السوبر هيومانز بيغرقوا عادي!

شيماء...

نحن بخير، أنا وطائري الأزرق الذي أخفيه عن الآخرين، تمتلكين واحدًا مثله، هبة كذلك، نجيد إخفائه في الصباح ونُطلقه في المساء لنخبره أننا نعلم بوجوده، وأنه لا بأس...نحادثه أحيانا ويغلبنا أحيانا أخرى قبل أن نخبئه جيدًا بصدورنا حتى لا ينكشف ويعلو غنائه صوتنا أمام رجال الأمن أمام بوابة الكلية، أو بائع البطاطا في وسط البلد. صدقيني نحن بخير يا حلوة ولا ينقصنا سوى رؤياكي ولا نمانع إن كان النور محتضنك على المسرح حيث تكونين نفسك، مهما كان دورك، فهو يشبهك ولا تشبهينه أنتِ على الإطلاق.

تعالي أحكيلك...

كان عندي 7 سنين وقت تدريب السباحة، المدرب - اللي كان بيحب جدا أغنية نعناع الجنينة - مكنش علمني إزاي أقف في المايه من غير ما أكون لامسة الأرض لسه؛ كنت من الصغيرين اللي دايما بيعوموا بعرض حمام السباحة اللي كله نفس الطول متر وربع مثلا عشان لو وقفوا في النص يبقوا ف الأمان، لحد ما أخدني في مرة من غير إنذار، حطني في نص البسين الغريق اللي كل ما ندخل فيه الأرض ببتبعد كمان وكمان، وطلب مني أشغل رجليا بحيث راسي تفضل فوق، بيسموها عجلة...تعبت يا شيماء ومقدرتش أكمل محاولة يادوب بعد نص دقيقة؛ كنت طول الفترة اللي سابني فيها بحرك رجليا بعنف وعشوائية خلتني أتعب بسرعة وشرِقت، فرجعت أمسك في طرف البسين ولما خرجني قعدت أعيط وأنا بالبشكير خايفة أنزل المايه الغريقة تاني.

لما جم يعلمونا ازاي ننقذ شخص بيغرق بعدها، قالولنا إن الشخص اللي بيغرق، مابين أول وهلة وهو بيدرك إنه خلاص هيموت، والوهلة اللي هيبدأ يحس إنه مش عارف يساعد نفسه مهما حاول، كل قوته بتتمركز في إيديه، فلو كمنقذ حاولت تروح تساعده هتلاقيه بكل بساطة بيزقك تحت المايه بايده عشان يطلع هو فوق لثانية وهيغرقك أنت كمان معاه. لو عاوز تنقذ حد فيه وضع معين لازم تاخده وتشده من ضهره عشان ميبقاش مالكك بإيديه. الموضوع مباشر وبسيط ومفهوم، ليه بنتعمد نفلسفه وننفي قابلية حدوث الأمور لينا، مع إننا مش سوبر هيومانز ولا حاجة..

الفترات الكتير اللي بكون فيها بغرق تحت، والسواد مسيطر على حياتي، ببقى عاملة زي موبايل بطاريته خلصانة و يادوب أول ما بلاقي طاقة تسندني بفتكر إنها لو اتوزعت على الغلابة هتشيلنا كلنا وتدفينا وننبسط والبلية تلعب معاها؛ فبجري على المرمين في القاع زيي، بحاول معاهم وكل مرة برجع من عندهم في حالة صعبة ومبساعدهمش.
أخدت وقت طويل عشان أكتشف إن مش أي حد في أي حالة يقدر ينقذ اللي زيه؛ عشان كده في الفترة دي من حياتي، قررت أبقى مش قادرة، مش قادرة أشوف حد بميعاد، مش قادرة أكمل قعدة مع حد بنذاكر، مش قادرة أستحمل أي تصرف مستفز ممكن في وقت طبيعي أعديه عادي، مش قادرة أسأل على حد، ولا أتحرك أقول للي واحشني إنهم واحشيني، ولا قادرة أساعد اللي محتاجين لي لو مطلبوش ده بشكل مباشر وصريح وجم لي بنفسهم.

ده السبب رقم 1 في تفسير أنا فين...طاقتي يادوب مقوماني بالعافية ومعتقدش فيه حد قوي كفايا يسندني هنا ويخليني أحسن... فانا مستحملة قاولوني العصبي وماشيين في طريقنا اللي هنخلصه قريب جدا عشان نبدأ طريق تاني.

بالمناسبة..وحشتيني جدًا آه... أنتِ وهبة، وطارق، وكل أصحابنا بتوع المجلة.
وآه كمان، إياكي تحبسي العصفور الأزرق في أوضة الفيران، it doesn't belong there, neither do you.

.