29.5.15

الكادر زانقني يارب!



عزيزي ربنا..

أنا عندي مشكلة حقيقية مع المدّعين اللي الناس فاكرينهم حقيقة، بس في الواقع هما مزيفين أكتر من أي حد شوفته في حياتي!
عندي مشكلة مع الكلام المتكرر اللي بيقلب بابتذال، ومع الأفورة للغرض اللي بيقولوا عليه "عُمق"..
عندي مشكلة في إني مش عارفة أكتب براحتي هنا، عشان الناس اللي بيقرأوا وعلاقاتي بيهم في الواقع ،وعندي أزمة نفسية في هجر هنا وعمل ركن جديد بتاعي محدش منهم عارفه.
عندي مشكلة إني مبحبش أقول كلام بوضوح وصراحة وحد يعمل عكسه.
عندي مشكلة في إني معنديش ناس قريبين، وظروفهم شبهي، ممكن ييجوا يقعدوا معايا ع الرووف ساندين رجلينا على كرسي ومميلين رقابتنا لفوق للسما وسايبين الهوا يخبط طرف مناخيرنا لحد ما تحمر م البرد في عز الحر ده.
عندي مشكلة مع الناس اللي بحبهم ومبيحبونيش كفايا ..
ومع اللي بيحبوني كفكرة في دماغهم مش عشان هما عارفيني كفايا، واللي بيدّعوا إنهم عارفيني عشان شافوا هنا مثلًا وفاكرين إن ده كل اللي موجود!
عندي مشكلة مع دماغ المجتمع ومع أهلي..ومع الناس اللي بيعجبوني وبفكر في الأيدلوجيات المختلفة وهيقبلوني بيها ولا لأ... فالاقي إنه لأ أكيد، فإعجابي ناحيتهم بيروح.
عندي مشكلة مع الوقت، ومع المعادلات، ودراسة الحاجات اللي بكرهها حتى لو مهمة!
عندي مشكلة مع اعترافي لنفسي إني حد كويس أو جميل سواء داخليا أو خارجيًا وأحيانًا بخاف أبص ف المراية، وف اعترافي بالعجز التام من تغيير حاجات معينة ، وفي إني مش كويسة في المطلق في أي حاجة ودايمًا على الحياد من الأشخاص والهوايات وردود الأفعال.
عندي مشكلة مع حبي للناس، الناس اللي بستعد أقف بينهم وبين الموت وأحوش عنهم أي أذى، وأنا عارفة إني لو مكانهم مش هيعملوا ربع اللي بعمله عشانهم.
عندي مشكلة بحاول اتجاهلها عشان أنا بنت... عشان بحس إني مستباحة وعشان ساعات بقيت أمشي في الشارع خايفة.
عندي مشكلة مع سواقين التاكسي.
عندي مشكلة مع الزحمة والقاهرة ومبانيها الرمادي بوجه عام.
ومشكلة تانية إني مش متأكدة لو هعرف أعيش في مكان أهدى، ورفاهيات أقل.
عندي مشكلة لا انتماء، وإحساس دائم إن الحدود كدبة كبيرة عملهالنا الشيطان.
عندي مشكلة مع المنافقين يارب...ومع اللي عارفين مشاكلهم وبيفتخروا بيها كده عادي.
عندي مشكلة مع التركيز على حد وتأليهه كأن مفيش قبله ولا بعده وبننسى إن الحد ده بشر.
عندي مشكلة في إني بتشتت بسرعة وبنسى بسرعة وبتوه لما حد بيقاطعني، وبفكر أسرع ما بتكلم، ومبحكيش كل اللي لازم يتحكي، وبشيل هموم مش بتاعتي لمسافات طويلة لحد ما تهلكني، فأقرر أرميها.
عندي مشكلة إني مبقتش بكلمك، وآخر مرة كلمتك كنت تعبانة جدا جسديا وبعد ما خدت المهديء قلتلك إني غضبانة منك ومش فاهمة ليه ده بيحصل كالعادة!
عندي مشكلة إني عمري ما هقدر أعيش لوحدي.
ولا هلاقي ناس قريبين كفايا عشان ميحسسونيش بالوحدة يعيشوا معايا.
أنا مزنوقة يارب، حتى دماغي مزنوقة، وأحلامي المركونة في خلفية دماغي مش راضية تطلع من الخلفية...والناس يارب مش شايفيني على أد حجمي بالظبط...يارب خرجني م الدايرة بنت اللذينة اللي خفت ادخلها م اﻷول عشان عارفة إني مكنتش هعرف أخرج منها...وقد كان. 

.
.