قواعد الكدب الأربعة

حلمت بيك امبارح...من غير منطق أو فكرة وبدون ما تكون على بالي...

1- مادام أنتِ كويسة.. 

تيتة اهتمت جدا بإني أتدفى امبارح.. زعقت لي عشان السويتشيرت خفيف، ولبستني الروب بتاعها بالعافية.. اطمنت اني قبل ما اتدفس ف السرير اللي جمبها اتغطيت ببطانيتين، وبعدين هووووب.. قومتني 3 مرات من صوتها وهي بتتوجع بالليل، فصحيت مخضوضة عليها وقمت جري جبتلها سكر وعصير من المطبخ اللي كان بارد وشباكه مفتوح...

تيتة عندها فوبيا من الموت، واعتقاد مصيري بيتقول إن الموت بييجي بالليل.

عشان كده تيتة مبتنمش غير بالنهار.

2- مادام أنتَ كويس..

في الحلم مكُنتش زي المرات اللي فاتت.. مكُنتش واقف على الأرض في البحر بتشرب سيجار وبتكسر كل قوانين الجاذبية والطفو.. مكُنتش بتدور على حاجة تايهة منك...مكنتش عامل نفسك مش شايفني ولا انا بتظاهر إنك مش موجود في المكان.

أنا مؤمنة بالناس، انت -كنت- عارف اني مؤمنة بالتفاصيل العظيمة اللي عندهم...عارف البنت من دفعة 14 اللي عمري ما بعت لها الجواب بتاعها؟ عارفة انك متعرفهاش. بس النهارده شوفتها بتسأل المعيد قبليا وكل اللي لمحته منها إنها كانت لابسة سلسلة فيها علامة the deathly hallows !! العباية والحجر والعصاية... محدش من الأوضة حتى لو قرا هاري بوتر كان هياخد باله منها. في اللحظة ديه تخيلت إني لو كنت ولد كنت هحب البنت دي، مع إنها هادية، مش مُلفتة خالص للإنتباه، خوّافة جدا، حالمة للغاية!
اوكي انا مش شمال يابو العيال، بس اللي أقصده أد ايه هي جميلة، ومتعرفش إنها جميلة وجايز محدش بيقولها ده.
صاحبي اللي كنت بكلمه من يومين في لحظة تجلي قلتله إني شايفة عنه حاجات ميعرفهاش. وحابة أقول إن أنت كمان شوفت فيك حاجات متعرفهاش.

لمّا جيت لي في الحلم ده كنت شبهك أوي، شبه نفسك قبل ما أعرفك ولا تعرفني، شبه الولد اللي كنت متأكدة إنك كنت عليه. مقصدش شبهك دلوقتي خالص. أنا نسيت شكلك تقريبًا! بس كنت شبه الولد اللي بيحارب، اللي ماسك في ثوابت قليلة شوية لكن مبتتهزش، اللي دايمًا مبسوط كالعادة، اللي وجوده لوحده سَند. كان فيه في الحلم مسافات، مسافات عمرها ما كانت موجودة في الواقع الواسع بتاعنا، المسافات في الحلم كانت حلوة.

يمكن كان لازم نجربها قبل ما نتورط.،  يمكن كان لازم تسيبني أحطها بدل ما بكل عنفوان تمسحها وبكل جرأة تتخطاني...وبعدين ننتهي بالوصول لمرحلة غير مفهومة وصلنالها. كنت كويس في الحلم، وغير مؤذِ بالمرة كويس زي ما المفروض نبقى دلوقتي...

3- واحنا مع بعض..

آخر مرة...آخرة مرة سلمت عليك ومشيت ممسكتش فيا. كنت عارف إني مش هقعد وإن الخوف كسب والأمر اتحسم وإني مش هـ settle بأي حاجة مش كفايا بالنسبالي. آخر مرة مقلتليش استنى شوية و"متمشيش" فقلبي مسابنيش ف نص السكة ورِجع لك كالعادة... آخر مرة مكناش سوا ومكناش مع بعض ومكنتش أعرف أي حاجة ممكن تخلي الناس اللي بتـ grow apart ترجع لمسارها تاني...مكنتش هعرف أرَجَّع لك التفاصيل اللي متعرفهاش عن نفسك...

4- كل حاجة هتبقى كويسة.

الناس نوعين يا إما wholehearted يا إما vulnerable ومش قابلين هشاشتهم وشايفينها ضعف ونقطة كسر.
لا أنا ولا انت wholehearted. أنا بحس بالحاجات اوي. وأنت بتتجاهلها بغباء، تفتكر ازاي خطوطنا اتقاطعت؟!
كنت بشوف صور شامي ليا وصحابي من شوية وسألت نفسي ازاي عمرنا ما جمعتنا صورة واحدة حتى مع صحابنا؟! وازاي انت بتعرف تفتكر الحاجات الحلوة! الحلوة بس! وانا مبفتكرش غير الوجع..جايز حتى أنسى مسبباته. كل واحد كان بيحاول يصلح نفسه بطريقته.
وعلى ما في الآخر اكتشفت إن الهشاشة مش ضعف هي مجازفة... مجازفة عاطفية او انكشاف او عدم يقين وتعتبر أكبر المقاييس دقة لو هتقيس شجاعة الناس وصراحتهم...وقادرة تخلينا متسقين مع ذاتنا ومع اللي بنحبهم...ملحقتش أقولهالك ومكنتش هتصدقني عمومًا...معرفش ليه مصدقتنيش وانا عمري ما كدبت!

انا كويسة، انت كويس، احنا مش مع بعض، كل حاجة هتبقى كويسة.
بكرة هتيجي نتيجة أصعب من أي نتيجة استنيتها... وتاني مرة احس احساس "خلاص انا مش خايفة".
فاكر لما قلتلك اني بتخض لما بلاقيني مش خايفة عشان ده معناه اني معييش اي حاجة اخسرها؟
طب انا ممكن اخسر حاجات كتير اوي في حياتي. وبرضه مش خايفة!
ومش عارفة ليه بحلم بيك..ومش زعلانة ولا قلبي بقى بيوجعني تاني لمّا سعاد ماسي بتقول غاضتني عمري كي جت من عندك!..وبطلت أستنى الغَمزة بتاعت Celine Dion في أغنية Taking Chances. عارف ليه؟ عشان سيلين مكنتش بتغمز أصلا، آه والله. راجعت الكليب بتاع سبعميت مرة .واتأكدت كويس ان الغمزة كانت جوا دماغي انا وبس.

.

Note to self: الحكاية علامة شفاء الراوي.

.
.
.