حبيبتي الصغيرة كارما/
النهارده بقالك أسبوع موجودة في حياتنا، الكائن الهادي اللي مبيعيطش كتير زي ما تخيلت الأطفال بيعيطوا...
كمّ الحب اللي هتشوفيه واحنا كلنا حواليكي: يوم الولادة، يوم ما روّحتي، يوم ما خدناكي للتطعيم، يوم ما رجعتي تاني تتحجزي عشان عندك الصفرا.. كمّ مرهق من الحب، وأول مرة أشوفه.. كنا كلنا متفقين على حاجة واحدة "أنتِ" لأول مرة في حياتنا. أنتِ نعمة ونور ولو إن مبقالكيش كام يوم في الدنيا.
لما تكبري حبتين فكريني أحكيلك شوية حاجات هتتقسم لنوعين : حاجات تافهة؛ زي إني قريتلك حديث الصباح والمساء - الناس اللي بيموتوا ف الرواية دي عددهم مرعب، عشان الحياة مرعبة في المجمل -...زي إنك جالك زُغطة تاني يوم اتولدتي فيه وكنتي بتضحكينا جدًا، زي أحمد وهو بيتعامل معاكي كشيء قابل للكسر وجدير بالتأمل... زي ملامحك لما بتهدا بوجود دوشة أصوات مألوفة من مامتك أو جدتك... حاجات عبيطة أنا عارفة بس مهمة.
تاني نوع من الحاجات اللي عاوزة أقولها وده مش لازم تنسيه في كل خطوة. في خلال الكام يوم دول اتعرفت على مشاعر نص الكوكب مش هيستوعبها، لما يبقى عندك وعي كافي هفهمك إن ماما تعبت جدًا، في الولادة، وبعدها، وموتت نفسها من العياط لما عرفت إنك هتتاخدي منها وتتحجزي في المستشفى، لدرجة إنها فضلت قاعدة مستنية ميعاد زيارتك 4 ساعات بره، وكل شوية تخبط على الرعاية عشان تشوفك وهي عارفة إنه مينفعش...
لازم تعرفي كم الألم اللي ماما مرت بيه عشان تيجي الدنيا، وقبل ما تيجي، كم الألم اللي كل البنات والستات بيحسوا بيه كل شهر في المتوسط 7 أيام، الوجع بتاع الستات غير منطقي، محدش بيفهمه، الرجالة بالذات عندهم غشومية وبيفتكروه "محن" بس دي مش حقيقة والله...أنا فاهمة، هي حاجة لازم تمري بيها عشان تستوعبيها كليًا...عمر ما الرجالة مروا بده، ومش هيعرفوا يتخيلوا..أبدًا مهما كانوا متفهمين، يعني ايه كل عضلة في جسمك مشدودة وبتتعصر وبتوجع، مش هيفهموا احساس الأمومة والشحتفة والضعف...
كارما...على أد الحب اللي جبتيه معاكي، فالوجع ده كله، اللي بنمر بيه وأنتِ بعيد ومش تحت عيوننا، مبيفسروش غير الضحكة اللي بتضحكيها وأنتِ نايمة لما حد بيمشي بضهر صباعه على راسك من تحت خدودك ولحد شعرك كذا مرة.
يارب ترجعيلنا بسرعة وبخير يا حلوة يا صغيرة.
.
