9.7.14

FutureMe

مكنتش هكتب حاجة لحد ما جالي جواب كنت باعتاه لنفسي من 3 سنين..قبل عملية التحول الجذري في شخصيتي :)


................................................

ابعتوا لنفسكوا جوابات تفكركوا بحاجات حلوة، أو تضحككوا على نفسكم، أو تخليكو تمسكوا في أحلامكم، أو تقيسوا بيها ايه اللي بيتسرق منكوا كل يوم..
اتأكدوا إنكوا بتكبروا بس مبتبعدوش، متخلوش الواقع يموتكوا بالحيا، متخلوش الديمنتورز اللي بنقابلهم كل يوم من أول ما بنصحى عشان ننزل الشغل ولحد ما نقعد ع المكتب يمصوا روحكوا، وميتبقاش منكوا غير بوكر فيس بترسموه في وش الأوفيس بوي الغلبان وهو بيروي الزرعة اللي بين مكتبكوا ومكتب الجيران أو في وش السايس اللي طالع عينه في عز الحر عشان ياخد باله من عربيتك..
أفضلوا فكروا نفسكوا إنكوا مش مضطرين تدخلوا الخلاط المقرف اللي العالم فارضه عليكوا في الناحية ديه من العالم عشان ترضوا أي حد غير نفسكوا.. أحلموا وانتوا صاحيين وأحضنوا اللي بتحبوه واللي بتحبوهم، كلموهم من نص الكوكب التاني عشان بس صوتهم بيطمنكوا، عيشوا ببساطة وحب.. بس كده.

..............................................

عزيزتي راء/
رغم كل الغُصص والأذى اللي حصل يوم عيد ميلادك الواحد وعشرين
كان لازم بكل امتنان يومك ينتهي بعنين منورة وانتِ بتقولي جملة اليزابيث جيلبرت 
" I'm the luckiest girl in the world" :)
الحمد لله..