البنج والألم

أنا عارفة إني عاوزة أروح اقعد معاه...هحكيله عن ولاد الكلب... ولاد الكلب اوي...عن وجع قلبي... وبعدين هو هيزعل، هو مبيزعلش من الحياة بشكل شخصي أبدا وواخدها -على عكسي- ببساطة مطلقة؛ بس هيزعل عشان أنا زعلانة. هصالحه بإني أعمل نفسي اتصالحت مع نفسي.

هنتخيل الخذلان ممثل فاشل واقف ع المسرح بيحاول يضحّك الناس، بس فشله بيخلي الناس تضحك عليه.

هتخيلنا قاعدين ف ممر طويل مستنيين في آخره نلاقي الدنيا داخلة عليا بـ 3 رجول عشان تكعبلني وأقع، فهو يستخبى على جنب أول الممر ويكعبلها الأول قبل ما هي تكعبلني.

هيقول لي عارفة إن عدوية ليه اغنية اسمها "بنج" بيقول فيها "عينيك اللي بتجرح هي الدوا والبنج" ،هقاوح واقول له لو فيها بنج مش هتحرقني من التراب دلوقتي!.. هيقول لي مش لازم تبقى بنج بالنسبالك بس هي كده بالنسبالنا، هقوله طب ما كل واحد يخليه في عينيه احسن يمكن أخف أنا!...وهنتكلم عن حاجات متعلقة بالاكتفاء الذاتي الكاذب.

هقول له إني جات لي توليب لأول مرة هيضحك ويقول لي "يااااه ع الحلاوة" .. 

هقوله والله انت اللي حلو . خلاص أنا مش زعلانة تصبح على رضوى، واسيبه عشان أنام .أقوم من تاني مش عاوزة أتحرك م السرير...هلعن الهيرمونات البايظة، والمود سوينجس، والكسل. هقوم غصب عني عشان أَصَحّي نور للمدرسة...وعشان مينفعش أقف...وعشان لو وقفت محدش في الدنيا هييجي يزُقني ويخليني أمشي.  

we're all alone in this my dear. 

"
أُغلق الأنوار واستلقي علي ظهري ، أنظر للسقف
وأنا اقول : يارب .. يارب خلي الناس اللي بحبهم لما اتوجع يعرفوا يطبطبوا عليا مايوجعونيش اكتر..
"