صباح الخير...
صباح مُشبع بكسل، وتعب، وإيديث بياف، وأمل دنقل، وفرانكشتاين في بغداد، وكتابة عن وجع السنة اللي فاتت، وأصحابنا اللي ماتوا.
صباح عياط كل ما أفتكر هند وهي بتقول لي "رضوى أنتِ صاحبتي الوحيدة.." عشان محضنتهاش في اللحظة ديه وقلتلها أد ايه هي مهمة بالنسبالي... وزعل تاني عشان معرفتش أحضر حنة آلاء أختها وعشان البنت اللي سلمت عليا في المترو بالنقاب مكنتش روني أختهم هما الاتنين..!
صباح مش عاوزة أذاكر فيه waves ... وديه المادة اللي لازم أنقذها الترم ده، وبذاكر الجزء الحفظ عشان أضمن أجمع أكبر درجات...
صباح بكتب فيه جوابات لواحدة حطتني في الزمايل زوون بعد ما كُنا بيست فريندز وده مش تاعبني اوي بس مضايقني جدًا... ومضايقني أكتر إنها متضايقة وفاكراني هعاتبها على كل الأخطاء والحقيقة إني تعبت من العتاب ومحاولات الوصل مع اللي بيقطعوا وتصرفات المراهقين، ومش هعمل ده معاها تاني من غير بوادر للسلام.
صباح بسترجع فيه إزاي الناس بتتخطى بسرعة كده واحنا قاعدين نتكلم عن اللي ربنا بيستردهم من حياتنا أو اللي بيمشوا بمزاجهم...
صباح فيروز وهي بتقول " تبقى ميّل تبقى أسأل..الله لا يشغل لك بال "..
صباح مبنقراش فيه عن البلاد العربية اللي معندهمش أبسط حقوق الإنسانية وبيعملوا مظاهرات عشان الحرية الجنسية، ولا ناس بتتخانق عشان تمبلر مسح صورة مشمئزة بنت رفعتها ع البلوج عندها.
صباح بكتشف فيه إني آخر من يعلم، عشان مش هتفرق كتير لو علمت يعني!
صباح مينفعش آخد فيه العربية وأنزل أسوق في أي مكان فاضي بسرعة كبيرة، ولا أعرف أستلف العجلة بتاعت ناجي وأمشي بيها في شوارع الزمالك المنسية جواها.
صباح مسرحتش فيه شعري بالفرشاة ومنستش آخد أدويتي، وشربت قهوة عشان أفوق ونطيت في السويتشيرت الأحمر عشان بردانة.
صباح لليلة كنت فاكرة فيها إني لو نمت مش كويسة وقمت الصبح هحس أحسن...
صباح ببعت فيه لحُسام عشان أقوله لو سمحت خد بالك مني النهارده... خليني أذاكر وشقّر عليا كل شوية، متنسانيش.
صباح بكتب فيه عشان محسش إني لوحدي.
صباح الـ" معلش يا رضوى، يوم وحش بعد فترة شبه مستقرة..عديها يعني"..
