بخاف عليك وبخاف تنساني

بحق المراسيل والحروف اللي موتناها عشان متوصلش.. 

بحق الغضب والخوف ويُتم القلوب والوجع اللي مش بيسكِّته البنادول..

بحق الوحدة ، والمرات اللي منعنا فيها نفسنا عن اللي بنحبهم عشان ميوجعوناش ولا نوجعهم..

بحق العيون المرهقة كل يوم الصبح من العياط ، الأرق والنوم الكتير، ونوبات الفزع ف وسط الخلق..

بحق الغلطات اللي ارتكبناها واللي مرتكبناهاش

بحق الأيام اللي قضيناها ساندين ضهرنا بنعد بلاطات الأرضية بعد ما خسرنا كل حاجة إلّا إيماننا..

بحق المرات اللي خسرنا إيماننا ومنتحرناش..

يارب.. عوضنا

..........................................

في وقتٍ ما يبدو بعيد اوي دلوقتي.. كانت الأمور أصعب بس كنت أقوى

كنت بقرب مني وبعرف أملاني كفايا، بعمل حاجات كان نفسي فيها بانطلاق وجنان.. أو جايز وقتها البلاك هول مكانتش محسوسة بقوة.. جايز كنت عملية أكتر وواقعية أكتر وبحلم أقل.

حالياً مشاعري خالية من كل حاجة في الكون.. كنت قاعدة بضحك في الميتنج وعندي ثقة وأنا عارفة إني عيانة بالحزن.. إن رسم قلبي خط مستقيم مش Pulses طالعة ونازلة.. مكنتش عارفة ليه حاسة بكده، مكنتش عارفة ليه بحلم بيك ومش بفتكر لما بصحى.. النهارده بس عرفت إن كل ده عشان وحشتني وقررت أقفل مشاعري عشان مستهلكهاش.. لحد ما كل حاجة فيا استُهلكت ومبقتش عاوزة أعمل أي حاجة في الحياة.

......................

كنت ماشية بدون هدف.. بعمل الحاجات اللي لازم أعملها ، من غير دوافع.. أول ما وصلت هناك بشكل أتوماتيك كان مايك ماسي بيغني "يا عاشقة الورد" .. دخلت أدور بكل فضول وأكتشفت إني عينيا بتمسح الأماكن كويس.. سألت نفسي بدور على مين؟ ازاي تدور على حد انت عارف كويس إنه مش موجود؟! اتعصبت، كنت قاسية اوي على نفسي لدرجة إن قلبي وجعني ومشيت معيطة من غير ما أطبطب عليها.

مش فاكرة بالظبط بطلت عياط أمتى بس عينيا لسه حارقاني.

....................

غيرت اسمك خليته فورمال قدر الإمكان، شيلت السمايلي فيس من زمان وحطيت بالفورماليتي حدود ما بينا

عارف رغم كل حاجة لسه لما بشوف رقمك قلبي بيدق .. وايوه عارفة إني لو شفتك هعمل زي المرة الغريبة اللي قابلتك فيها بالصدفة ،هسلم، ههرب من كل حاجة، ثم هجري بكل طاقتي بعيد عنك.

ايوه لسه بحس بالأسى ناحيتنا وساعات بحبك.. بحبك اوي.. وبتوحشني جداً

في الأوقات ديه بقفل كل السكك في وش كل الناس حتى صحابي لحد ما تعدي موجة الاشتياق..مبصدقش أي حد منهم وهما بيقولولي إني جميلة.. مبقراش حاجة ترش ملح على الوجع.. مبردش على تليفونات ولا بعرف آخد بالي من حد..بستنى لوحدي خالص لحد ما كل شيء ينتهي وتيجي موجات تانية 

ايوه ساعات بيجيلي أمل.. ساعات بحس إني شايفاك ساكن جواك في العمق وبنسى إني حاولت وحاولت وحاولت.. بنسى إني فقدت الأمل فيك وبعدين أهدا وأرجع أحط حدود لنفسي.. جايز نص الحاجات الحلوة اتنست بس إحساس المسئولية ناحيتك زي ما هو.

ايوه ساعات "بخاف عليك وبخاف تنساني"

حتى لو انا عارفة إنك ناسيني.. عارفة إني مش بالضرورة أكون واحشاك.. وإن مش بالضرورة هاخد موقف إيجابي ناحية الإحساس ده.. وإني خايفة أشوفك وبمشي أدور عليك.. وإني مش عارفة أحبني كفايا.. ونفسي اجيب نوتبوك جديدة لنفسي ومش بعمل ده، مش باخد خطوة تجاه اتفه الحاجات وأهمها بالنسبالي

عارفة إني بقيت أنام كتير.. ومش بذاكر ومش عارفة أكتب وحاطة خطط عشان أبسط صحابي ومنفذتش ولا حاجة منها.. مكسلة أجيب كتب فبقرا اللي عاوزاه PDF

وايه أكتر بؤس من القراية بالموبايل !! مفيش..

قلبي يتيم من ساعة ما مشيت ومش عارف يسيب حد يدخله.. رغم كل حاجة.. أنا لسه عبيطة وعندي وفاء كلابي خطير وبحب جلد الذات

خلاص الشتا خلص.. البيجاما القرمزي والمقشات السحرية اللي ممكن توصل الولد اللي ساكن في النص التاني من الأرض لشباك حبيبته بالليل معدتش تنفع عشان حبيبته بتقفل شباكها من الهوا كل يوم كويس..