18.2.16

تُقل دماغ



I know I have a fickle heart and a bitterness, 
And a wandering eye,
 and heaviness in my head..*

.......

لو كنت وقفت في نص الشارع وعيطت عشان حاسة إن قلبي مقبوض وعليه شيلة تقيلة.. كنت هبقى بنت تافهة بتدلع وشايفة نفسها محور الكون...بس بقى كبديل عن ده أنا اتخانقت مع السواق ودعيت عليه ونزلت أول الشارع بتاعي مكشرة، ورجعت البيت نمت وقمت مش عاوزة أعمل حاجة تاني. مش عاوزة أخرج ولا أتكلم ولا أفتح السوشال ميديا، ولا أروح الكلية ولا أشوف مناقشة مشروع التخرج بكرة...أنا مش عاوزة أعمل حاجة غير إني أكلم ميم دلوقتي ويحكيلي حاجات تافهة. مثال: بنات الجامعات الخاصة بيقصوا شعرهم ازاي وبيقولوا تعبيرات جديدة عن العلاقات المعقدة بين الولاد والبنات وبيعملوا حفلات كل يومين في الجامعة والكلام الفارغ المسلي جدا بطريقته...
فاقوله إنهم منعونا نطلع ف الاصانسير بتاع القسم ولسه ممسحوش حكمة " من هز وجد" من على الحيطة الأوف وايت واحنا طالعين السلالم، وبقيت لمّا بطلع القسم أول محاضرة مبنزلش منه وبالتالي من أول الدراسة مرحتش أشوف حد من صحابنا...ومش مهتمة، ومش عاوزة أقول ده بصوت عالي عشان مش أي حد هيفهم. أنا مش مهتمة ومش مبسوطة ومش زعلانة أغلب الوقت ومبعيطش، وقلبي بيدق باضطراب، ودماغي مصدعة، وبنام كتير، طول الوقت عاوزة أنام عشان باخد مهديء مرتين في اليوم، وبقاوم رغبتي في عمل الولا حاجة؛ خايفة من إني أعطل وصحابي يضطروا يشيلوني، هما مش هيمانعوا بس أنا هعجز بدري وايأس، وبضحك كل يوم عادي، أكن مفيش حاجة بتحصل جوا، وبسكت من غير سبب عشان دماغي فعلا مش فايقة، وكتبت امبارح وأول، بس كسلت أبذل مجهود في التنسيق وأنشر ورحت نمت، وحسيت وحش لما الولد مسحني من حياته، بس هديت عشان النور هيدخل له دلوقتي، ورجعت مهتمتش بحاجة، واديت أمي بوسة، ودخلت نمت تاني لما حسيت إني زعلانة ومش لاقية سبب ملموس.


............................


لا توزعي ما لديك من الحزن على أحواض الورد، ستعبق في منزلك رائحته 
لا تحرقيه كرسالة سرية، سيعلق دخانه على الجدران 
لا تغسليه كما لو كنت تغسلين ثوبك الأسود الثمين، سيزول الغبارعنه ويبهج لونه العاتم 
لاتعلقيه في الخزانة، سيحفظ تفاصيل رائحتك 
لاتخبئيه في درج ملابسك الداخلية، سترتدينه غدا صباحا على لحمك 
ولا تخبيئه أسفل مخدتك، سيمد يده في الليل ويضغط على عنقك 
لا تقتليه، سيعود ليقتلك 
لا تأكليه، سيأكل دمك 
لا تفعلي له شيئا 
أحبيه فقط 
أحبيه بقوة 
كما لو أنه رجل حياتك 
حينها فقط 
سيهجرك .**


...............

*Adele - Don't you remember
**رشا عمران