بكتب همّي الخاص.. بكتب وبقاوم الرغبة في إني أسند راسي لثانية على المخدة جنبي عشان مقعش من كتر التعب.
........
"الكافيين الكتير بيزود الإرهاق..بالذات مع قلة النوم"
اعملي عصير فريش.. خدي نفس عميق..علّقي ال DREAM CATCHER فوق دماغك بالظبط مع ديل الحصان السخيف اللي أنتِ عاملاه.. قولي إن كل حاجة هتبقى كويسة وأنت واثقة إن مفيش حاجة اسمها كده.. وانسي إن ديه تاني أكبر خدعة في التاريخ بعد إجابة سؤال ازيك..
اقتنعي إنك كفايا وهتعرفي تطبطبي على نفسك النهارده ومش هتعيطي.. مفيش داعي خالص للعياط .. اشربي البرتقان بتاعك وأول ما تفتكري علاقة البرتقان بريحة السجاير.. قربي كفك عشان تشميها كويس وتتأكدي إن مفيش علاقة.. هزي دماغك اوي يمين وشمال لحد ما الفكرة تقع في الدريم كاتشر..
الدريم كاتشر هتحبس كل الأفكار السلبية والذكريات المؤلمة على شبكتها.. وأول ما شعاع ضحك يلمسها هتتدلع وتنطور الكلاكيع ديه وتبخرها في الهوا...
................
يا حبيبتي منتيش رومانسية كفايا عشان تجري عليه تترمي جنبه دلوقتي - مش هنقول تترمي في حضنه لأن معندكيش الجرأة تقولي كده - وتقوليله "الحياة وحشة اوي بس احنا حلوين، آه والله" وتميلي عليه كدهوت فيطبطب عليكي ويبتسم وتبصوا على اللاشيء في صمت..
ولا أنتِ حتى واقعية كفايا عشان ترمي ولاد الكلب اللي في حياتك من غير ما تبصي للجانب النضيف اللي فيهم، واللي يعتبر الشيء الوحيد اللي بيديكي أمل إنهم آدميين وبيستحقوا فرص تانية وتالتة ومليون.. فبينتهي بيكي الأمر بتلعني نفسك على ارتكاب نفس الأخطاء متناسية حقيقة إن ولاد الكلب عمرهم ما هيتعدلوا.. ولو لازم تلومي نفسك على حاجة فهتكون حسن نيتك وثقتك مش أكتر.
يا حبيبتي أنتِ مرهقة، حتى لو جسدياً بقيتي أحسن بعد ما سمعتي للدكتورز اوردرز.. بعد ما بعدتي عن أسباب وجع قلبك..
و ليه قلبك بقى بيروح لوجعه دلوقتي؟ أنتِ هبلة تعايشي مع الواقع ده.. وكمان هشّة لدرجة مثيرة للشفقة.. يعني من الآخر كائن فلافي زي ما يحيى بيقول..
..........
أنا مش بشتكي إن الجو حقيقي مزعج وإني معنديش وقت، ومشاويري المؤجلة زادت واحد لما كسرت النضارة النهارده..ولا بشتكي من إني بكره الشغل ف فرق وشخصيتي بتحب تمشي لوحدها مع دماغها ومش بعرف أقنع الناس بدماغي أغلب الوقت..
مش لأن ايدي أبرد من إني أسيبها للهوا مفتوحة.. وأقصر من مدها ناحيتك عشان أقرب المسافات بشكل متتالي عشان بملّ..
بس بشتكي عشان عمري ما رقصت سلو مع ولد وأنا في KG وده محسسني بعقدة نقص حالياً..بشتكي عشان اتصرفت بشكل نرجسي النهارده،عشان صدعت في نص أغنية الست اللي منفعش حد يصدع وهو بيسمعها وعشان ملحقتش استمتع بالبهجات الصغيرة في اليومين دول..
مثلاً لما وصلني طرد بالليل وجواه الكتابين.. بطريقة ما الطرد تاه ووصل لجيراننا.. ونسيوه عندهم لمدة 3 أيام.. مفتكرونيش غير ليلة امتحان الباور الموضوع مزعج جداً لما تفرح لمدة 3 دقايق بحاجة كانت ممكن تفرحك 3 أيام وبعدها تضطر تكمل مذاكرة الباور بلانت بكم لا يوصف من القهر!
بشتكي عشان بقى عندي كتب كتير مستنياني أقراها.. ومبقاش عندي مساحة في حياتي للقراية حتى، وده طلع أكتر بؤساً من القراية ال pdf ..و الأكتر بؤساً كمان إن أمثالي يبطلوا يكتبوا في وسط التعب بتاع كل يوم، وينسوا الراحة اللي بتيجي واحنا بنرمي شوية طوب من على كتفنا على المدونات او ف النوتس..
لو مكتبناش هنلاقي في آخر اليوم في الركن المنسي الوحيد من العالم بنت قاعدة بتفكر ف مليون تفصيلة ورؤية بسيطة أو فلسفية للكون، وجوا دماغها كلام مركون هيكمكم ويكتم على قلبها ونفسها قبل ما تتعلم تفلتر الكلام ده وتحتفظ بالمهم منه بس..
......................
تذييل:
* العزيز جداً صاحب الكتابين والطرد المنسي عند الجيران .. كان نفسي اتمالك من الطاقة ما يكفي عشان اتصل بكل زأططة في الكون أشكرك واتمنالك ليلة لطيفة بس الوقت متأخر جداً والامتحانات بتستنفذني بالبطيء..فياريت يكون الامتنان بيوصل بالوايرليس لمسافات بعيدة، ومتخفش مش هتعود :)
*القعدة مع ميرا بالليل في ضلمة الكلية واحنا بنحكي عن حاجات awkward وبنعد ال 3 نجمات اللي في السما أوفر آند أوفر.. زي الجنة بالظبط..
اللحظات ديه.. اللي بتبقى خارج نطاق العالم
هي اللي بتصبرني على مـأساويات وصعبانيات كل يوم.. آه والله
* ميم مش موجود طول الوقت أحكيله تفاهاتي ويضحك ضحكته اللي متتوصفش ويقول لي "يا راااء أنتِ جميلة والله العظيم"
والبنت اللي كانت بتحكي فوق ده كله رغم عنادها بتكتشف اد ايه ميم واحشها اوي وأملها مات لما ملحقتش ترغي معاه النهارده، ومعندهاش وقت تتصل بيه تقول له الكلمتين دول دلوقتي عشان هتعيط له طول المكالمة.. وهي مش عاوزة تعيط النهارده.
...
