Let the fear begin

الناس اللي هتقابلهم في بداية حياتك نوعين : يا إما مش مهتمين نهائياً باللي أنت بتعمله، ومعندهمش حتى استعداد يسألوك زيك زي أي غريب ماشي في الشارع..

يا إما اللي شايفينك حاجة كبيرة اوي ومتوقعين منك أكتر من طاقتك البشرية.

المشكلة هنا إنك لما هتحس نفسك خايف مش هتعرف تلجأ لأي نوع منهم؛ لا اللي مش مهتمين ولا اللي ممكن تسقط في نظرهم لمجرد إنك حاسس شعور إنساني مش هتعرف تتجاهله..

بعد ما تتخطى حاجز الخوف الأول، هتلاقي الناس 3 أنواع :

اللي لسه مش مهتمين ،اللي لسه مؤمنين بيك، والنوع الجديد هما اللي بيحاولوا يشدوك عشان تُقع فوق جدور رقبتك فيلاقوا فرصة يستمتعوا فيها وهما بيقولولك "قُلنالك متنطش في وسط البحر من غير عوامة وأنت مسمعتش الكلام" هيقولولك كده حتى لو كنت بطل السباحة مسافات طويلة..ديه رسالة مسجلة.

خلاصة ده كله.. أنت خايف.. هتفضل خايف، في كل مرة هتاخد خطوة كبيرة ، جديدة عليك، بره منطقة الراحة بتاعتك ، هتخاف..

بس لو فضلت واقف في مكانك مش هتكسب أي حاجة..عشان كده مضطرين نكمل مشي واحنا خايفين لحد ما نعمل منطقة راحة جديدة أو نكسر الخوف ده وهذا أضعف الإيمان.

.....

ملحوظة على الهامش : أنا خايفة جداً للحد اللي ممكن يخليني أحشُر نفسي جوا رُكن معين في الأوضة وأقعد أعيط لحد بكرة، وده كله حصل لمّا الولد الوسيم فكرني من يومين إني عندي 20 سنة بس..

ومن ساعتها مش قادرة أفهم يا ترى اللي عندهم 20 وداخلين على 21 مفروض يكونوا بيعملوا إيه في حياتهم غير الخوف والعياط والتدوير على حد ممكن يطمنهم ويقف في ضهرهك يسندهم فميلاقوش؟!

.