......................
كل حاجة موجودة في خلفية عقلي بتمنعني انبسط بجد.. كل حاجة بتحصل في الواقع مزيفة ومش شبهي..كل الوقت اللي بيضيع عشان ألملم أشلاء المعارك اليومية، كان ممكن يتقضى في مساعدة ناس بحبهم وحب ناس بيحبوني ومحاولة الاستسلام للأمان اللي ممكن يكون مؤقت بدل الفزع والجري والوقاحة..
كل الوقت اللي بضيعه عشان أحط آي لاينر وامسحه واقلع اللينسز وألبس النضارة وأقلعهم هما الاتنين ، كان ممكن يختفي وألحق ميعاد الساعة 8 الصبح لو صدقت إني صاحية جميلة وعينيا مش دبلانين.
كل محاولات التضحية بسعادتي ووقت فراغي وشغلي ومذاكرتي لو كنت عارفة إنها متقدرة وإنهم مش شايفين ان ده "واجب عليا" ..كنت هعملها بحب أكبر بكتير مش تقضية واجب مش مقتنعة بوجوبه.
كل مرة بقعد أدون بكتب كلام روايات ومجلات مش مكانه هنا، هنا مكان وَصْل الروح اللي بنقول فيه وقت ما نتوجع إننا موجوعين، وقت ما نخاف إننا عاوزين حُضن، وقت ما حد يوحشنا إننا مفتقدين الغايبين، وقت ما حد يختفي من غير أثر نقول إنه مات، وهكذا..
هنا مش مكان للكلام المنمق حتى لو بيقراه نص الناس اللي عارفينا في الواقع ، مش مهم! مش مهم أبداً طول ما هما عارفين حدودهم.. ده مش المفروض يوقفنا عن الكتابة والحكي.. إحساس العجز لو كان جواهم عشان مش عارفين يساعدونا هيبقى دماره الكلي أخف بكتير من لو احنا اللي عجزنا عن مساعدة روحنا.. أنا مُدوِّنة هنا مش كاتبة، ولازم نفصل بين الشغل والتدوين.
....
نجيب منين حد يفهم إننا عايشين حياتنا بشرخ مش طبيعي، من غير ما يقول لنا دوَّروا على السبب، من غير ما يقول لنا بكل سهولة "جيت أوفر ات" ولو ناوي يقولها يستحسن يشاورلنا على زرار الجيتنج أوفر ده .
حد يقول لنا إننا مبنبالغش عشان بناخد الحب على محمل الجد والمشيان على إنه أمر شخصي جارح.
نجيب منين حد مش هيقول لنا حلول منطقية لمشاكل مش بتتحلل غير بالطبطبة وبشوية سحر مش متعلق تماماً بإننا نلاقي جذور المشكلة عشان الجذور متشعبة، ومش هنعرف نحلها لو حتى جالنا بابا نويل بذاكرة جديدة وحياة موازية..الأذى تخطى الحدود.
يعني هو الحب في الأصل بينبع من رغبتك في الاكتمال بحد.. يعني لو انت عيان زعل فلما تاخد شوية من ضحكة حد بتحبه قلبك هينور..وضحكته هتزيد.
....
مش عارفة نفسي في ايه بالظبط، جايز نفسي محسش بالعجز لما اللي بحبهم يكونوا موجوعين وبيعافروا وانا مش عارفة اشيل الوجع.. بريحهم بس مش كفايا.. حاجة عاملة زي ما تقول لحد انك بتحبه بالكلام.. أو تقولهاله وانت بتحضنه من غير كلام..
....
كنت بصلي الفجر وفي نص الفاتحة في الركعة الأولى توصلت للمنطق الوحيد ورا كل اللي حاساه ، فقطعت الصلاة عشان أقول " يارب ده كابوس.. خرجني منه بسلام وبسرعة"
