العنوان بالإعتذار للست فيروز .. وتفسيره ملوش أي علاقة غير بآخر 3 سطور في البوست
بتروّح.. في الآخر بترجع بيتك
تروق الأوضة اللي أتحولت لزريبة هدوم مرمية ف كل حتة وتدعي للست اللي بتيجي تنضف أول الأسبوع ربنا يديها الصحة ويقدرها على ما بلاها..
تفتح التكييف يبرّد الأوضة على ما تجهز الحمام عشان تاخد دُش هادي، أكتر لحظات بتراجع فيها نفسك هي اللحظات وأنت واقف تحت الدُش بتسمع صوت دماغك بيفكرك إن ده من أطول الأيام اللي عدت عليك ف الكلية وإنك منمتش غير 3 ساعات امبارح منهم ساعة لما فوت المحاضرة الأولى، وإنك عندك أرق مزمن متكرر مع إنه المرادي مش مُرهق كفايا ومنتاش عاوز تنام.
تفكر ف الـ 4 مشاريع مرة واحدة ، ييجي في بالك مشهد شركة المرعبين "الورق البمبي للحسابات، والورق الفوشيا للمبيعات، والورق الكاكي.. الكاكي يروح لروز.. والأحمر ف مكانه!" (بالمناسبة عندي دكتورة في الكلية شبه روز بالظبط !)
بتفكر في النص.. عن الوحدة والخوف..المشيان والسفر،وعيا بسمة اللي مش هتعرف تخففه..
صوت الدُش مش عالي كفايا عشان يغلوش ع الأفكار ديه كلها.. وأنت عارف، ساعات لما بتاخد قرار بكامل إرادتك بتحتاج تستحمله للآخر.. أنت مستحمل للآخر.. مش هتشتكي وهتواجه اختياراتك بشجاعة وهيعدي الأسبوع ورا التاني وكل حاجة هتخلص.. يمكن وقتها تعرف تاخد بالك من كل حاجة تانية.
لحظة قفل الدُش بالنسبالي هي اللحظة اللي باخد فيها قرارت مهمة للغاية..
اعتذري لكل اللي اتعصبتي عليه النهارده .. بوسي خوخة وانتِ بتوشوشيها قبل ما تنام وتقوليها تبطل تنسى موبايلها ف الشنطة..
سرحي شعرك حلو متكسليش، ابعتي تقرير الشحتفة اليومي لشيماء الحلوة وارغوا ف نفس المواضيع اللي بترغوا فيها من أول الأسبوع، كلمي ميم.. احفظي صوته وهو مبسوط.. احفظيه كويس ومتفكريش انه هيشتغل.. متفكريش إنه هينساكي وسط زحمة يومه.. افتكري كويس إن ميم مش بينسى..وتجاهلي إنك بتكرهيه لما بيتفق مع شامي عليكي.. شامي رخم وكل الناس عارفين كده وال unspoken role بتقول مفيش ولد ممكن يجي ف صف بنت ضد ولد تاني صاحبه..
ويحضرك صوت شركة المرعبين تاني"احنا صيدة سهلة ، لقطة، خيبتنا تقيلة"
أنا كويسة.. حواليا ناس كتييييييير ميتعدوش بحبهم وبدّعي إنهم بيحبوني.. عندي كود ماتلاب 4 سطور بيعمل صدى صوت لأي سيجنال كونية .. وأوضة حلوة متروقة فيها تكييف وشوكولا وضحك .. شوية أرق وإرهاق وقلة وقت لممارسة الحاجات اللي بنحبها مش هيمنعونا عن البهجة...فشر!!
بالمناسبة الصيف دخل وده بيفكرني بحدوتة خوخة اللي كانت بتحكي فيها عن ولد كان بيحبها في الصيف بس وهي صغيرة.. راح قالها كده.. إنه بيحبها في الصيف ومش بيحبها في الشتا عشان كانت بتلبس الدريل القصير في الصيف وبنطلون ولحاف في الشتا!..
