يا ملاك، يا جنية، يا ست الحُسن

....................

"زمان.. كل ما كنا بنسافر المصيف كنا بنتحرك دايماً وقت الفجر، وأنا مكنتش بعرف أنام طول الليل ..
الليلة دي كنت بسهر لحد ميعاد السفر وفي يوم وانا زهقانة قررت أرفع سماعة التليفون وأكلم واحدة ساكنة عندنا في الشارع متعرفنيش، وأول ما اسمعها بتقول آلو.. كنت بتخن صوتي وأقولها : " أيوة.. أنا السفاح ، هعدي عليكي بكرة الساعة 8 بالليل عشان أدبحك".. وبعدها أقفل السكة بسرعة.. وفضلت أعمل كده سنة ورا سنة والمشكلة إن الست كانت بتخاف في كل سنة!"

..........................................

هو تعبير اتهرس مليون مرة..

بس أنا حاسة زي الصبارة اللي محتاجة تحس بدفا حضن حميمي للغاية من اللي حواليها وكل ما حد بس يحاول يقرب.. تئذيه بشوكها ، لا هي عارفة تعمل حاجة ولا هما عارفين يقربوا صح.

........................................

-وهتعرفي إزاي لما ييجي؟ هعرف لأنه هيبقى أول واحد بيصلحني، من غير ما يخليني آخد بالي إنه هنا عشان يصلحني ويصالحني على العالم والناس..
هعرف لما أبطل أقول في سري:
I'm not the girl i used to be and i can no longer hang on to people.

........................................

-هو أنا محكتلكوش عن عبد الصادق؟

-لأ.. مين ده.. الفيرست لاف؟

-آه .. عبد الصادق كان بيحبني وأنا في تانية ابتدائي وفي يوم كنا خارجين من المدرسة، مامتي وقفت تكلم مامته قدام العمود، وأنا وهو كنا واقفين ورا العمود..

-أوباااااااا..ورا العمود ولا ورا مصنع الكراسي.. ها وبعدين؟

- ولا قبلين، راح جايب لي وردة وجيه يديهاني.. بس أنا مسكتش ، مرضتش آخدها طبعاً..والحمد لله إني مرضتش..

-ليه؟

- أصلي قابلته بعديها صدفة واحنا في ثانوية عامة.. ومندمتش بعد ما شوفت شكله بقى عامل ازاي .

..................................

عارفة لمّا أموت.. نفسي ميكتبوش على شاهد القبر اسمي ولا سني ولا أي حاجة عني..
عاوزهم يكتبوا جملة...لأ، كلمتين بخط ديواني ومن غير زخرفة كتير، عاوزهم يكتبوا :
" كنت بحاول.."

................................

- الكونتيسة اللي ساكنة في النص التاني من الكوكب..

-بس تقنياً احنا على بعد 4 ساعات بالكتير بالطيارة، واحنا الاتنين فوق خط الاستواء ، فانا مش في النص التاني ولا حاجة!

- وتقنياً برضه أنا ممكن أقسم الكوكب نصين من أي مكان أنا عاوزه ..

-Can't argue with that! 

...............................

-طب يعني البنت المنعكشة اللي عاوزة تاكل وقاعدة تتفرج على فيلم رعب دي موقعها ايه م الحياة؟

-هي نفس البنت الحلوة الجميلة اللي ف بداية الحدوتة، يدوبك شربت عصير بايظ هيبهدلها كام ساعة وترجع تاني.. ياريت تتغلبي على الوساوس وتسرحي شعرك، البنات اللي شعرهم متسرح أقوى في مواجهة العالم معروفة دي!

......................

- من غير أفورة ومن غير ما تضايقي.. انا بحب رضوى الكائن المحلو دهون..وكل ما بحتاج جمال بجيلك..

- ديه أحلى جملة اتقالتلي ...من امبارح ! 

...................

الولد اللي ساكن في النص التاني من الكوكب بيبعت لي صور حلوة طول الوقت.. ولما الدنيا مطرت سمعني صوت البيانو مع المطرة...ومبطلتش ابتسم له كل ما يبعت لي صورة ويحكيلي حاجة nice.. الولد ده طيب ومش بيقرا هنا عن البنت اللي عاملة زي الصبارة مبتسمحش ﻷي حد يحضنها عشان متئذيهوش.. او عشان ميئذيهاش ! بس بطريقة ما هو يستحق إن البنت دي تحكي عنه لحد ما ينساها وسط الزحمة، ويخذلها زي ما هي متوقعة..أو جايز لأ!

..................

عزيزي/

 ياريت تاخد بالك ومتغوطش ف العلاقات جامد إن أمكن .. عشان ساعتها مش هتعرف تاخد خطوة ورا وتاخد نَفسك بعيد من غير ما توجع اللي قدامك، أو تتوجع انت نفسك عشان بتوجع حد بتحبه.

ياريت كمان تخلي علاقاتك خفيفة، الناس متعودين فيها على غيابك ورجوعك من وقت للتاني لو كنت مش من الشخصيات المستقرة نفسياً 

افتكر إن العلاقات المرهِقة، هي اللي بيبدأ فيها طرف يتوقع كتير اوي من الطرف التاني، والطرف التاني طاقته تخلص ويحس إنه مش قادر يدي، وبعدها يحس إن كل الهوا بيتسحب من الأوضة.. فبيجري(عشان مش قادر يستمر في احتمال تجريحات وهو مش عارف يرد ولا عارف فين المشكلة)، أو يفضل واقف لحد ما العلاقة تقع فوق دماغهم هما الاتنين عشان حاسس بالذنب لإحساس مش عارف يوصله أو يبرره .. Either way ,we are screwed my friend

..............

العنوان، خوخة اللي مختاراه من أسبوعين تقريباً.
الحواديت.. ناس بحبهم حكوهالي او جايز انا اللي حكيت مش مهم!
والرسالة للولد الحلو اللي طلبها امبارح، وليا..