت اليوم :
1- حضرت المحاضرة رغم شياطيني ونوازعي اللي فضلوا يقولولي، سيبك منها واقعدي خلصي الجَزَر اللي في اللانش بوكس -أصلي بعمل نظام غذائي عشان مخي يفرز دوبامين كتير الفترة الجاية- طلعت متأخرة نص ساعة وأنا بدعي الدكتور ياخد باله إني عديت العشر دقايق سماحية ويطردني، بس للأسف مخدش باله، وحفظت معلومة وحيدة منه، وقررت أستعين بولد من الأوائل يشرح لي، بس مش عارفة أفاتحه في الموضوع ازاي لسه.
2- شوفت بسمة وحضنتها أطول حضن في حياتي لحد ما قلبي استقر وهدي وبطل يدق بسرعة بدون داعي.
3- حضرت ميتنج شغل -مش هندسي- حمسني جدًا وخلاني مش قادرة أستنى لما نبدأ في نُص خمسة.
4- شتمت الدكتور النفسي، وقلتله إني هبطل الدوا غصب عنه أو برضاه، فتقريبا اتضايق مني شوية او شويتين كده، وخرجت حاسة إني كويسة جدا، غضبانة وحاسة إنه خذلني وممسكش فيا، ومدانيش قايمة بأضرار الانسحاب، ولا حلول أخرى غير الدوا، بس رحمني من "عزة" المساعدة بتاعته اللي كل مرة بنسى فيها الروشتة ورقم الملف بتاعي بتهددني إن المرة الجاية هتعضني (يارب تعض الدكتور وتجيبله شلل وكل العيانيين بتوعه ينبسطوا).
5- بابا صالحني وممكن أطلب منه أسافر!
6- الكلبة بعد ما كسرت شباك الأوضة ونطت من الدور السادس؛ لدافع انتحاري عندها، وبعد ما وديناها المستشفى امبارح واتنين دكاترة قالولنا ارحموا نفسكوا، ووفروا فلوسكوا واعدموها أحسن. دكتور ابن حلال عمل لها عملية النهارده ركب لها شريحة وصلّحها. مش هتعرف تتحرك لفترة معقولة، وبتتوجع وعنيها بتدمع طول الوقت...بس إن شاء الله هتبقى كويسة...في الآخر يعني، كله طيش كلاب مراهقين!
7- بروح كورس محادثة مسلي جدا والهووم وورك نسمع أغاني بحبها زي Gone, Gone, Gone و Home..!
8- قررت أرجع أكتب عشان ده العلاج النفسي اللي بينفض عن قلبي تراب وتعب اليوم...آي مين، أنا ممكن أتخيل حتى ولد أحبه زي فيلم Ruby Sparks ويطلع حقيقي في حتة معينة وأبعت له جوابات ولمّا نتقابل أفرجهاله! إت كانت جيت بيتر :3
.
