16.8.14

إلقالك حد



غالباً متخيلني سنو وايت بعيون ملونة .. و لو بتحب السمار هتشوفني بنت سمرا شبه الشوكولاته وفي نفس طعامتها ، وتتخيل شعري طويل جداً وممكن توصل بيك البجاحة وتتخيلني ريد هيد..معلش معلش عاذراك، غلبان متعرفش حاجة..
عزيزي.. أنا عارفة إنك بتدور عليا دلوقتي.. عشان كده هسهلها عليك وأقولك إني لابسة بيجاما نبيتي عليها سبونج بوب بتضّحك جداً ولكلوك بنفسجي ملوش علاقة بالموضوع بالإضافة إن شعري مربوط بكل أناقة لورا في شكل شبيه جداً بالبيزنيس وِمِن اللي بيلبسوا فورمال وبيطردوا الnew interns من قبل ما يغلطوا حتى..

غالباً في التوقيت ده من كل يوم -على آخر اليوم- بكون مكتئبة سواء قاعدة بعمل ليستة جديدة بأسماء ناس معرفهاش ومشاكل ممكن تحصل ف المشروع ، أو بفكر ف مادة كتابية للناس تقراها، أو شغالة في مشروع المايكرو والدنيا ضلمت عند حد معين ومش قادرة اخد خطوة، طبيعي تحس ان ده يدعو للكآبة ..بس الحقيقة اللي مش هقولها إنك هتلاقيني ورا كل الحاجات ديه بفكر في مدى هشاشتي وإني مستقوية بزيادة على نفسي وعلى الناس وبزُقهم لبعيد عشان أفسّح لك مكان اعرف اطبطب عليك فيه لما تتصدم إني عيوني بني غامق تقريباً وشعري مش طويل ولا قصير وبسمع ريما خشيش وهي بتقول "أمتى هتعرف أمتى.. إني بحبك أنتَ؟!" وانسجم معاها..

بفكر في الهدوء والسكينة اللي رضوى داود حكيتلي عنهم مرة، السكينة اللي متخيلتش وجودها في العالم والانتماء أخيراً
أنا مش بعرف أنتمي -زي ما أنت مش عارف- عندي صحاب كتير جداً من كل مكان بيلعبوا مزيكا وبيرسموا ويرقصوا باليه وهندي ويغنوا ويشتغلوا ف السيلز والتسويق، بيعملوا شغلهم الخاص، بيصوروا ،بيكتبوا، بيعملوا مشاريع وشاطرين في المذاكرة وفوق ده كله بيجيبولك السعادة لحد باب قلبك، عندي صحاب جدعان من كل الفئات والمراحل المختلفة وعارفة إنهم بيحبوني زي ما بحبهم .. بس عمري ما قدرت أبقى بكُلي مع الجروبات الكبيرة دايماً بحس بنقص.. دايماً بحتاج أكتر من الدوشة والناس عشان أملاني
مبحسش بالاكتمال اللي بحسه مع الناس الكتير، زي لمّا بحكي مع حد واحد من غير ما أضطر أوزع آي كونتاكت ومن غير تشويش على إشارات القلب ..

عزيزي.. وأنت جاي في السكة من ناحية الكورنيش لو لاقيت بنت صغيرة شعرها دهبي طويل واسمها مريم بوسهالي بوسة بريئة.. وخليها تتكلم معاك وتحكيلك إنها لما دخلت أوضة العمليات والدكتور وراها المشرط وإداها بنج متخدرتش وفضلت في وعيها.. اسمعها وهي بتقولك "قاموا خدروني تاني وأدوني حقنة تانية.. ولما محوقتش فيا برضه قلت ما بدهاش أنام أنا بقى!"... هتضحك أوي ، ومتنساش تطبطب عليها لما تلاقي ايديها بتنقبض لا إرادياً من الوجع.. وتقولها خلاص هانت.

كمان هتلاقي في طريقك محل بيبيع فستان أبيض منقط أسود وطوله ييجي لحد الرُكبة كده، لو معاك فلوس ممكن تجيبهولي هدية مش هقول لأ ومش هطلب منك حاجة تاني أبداً لمدة 3 أيام..

ممكن لو جيت ولاقتني بكتب متقاطعنيش.. أقعد ساكت لحد ما كل تعابير وشي تفضى والكلام يتدلق مني ع الكيبورد براحته..
هخلص وأحكيلك عن آخر مرة كنت بكتب في مكان عام والراجل اللي كان قدامي مندمج ف الشغل تنح لي بسبب التعبيرات بتاعتي اللي بتظهر وأنا متأثرة باللي بكتبه، أقعد جمبي اشرب قهوة وسيجارة ماكبيث مبتطلعش دخان لحد ما أخلص .. 

عزيزي.. غالباً أنا كمان قاعدة متخيلاك دلوقتي ماسك رواية أو كتاب بتقراه، لابس نضارة وبيجامة غالباً مش بتضّحك زي بتاعتي.. شكلك لما بيسرح أو بتضحك بيبقى حتة من السما.. وأنا بحب السما بالليل اوي

تصبح على خير.


21-3-2014
...............

لاقيتها في الارشيف، حبيتها، فكرتني إني لازم مفقدش الأمل فيه .
العنوان من هنا